ಕಿಸೇಲಿ ಕಾಸಿಲ್ಲ ಅಂದ್ರೂ ಹೊಲದಲ್ಲಿ ಚಿನ್ನ ಬೆಳೆಯಬಹುದು ಇದು ನಮ್ಮೂರ ನೈಸರ್ಗಿಕ ತರಕಾರಿ ಕೃಷಿಯ ಜಾದು!

ಇವತ್ತು ನಾವೊಂದು ಅತಿ ಮುಖ್ಯವಾದ ವಿಚಾರದ ಬಗ್ಗೆ ಸಾವಧಾನವಾಗಿ ಮಾತಾಡೋಣ ಬನ್ನಿ. ನಮ್ಮ ರೈತರು ರಾತ್ರಿ ಹಗಲು ಎನ್ನದೆ ಬೆವರು ಸುರಿಸಿ ತರಕಾರಿ ಬೆಳೀತಾರೆ. ಆದ್ರೆ ಮಾರ್ಕೆಟ್‌ಗೆ ಹೋದಾಗ ಏನಾಗುತ್ತೆ? ಸರಿಯಾದ ರೇಟ್ ಸಿಗಲ್ಲ.

ಒಮ್ಮೆ ರೇಟ್ ಗಗನಕ್ಕೆ ಏರುತ್ತೆ, ಇನ್ನೊಮ್ಮೆ ಪಾತಾಳಕ್ಕೆ ಕುಸಿಯುತ್ತೆ. ರೇಟ್ ಇಲ್ಲದಾಗ ಟೊಮೆಟೊ, ಮೆಣಸಿನಕಾಯಿನ ರಸ್ತೆಗೆ ಸುರಿದು ಕಣ್ಣೀರು ಹಾಕೋದು, ರಸ್ತೆ ತಡೆ ಮಾಡೋದು ನಮಗೆಲ್ಲಾ ಗೊತ್ತಿರೋ ವಿಚಾರನೇ.

ಹಾಗಾದ್ರೆ, ರೈತರು ಈ ರೀತಿ ಕಷ್ಟ ಪಡೋಕೆ ಕಾರಣ ಏನು ಗೊತ್ತಾ? ನಾವೆಲ್ಲಾ ಬರೀ ಒಂದೇ ಬೆಳೆ (ಏಕಬೆಳೆ ಪದ್ಧತಿ) ಬೆಳೆಯೋಕೆ ಹೋಗಿ ಮಾಡಿಕೊಳ್ಳುವ ದೊಡ್ಡ ಎಡವಟ್ಟು.

ಅದರ ಜೊತೆಗೆ ರಾಸಾಯನಿಕ ಗೊಬ್ಬರ, ಔಷಧಿ ಅಂತ ಸಿಕ್ಕಾಪಟ್ಟೆ ದುಡ್ಡು ಸುರಿದು ಮಣ್ಣು ಹಾಳು ಮಾಡ್ಕೊಂಡಿರೋದು. ಇದಕ್ಕೆಲ್ಲಾ ಒಂದು ಸೂಪರ್ ಪರಿಹಾರ ಇದೆ. ಅದೇ ನಮ್ಮ ‘ಶೂನ್ಯ ಬಂಡವಾಳ ನೈಸರ್ಗಿಕ ಕೃಷಿ’. ಇದರಲ್ಲಿ ಕಾಸು ಖರ್ಚಿಲ್ಲ, ರೋಗದ ಕಾಟವೂ ಇಲ್ಲ. ಬನ್ನಿ, ಇದರ ಬಗ್ಗೆ ನಿಮಗೆಲ್ಲಾ ಅರ್ಥ ಆಗೋ ಹಾಗೆ ಬಿಡಿಸಿ ಹೇಳ್ತೀನಿ.

ಮಣ್ಣಿಗೆ ಉಸಿರಾಡೋಕೆ ಬಿಡಿ

ನಾವೆಲ್ಲಾ ಏನ್ ಮಾಡ್ತೀವಿ? ತರಕಾರಿ ಗಿಡಕ್ಕೆ ದಿನಾ ಬಾಯ್ತುಂಬಾ ನೀರು ಹಾಯಿಸಿದ್ರೆ ಗಿಡ ದಷ್ಟಪುಷ್ಟವಾಗಿ ಬೆಳೆಯುತ್ತೆ ಅಂತ ಅಂದುಕೊಳ್ತೀವಿ. ಆದ್ರೆ ಇದು ತಪ್ಪು ಕಣ್ರೀ!

ಮಣ್ಣಿನ ಕಣಗಳ ಮಧ್ಯೆ ಸ್ವಲ್ಪ ನೀರು, ಸ್ವಲ್ಪ ಗಾಳಿ ಇರಬೇಕು. ಯದ್ವಾತದ್ವಾ ನೀರು ಬಿಟ್ಟರೆ ಮಣ್ಣಿನಲ್ಲಿ ಗಾಳಿ ಆಡೋಕೆ ಜಾಗನೇ ಇರಲ್ಲ. ಮಣ್ಣು ರೊಚ್ಚೆಯಾಗಿ ಬಿಡುತ್ತೆ. ಕಾಲು ಇಟ್ರೆ ಒಳಗೆ ಹೋಗೋ ಥರಾ ಆಗುತ್ತೆ.

ಯಾವಾಗ ಮಣ್ಣಲ್ಲಿ ಗಾಳಿ ಇರಲ್ವೋ, ಆಗ ‘ಶಿಲೀಂಧ್ರ’ (Fungus) ಅನ್ನೋ ರೋಗಾಣುಗಳು ಹುಟ್ಟಿಕೊಳ್ಳುತ್ತವೆ. ಇದರಿಂದಾನೇ ಎಲೆ ಮುದುಡೋದು, ಎಲೆ ಮೇಲೆ ಚುಕ್ಕೆ ಬರೋದು, ಕಾಂಡ ಕಪ್ಪಾಗೋದು, ಗಿಡ ಕಮರಿ ಸಾಯೋದು. ಅದಕ್ಕೆ ಗಿಡಕ್ಕೆ ನೀರನ್ನು ಹದವಾಗಿ ಕೊಡಬೇಕು.

ನೆನಪಿಡಿ, ಯಾವುದೇ ಗಿಡದ ಬೇರುಗಳು ನೀರನ್ನು ನೇರವಾಗಿ ಕುಡಿಯಲ್ಲ. ಬದಲಿಗೆ ಮಣ್ಣಿನಲ್ಲಿರುವ ತೇವಾಂಶವನ್ನು (ಗಾಳಿ ಮತ್ತು ನೀರಿನ ಮಿಶ್ರಣ) ಮಾತ್ರ ಹೀರಿಕೊಳ್ಳುತ್ತವೆ.

ಇದನ್ನೂ ಓದಿ: ನಾಟಿ ಕೋಳಿ ಸಾಕಾಣಿಕೆ: ಬರೀ ಮೊಟ್ಟೆ ಮಾರಿ ದಿನಕ್ಕೆ 5 ಸಾವಿರ ಗಳಿಸೋದು ಹೆಂಗೆ ಅಂತೀರಾ? ನಮ್ಮ ಹಳ್ಳಿ ರೈತನ ಈ ಕಥೆ ಓದಿ!

ಎರೆಹುಳು: ನಮ್ಮ ರೈತನ ಜೀವಾಳ, ಹೊಲದ ಪುಕ್ಕಟ್ಟೆ ಆಳು!

ನೋಡ್ರಪ್ಪಾ, ನಾವೆಲ್ಲಾ ಅಂಗಡಿಯಿಂದ ಸಾವಿರಾರು ರೂಪಾಯಿ ಸುರಿದು ತರೇವಾರಿ ಗೊಬ್ಬರ ತಂದು ಸುರಿತೀವಿ. ಆದ್ರೆ ನಮ್ಮ ಕಾಲ ಕೆಳಗೇ ಕೂತು, ಬಿಡಿಗಾಸಿನ ಸಂಬಳವೂ ಕೇಳದೆ ಹಗಲಿರುಳು ನಮಗಾಗಿ ದುಡಿಯೋ ಆಳು ಯಾರು ಗೊತ್ತಾ? ಅವನೇ ಈ ನಮ್ಮ ಎರೆಹುಳು!

ನೈಸರ್ಗಿಕ ಕೃಷಿಯಲ್ಲಿ ಈ ಎರೆಹುಳುವೇ ನಮ್ಮ ಭೂತಾಯಿಯ ಒಡಲ ಬಂಗಾರ. ಇದನ್ನ ನಮ್ಮ ಹೊಲದ ‘ಜೀವಂತ ಟ್ರ್ಯಾಕ್ಟರ್’ ಅಂದ್ರೂ ತಪ್ಪಾಗಲ್ಲ.ಅದು ಹೆಂಗೆ ಕೆಲಸ ಮಾಡುತ್ತೆ, ಮಣ್ಣಿಗೆ ಏನೆಲ್ಲಾ ಲಾಭ ಅಂತ ಒಂದೊಂದಾಗಿ ಬಿಡಿಸಿ ಹೇಳ್ತೀನಿ ಕೇಳಿ:

ನಿದ್ದೆಯಿಂದ ಏಳೋ ಸಮಯ: ಬಿಸಿಲಿನ ತಾಪಕ್ಕೆ, ಇಲ್ಲಾಂದ್ರೆ ನಾವು ಹಾಕೋ ರಸಗೊಬ್ಬರದ ಬಿಸಿ ತಡೆಯಲಾರದೆ ಪಾಪ ಈ ಎರೆಹುಳುಗಳು ಭೂಮಿಯ ಅಡಿಯೇ ಎಲ್ಲೋ ಪಾತಾಳದಲ್ಲಿ ಮಕಾಡೆ ಮಲಗಿ (ಸುಪ್ತಾವಸ್ಥೆ) ಬಿಟ್ಟಿರುತ್ತವೆ.
ಮಲ್ಚಿಂಗ್ ಅನ್ನೋ ಬೆಚ್ಚನೆಯ ಹೊದಿಕೆ: ನಾವು ಯಾವಾಗ ಗಿಡದ ಬುಡಕ್ಕೆ, ಮಣ್ಣಿನ ಮೇಲೆ ಒಣಗಿದ ಕಸ-ಕಡ್ಡಿ, ಎಲೆ-ಗರಿಗಳನ್ನು ಮುಚ್ಚಿ ‘ಹೊದಿಕೆ’ (Mulching) ಮಾಡ್ತೀವೋ, ಆಗ ಮಣ್ಣಿಗೆ ತಂಪಾದ ವಾತಾವರಣ ಸಿಗುತ್ತೆ. ಬಿಸಿಲು ನೇರವಾಗಿ ಮಣ್ಣಿಗೆ ಬಡಿಯಲ್ಲ.
ಜೀವಾಮೃತದ ಘಮ: ಆ ಹೊದಿಕೆಯ ಮೇಲೆ ಸಗಣಿ, ಗಂಜಲ, ಬೆಲ್ಲ, ಹಿಟ್ಟು ಸೇರಿಸಿ ಮಾಡಿದ ‘ಜೀವಾಮೃತ’ವನ್ನು ಎರಚಿದ ತಕ್ಷಣ, ಆ ಸಗಣಿಯ ಘಮಕ್ಕೆ ಭೂಮಿಯೊಳಗಿದ್ದ ಎರೆಹುಳುಗಳು ನಿದ್ದೆ ಬಿಟ್ಟು, ಚುರುಕಾಗಿ ಮೇಲಕ್ಕೆ ಎದ್ದು ಬರ್ತವೆ.

ಸಾಣಿಗೆಯಂತಾಗುವ ನಮ್ಮ ಮಣ್ಣು:

ಒಮ್ಮೆ ಎರೆಹುಳುಗಳು ಮೇಲಕ್ಕೆ ಬರೋಕೆ ಶುರು ಮಾಡಿದ್ರೆ, ಅವು ಸುಮ್ಮನೆ ಕೂರಲ್ಲ. ಮೇಲಿಂದ ಕೆಳಗೆ, ಕೆಳಗಿಂದ ಮೇಲೆ ಓಡಾಡ್ತಾ ಇರ್ತವೆ. ಈ ರೀತಿ ಓಡಾಡುವಾಗ ಭೂಮಿಗೆ ಕೋಟ್ಯಂತರ ಸಣ್ಣ ಸಣ್ಣ ರಂಧ್ರಗಳಾಗುತ್ತವೆ. ಅವು ಮಣ್ಣು ಮತ್ತು ಕಸ-ಕಡ್ಡಿಯನ್ನು ತಿಂದು ವಿಸರ್ಜಿಸುವ ತ್ಯಾಜ್ಯ (ಇಕ್ಕೆ) ಇದೆಯಲ್ಲ, ಅದೇ ಜಗತ್ತಿನ ಅತಿ ಶ್ರೇಷ್ಠವಾದ ಗೊಬ್ಬರ!

ಮಳೆ ಬಂದ್ರೆ ಚಿಂತೆಯಿಲ್ಲ: ಎರೆಹುಳುಗಳು ಮಾಡಿದ ರಂಧ್ರಗಳಿಂದ ನಮ್ಮ ಹೊಲದ ಮಣ್ಣು ಜರಡಿಯಂತೆ (ಸಾಣಿಗೆಯಂತೆ) ಆಗಿಬಿಡುತ್ತದೆ.
ರೊಚ್ಚಾಗದ ಭೂಮಿ: ಎಷ್ಟೇ ದೊಡ್ಡ ಮಳೆ ಬಂದು ಸುರಿದರೂ, ಹೊಲದಲ್ಲಿ ಒಂಚೂರು ನೀರು ನಿಲ್ಲಲ್ಲ. ನೀರೆಲ್ಲಾ ಸರಾಗವಾಗಿ ಭೂಮಿಯ ಒಡಲಿಗೆ ಇಳಿದು ಹೋಗುತ್ತದೆ.
ಬೇರಿಗೆ ಸಿಗುತ್ತೆ ಉಸಿರು: ನೀರು ನಿಂತು ಮಣ್ಣು ರೊಚ್ಚಾಗದ ಕಾರಣ, ಗಿಡದ ಬೇರುಗಳಿಗೆ ಉಸಿರಾಡಲು ಬೇಕಾದಷ್ಟು ಗಾಳಿ ಸಿಗುತ್ತದೆ. ಇದರಿಂದ ಶಿಲೀಂಧ್ರ (ಫಂಗಸ್) ಹುಟ್ಟಲ್ಲ, ಬೇರು ಕೊಳೆಯುವ ರೋಗವೇ ಬರೋದಿಲ್ಲ.

ಹೀಗಾಗಿ, ನಾವೇನಾದ್ರೂ ನಮ್ಮ ಹೊಲದಲ್ಲಿ ಯೂರಿಯಾ, ಡಿಎಪಿ ಅಂತ ಕೆಮಿಕಲ್ ಸುರಿದು ಈ ಪುಟ್ಟ ದೋಸ್ತನನ್ನ ಕೊಲ್ಲಬಾರದು.ಅದಕ್ಕೆ ಕಸ-ಕಡ್ಡಿಯ ಹೊದಿಕೆ ಕೊಟ್ಟು, ಜೀವಾಮೃತ ಉಣಿಸಿದ್ರೆ ಸಾಕು… ನಮ್ಮ ಹೊಲಾನ ಅದೇ ಚಿನ್ನದಂಗ ಬೆಳಗುತ್ತೆ ಕಣ್ರೀ!

ಏನ್ರಪ್ಪಾ ರೈತರಣ್ಣಂದಿರೆ, ನಾವೆಲ್ಲಾ ಒಂದ್ಸಲ ಯೋಚನೆ ಮಾಡಬೇಕು. ಕಾಡಿನಲ್ಲಿ ಇರೋ ದೈತ್ಯ ಮರಗಿಡಗಳಿಗೆ ಯಾರಾದ್ರೂ ಪೈಪ್ ಹಿಡ್ಕೊಂಡು ನೀರು ಹಾಯಿಸ್ತಾರಾ? ಮೋಟಾರ್ ಆನ್ ಮಾಡ್ತಾರಾ? ಇಲ್ಲ ತಾನೇ!

ಆದ್ರೂ ಆ ಕಾಡಿನ ಮರಗಳು ಭೀಕರ ಬೇಸಿಗೆಯಲ್ಲೂ ಹೆಂಗೆ ಅಷ್ಟು ಹಸಿರಾಗಿರ್ತವೆ? ಆ ಗುಟ್ಟೇ ಈ ‘ಹ್ಯೂಮಸ್’ (Humus) ಕಣ್ರೀ! ನಮ್ಮ ನೈಸರ್ಗಿಕ ಕೃಷಿಯಲ್ಲಿ ಇದನ್ನ ‘ಜೀವನ ದ್ರವ್ಯ’ ಅಂತಾನೂ ಕರೀತಾರೆ.

ಹ್ಯೂಮಸ್ ಅಂದ್ರೆ ಏನ್ ಮಹಾ? ಅದು ಹೇಗೆ ಆಗುತ್ತೆ?

ನಾವೇನು ಗಿಡದ ಬುಡಕ್ಕೆ ಕಸ, ಕಡ್ಡಿ, ಒಣಗಿದ ಎಲೆ, ಬೆಳೆಯ ಉಳಿಕೆಗಳನ್ನೆಲ್ಲಾ ಹಾಕಿ ಹೊದಿಕೆ (ಮಲ್ಚಿಂಗ್) ಮಾಡ್ತೀವಲ್ಲ, ಅದರ ಕೆಳಗೆ ಒಂದು ದೊಡ್ಡ ಮ್ಯಾಜಿಕ್ ನಡೆಯುತ್ತೆ.

ಮಣ್ಣಿನೊಳಗಿರುವ ಎರೆಹುಳು, ಇರುವೆ ಮತ್ತು ಕಣ್ಣಿಗೆ ಕಾಣದ ಜೀವಾಣುಗಳು ತಮ್ಮ ಕೆಲಸ ಮುಗಿಸಿ ಸತ್ತಾಗ, ಅವುಗಳ ಉಳಿಕೆ ಈ ಕಸ-ಕಡ್ಡಿಯ ಜೊತೆ ಸೇರುತ್ತದೆ.
ಆಗ ೧೦ ಭಾಗ ಇಂಗಾಲ (Carbon) ಮತ್ತು ೧ ಭಾಗ ಸಾರಜನಕ (Nitrogen) ಒಂದಕ್ಕೊಂದು ಸೇರಿ ಒಂದು ಅದ್ಭುತವಾದ ರಾಸಾಯನಿಕ ಕ್ರಿಯೆ ನಡೆಯುತ್ತೆ.
ಈ ಕಸವೆಲ್ಲಾ ಸಂಪೂರ್ಣವಾಗಿ ಕರಗಿ, ಮಣ್ಣು ಟೀ ಪುಡಿಯ ತರಹ ಕಪ್-ಕಪ್ಪಾಗಿ ಬದಲಾಗುತ್ತೆ. ಈ ಕಪ್ಪು ಮಣ್ಣೇ ‘ಹ್ಯೂಮಸ್’ ಅಥವಾ ‘ಜೀವನ ದ್ರವ್ಯ’!

ಇದನ್ನೂ ಓದಿ: ಮರಳುಗಾಡಲ್ಲಿ ಚಿನ್ನ ಬೆಳೆದ ಇಸ್ರೇಲ್! ರೈತರ ಈ ತಂತ್ರಜ್ಞಾನ ನಮ್ಮವರಿಗೂ ಮಾದರಿ!

ಗಾಳಿಯಿಂದಲೇ ನೀರು ಕುಡಿಯೋ ತಾಕತ್ತು!

ನಿಮಗೆಲ್ಲಾ ಆಶ್ಚರ್ಯ ಆಗಬಹುದು. ಈ ಹ್ಯೂಮಸ್‌ಗೆ ಎಂತಹ ಶಕ್ತಿ ಇದೆ ಅಂದ್ರೆ, ಇದು ವಾತಾವರಣದಲ್ಲಿರೋ (ಗಾಳಿಯಲ್ಲಿರೋ) ತೇವಾಂಶವನ್ನೇ ನೀರಾಗಿ ಬದಲಾಯಿಸಿಕೊಳ್ಳುತ್ತೆ.

1 ಕೆಜಿ ಹ್ಯೂಮಸ್ = 6 ಲೀಟರ್ ನೀರು: ಹೌದು! ಕೇವಲ ಒಂದು ಕೆಜಿ ಹ್ಯೂಮಸ್ ಪ್ರತಿದಿನ ವಾತಾವರಣದಿಂದ ಬರೋಬ್ಬರಿ 6 ಲೀಟರ್ ನೀರನ್ನು ಹೀರಿಕೊಳ್ಳುವ ತಾಕತ್ತು ಹೊಂದಿದೆ.
ಗಿಡಕ್ಕೆ 2 ಲೀಟರ್ ದಾನ: ಗಾಳಿಯಿಂದ ಎಳೆದುಕೊಂಡ ೬ ಲೀಟರ್ ನೀರಿನಲ್ಲಿ, ೨ ಲೀಟರ್ ನೀರನ್ನು ಗಿಡದ ಬೇರುಗಳಿಗೆ ಕುಡಿಯಲು ಕೊಡುತ್ತದೆ.
ವಾತಾವರಣಕ್ಕೆ 4 ಲೀಟರ್ ವಾಪಸ್: ಉಳಿದ 4 ಲೀಟರ್ ನೀರನ್ನು ವಾತಾವರಣದ ಸಮತೋಲನ ಕಾಪಾಡಲು ವಾಪಸ್ ಗಾಳಿಗೇ ಬಿಡುತ್ತದೆ.

ರೈತನಿಗೆ ಇದರಿಂದೇನು ಲಾಭ?

ಕಡಿಮೆ ನೀರು, ಹೆಚ್ಚು ಬೆಳೆ: ಪದೇ ಪದೇ ಮೋಟಾರ್ ಹಾಕಿ ನೀರು ಹಾಯಿಸೋ ಉಸಾಬರಿ ಇರಲ್ಲ. ಒಣ ಭೂಮಿಯಲ್ಲೂ ಗಿಡಗಳು ಹಸಿರಾಗಿ ನಳನಳಿಸುತ್ತವೆ.
ರೋಗ ನಿರೋಧಕ ಶಕ್ತಿ: ಹ್ಯೂಮಸ್‌ನಲ್ಲಿ ಗಿಡಕ್ಕೆ ಬೇಕಾದ ಎಲ್ಲಾ ಪೋಷಕಾಂಶಗಳು ಇರೋದ್ರಿಂದ, ಗಿಡಗಳಿಗೆ ಎಲ್ಲಿಲ್ಲದ ಶಕ್ತಿ ಬರುತ್ತೆ. ಸಣ್ಣಪುಟ್ಟ ರೋಗ, ಹುಳ-ಉಪ್ಪಟೆಗಳ ಕಾಟ ಗಿಡದ ಹತ್ತಿರವೂ ಸುಳಿಯಲ್ಲ.
ಫಲವತ್ತಾದ ಭೂಮಿ: ಮಣ್ಣು ಗಟ್ಟಿಯಾಗಲ್ಲ. ಯಾವಾಗಲೂ ಮೃದುವಾಗಿ, ಫಲವತ್ತಾಗಿ ಇರುತ್ತದೆ.

ನೋಡಿದ್ರಲ್ಲ ಅಣ್ಣಾ, ನಾವು ಪ್ರಕೃತಿಗೆ ಕಸ-ಕಡ್ಡಿ ಕೊಟ್ರೆ, ಅದು ನಮಗೆ ಬಂಗಾರದಂಥ ಮಣ್ಣು, ನೀರು, ಬೆಳೆ ಕೊಡುತ್ತೆ. ಇದೆಲ್ಲಾ ಗೊತ್ತಾಗದೇನೆ ನಾವು ಕೆಮಿಕಲ್ ಗೊಬ್ಬರ ಹಾಕಿ ಮಣ್ಣನ್ನ ಸುಟ್ಟು ಹಾಳು ಮಾಡ್ತಾ ಇದೀವಿ ಅಲ್ವಾ?

3X3 ಅಡಿ ಬೆಡ್: ಬೆಳೆಯೋಕೆ ಬೆಸ್ಟ್ ಐಡಿಯಾ

ತರಕಾರಿ ಬೆಳೆಯುವಾಗ ನಾವು ಏಕಬೆಳೆ ಹಾಕಬಾರದು. 3X2 ಅಥವಾ 3X3 ಅಡಿ ಅಂತರದ ಮಾದರಿಯಲ್ಲಿ ಏರ್ಬದು (Raised Bed) ನಿರ್ಮಾಣ ಮಾಡಬೇಕು.

ಮೊದಲು ಚೆನ್ನಾಗಿ ಮಡಿಕೆ ಹೊಡೆದು (ಉಳುಮೆ ಮಾಡಿ) ಒಂದೂವರೆ ಅಡಿ ಅಗಲದ ಕಾಲುವೆ ಮಾಡಬೇಕು.
ಒಂದು ಕಾಲುವೆಯಿಂದ ಇನ್ನೊಂದು ಕಾಲುವೆಗೆ 3 ಅಡಿ ಅಂತರ ಇರಬೇಕು.
ಬದುವಿನ (Bed) ಎತ್ತರ ನಮ್ಮ ಬೆಳೆಗೆ ತಕ್ಕಂತೆ 6 ರಿಂದ 9 ಇಂಚು ಇರಲಿ.

ಈ ಕಾಲುವೆಗಳು ಉತ್ತರ-ದಕ್ಷಿಣ ದಿಕ್ಕಿನಲ್ಲಿ ಇರಬೇಕು. ಆಗ ಬದುಗಳು ಪೂರ್ವ-ಪಶ್ಚಿಮವಾಗಿ ಇರುತ್ತವೆ. ಇದರಿಂದ ಮುಂಜಾನೆಯಿಂದ ಸಂಜೆಯವರೆಗೆ ಸೂರ್ಯನ ಬಿಸಿಲು ಎಲ್ಲಾ ಗಿಡಗಳ ಎಲೆಗಳಿಗೂ ಸಮನಾಗಿ ಬೀಳುತ್ತದೆ. ದ್ಯುತಿಸಂಶ್ಲೇಷಣೆ (Photosynthesis) ಚೆನ್ನಾಗಿ ಆಗಿ, ಗಿಡಗಳಿಗೆ ಶಕ್ತಿ ಬಂದು ಇಳುವರಿ ಬೊಂಬಾಟಾಗಿ ಬರುತ್ತೆ.

ಬರೀ ಒಂದೇ ಬೆಳೆ ಬೇಡ ಕಣ್ರೀ!

ಬರೀ ಟೊಮೆಟೊ, ಬರೀ ಬದನೆ ಬೆಳೆಯೋ ಬದಲು, ಮಿಶ್ರ ಬೆಳೆ ಬೆಳೆಯಬೇಕು. ಇದು ಹೇಗೆ ಅಂತ ಇಲ್ಲಿ ವಿವರವಾಗಿ ನೋಡೋಣ:

1. ಮಧ್ಯದಲ್ಲಿ ಮುಖ್ಯ ಬೆಳೆಗಳು: ನಾವು ಮಾಡಿದ ಬದುವಿನ ಸರಿಯಾಗಿ ಮಧ್ಯದಲ್ಲಿ ಟೊಮೆಟೊ, ಬೆಂಡೆ, ಬದನೆ, ಗೋರಿಕಾಯಿ, ಹುರುಳಿಕಾಯಿ, ಮೆಣಸಿನಕಾಯಿ ಅಥವಾ ಎಲೆಕೋಸು ಗಿಡಗಳನ್ನು ನಿರ್ದಿಷ್ಟ ಅಂತರದಲ್ಲಿ ನಾಟಿ ಮಾಡಬೇಕು. ಕಡ್ಡಾಯವಾಗಿ ನಾಟಿ ಬೀಜ (ಜವಾರಿ ಬೀಜ) ಬಳಸುವುದು ಉತ್ತಮ. ರೋಗ ಕಡಿಮೆ ಬರುತ್ತೆ, ರುಚಿನೂ ಜಾಸ್ತಿ.

2. ತರಕಾರಿ ಕಾಯೋ ಜೋಳದ ಕಾವಲು: ಪ್ರತಿ ಎರಡು ಮುಖ್ಯ ತರಕಾರಿ ಗಿಡಗಳ ಮಧ್ಯೆ ಗೋವಿನ ಜೋಳ (ಮುಸುಕಿನ ಜೋಳ) ಬೀಜ ಊರಬೇಕು. ಇದು ಎತ್ತರಕ್ಕೆ ದಷ್ಟಪುಷ್ಟವಾಗಿ ಬೆಳೆಯುತ್ತೆ.

ಇದರ ಮೇಲೆ ಹಕ್ಕಿಗಳು ಬಂದು ಕೂರುತ್ತವೆ. ಗಿಡಕ್ಕೆ ಗೇಣು ಹುಳ (Semi-looper) ಬಿದ್ದರೆ ಆ ಹಕ್ಕಿಗಳು ಅವುಗಳನ್ನು ಕಬಳಿಸಿ ನಮಗೆ ಪುಕ್ಕಟ್ಟೆ ಕಾವಲುಗಾರರಾಗ್ತವೆ! ನಾವೇನು ಕೃತಕವಾಗಿ ಕಾವಲು ಕಂಬ ನೆಡೋ ಕೆಲಸ ಇಲ್ಲ.

3. ಪುಕ್ಕಟ್ಟೆ ಗೊಬ್ಬರ ಕೊಡೋ ಅಲಸಂದಿ: ಮುಸುಕಿನ ಜೋಳ ಊರುವಾಗಲೇ ಅದರ ಪಕ್ಕ ಒಂದೆರಡು ಅಲಸಂದಿ ಬೀಜ ಹಾಕಬೇಕು. ಅಲಸಂದಿ ಬಳ್ಳಿ ಜೋಳದ ಗಿಡವನ್ನು ಸುತ್ತಿಕೊಂಡು ಮೇಲೇರುತ್ತೆ.

ಇದರ ಬೇರಿನಲ್ಲಿ ಗಂಟುಗಳಿರುತ್ತವೆ. ಇವು ಗಾಳಿಯಲ್ಲಿರೋ ಸಾರಜನಕವನ್ನು (Urea) ಹೀರಿ ಮಣ್ಣಿಗೆ ಸೇರಿಸುತ್ತವೆ. ನಮ್ಮ ತರಕಾರಿ ಗಿಡಗಳಿಗೆ ಪುಕ್ಕಟ್ಟೆ ಯೂರಿಯಾ ಗೊಬ್ಬರ ಸಿಕ್ತು ನೋಡಿ!

4. ರೋಗ ಓಡಿಸೋ ‘ಚಂಡು ಹೂವು’: ನಮ್ಮ ತರಕಾರಿ ಗಿಡಗಳಿಗೆ ದೊಡ್ಡ ಶತ್ರು ಅಂದ್ರೆ ನಿಮ್ಯಾಟೋಡ್ಸ್ (ಬೇರು ಗಂಟು ರೋಗ). ಗಿಡ ಇದ್ದಕ್ಕಿದ್ದಂತೆ ಸೊರಗಿ, ಎಲೆ ಸಣ್ಣದಾಗಿ, ಬೆಂಡೆ, ಟೊಮೆಟೊ ಕಾಯಿಗಳು ಗುಳ್ಳೆ ಗುಳ್ಳೆಯಾಗಿ ಸಣ್ಣದಾಗಿ ಬಿಡುತ್ತವೆ. ಇದಕ್ಕೆ ಯಾವ ಅಂಗಡಿಯಲ್ಲೂ ಸರಿಯಾದ ಮದ್ದಿಲ್ಲ.

ಆದ್ರೆ ನಮ್ಮ ಹತ್ತಿರ ನೈಸರ್ಗಿಕ ಮದ್ದಿದೆ! ಅದೇ ‘ಚಿಂತಾಮಣಿ ಚಂಡು ಹೂವು’ (Marigold). ತರಕಾರಿ ಗಿಡಗಳ ಮಧ್ಯೆ ಅಲ್ಲಲ್ಲಿ ತ್ರಿಕೋನಾಕಾರದಲ್ಲಿ ಈ ಚಂಡು ಹೂವಿನ ಗಿಡ ನೆಡಬೇಕು. ಇದರ ಬೇರಿನಿಂದ ಬರುವ ಆಲ್ಕಲಾಯ್ಡ್ ರಾಸಾಯನಿಕ ವಾಸನೆಗೆ ಬೇರು ಗಂಟು ರೋಗದ ಹುಳುಗಳು ನಾಶವಾಗುತ್ತವೆ.

ಜೊತೆಗೆ ಇದರ ಹೂವಿನ ಆಕರ್ಷಣೆಗೆ ಜೇನುನೊಣಗಳು ಬಂದು ಪರಾಗಸ್ಪರ್ಶ ಹೆಚ್ಚಾಗಿ ಇಳುವರಿ ದುಪ್ಪಟ್ಟಾಗುತ್ತೆ. ಮಿತ್ರ ಕೀಟಗಳು ಬಂದು ಸೇರಿಕೊಳ್ಳುತ್ತವೆ. ಅಯ್ಯಪ್ಪನ ಮಾಲೆಗೆ, ಪೂಜೆಗೆ ಹೂವು ಮಾರಿ ಎಕ್ಸ್ಟ್ರಾ ಕಾಸು ಕೂಡ ಕಿಸೆಗೆ ಇಳಿಸಬಹುದು!

5. ಬದುವಿನ ಅಂಚಲ್ಲಿ ಗೆಡ್ಡೆ ಬೆಳೆ: ಇನ್ನು ನಾವು ಮಾಡಿದ ಬದುವಿನ ಎರಡು ಅಂಚಿನಲ್ಲಿ (Border) ಗೆಡ್ಡೆ ಬೆಳೆಗಳನ್ನು ಹಾಕಬೇಕು.

ಮೂಲಂಗಿ
ಕ್ಯಾರೆಟ್
ಬೀಟ್ರೂಟ್
ಈರುಳ್ಳಿ, ಬೆಳ್ಳುಳ್ಳಿ
ಅಥವಾ ಕಡಲೆಕಾಯಿ (ಶೇಂಗಾ)

ಇದರಿಂದ ಮಣ್ಣು ಗಟ್ಟಿಯಾಗಿ ಹಿಡಿದುಕೊಳ್ಳುತ್ತೆ. ಎಷ್ಟೇ ದೊಡ್ಡ ಮಳೆ ಬಂದ್ರು, ನೀರು ಹಾಯಿಸಿದ್ರು ಬದುವಿನ ಮಣ್ಣು ಕಾಲುವೆಗೆ ಕುಸಿದು ಬೀಳಲ್ಲ. ಕಳೆ ಕೀಳುವ ಸಮಸ್ಯೆಯೂ ಇರಲ್ಲ. ಬೇರೆ ಬೇರೆ ಬೆಳೆಗಳು ಮಣ್ಣಿನ ಆಮ್ಲ ಮತ್ತು ಕ್ಷಾರ ಗುಣವನ್ನು ಸಮತೋಲನದಲ್ಲಿ ಇಡುತ್ತವೆ.

ಇದನ್ನೂ ಓದಿ: ನಿಮ್ಮ ಮನೇಲಿ ಈ ಪಾತ್ರೆ ಬಳಸ್ತೀರಾ ಇದ್ರೆ.. ಮೊದಲು ಬಿಸಾಕಿ ಆರೋಗ್ಯದ ಅಸಲಿ ಗುಟ್ಟು ಇಲ್ಲಿದೆ.

ನಾಟಿ ಮಾಡುವ ನಾಟಿ ಸ್ಟೈಲ್

ಈ ತರಕಾರಿಗಳನ್ನು ನೆಡುವಾಗ ನಾವು ಹಳ್ಳಿಯ ಕೆಲವು ನಿಯಮಗಳನ್ನು ಪಾಲಿಸಲೇಬೇಕು:

ಭೂಮಿ ಉಳುಮೆ ಮಾಡುವಾಗಲೇ ಕೊನೆಯ ಹಂತದಲ್ಲಿ ಎಕರೆಗೆ 200 ರಿಂದ 400 ಕೆಜಿ ‘ಘನ ಜೀವಾಮೃತ’ವನ್ನು ಮಣ್ಣಿನ ಮೇಲೆ ಎರಚಿ ಮಡಿಕೆ ಹೊಡೆಯಬೇಕು (ಉಳುಮೆ ಮಾಡಬೇಕು).
ಕಾಲುವೆ ಮಾಡಿ, ಬೀಜ ಅಥವಾ ಸಸಿ ನೆಡುವ ಹಿಂದಿನ ದಿನ ಕಾಲುವೆಯಲ್ಲಿ ಅರ್ಧದಷ್ಟು ಮಾತ್ರ ನೀರು ಬರುವ ಹಾಗೆ ಹಾಯಿಸಬೇಕು.
ಯಾವುದೇ ಬೀಜ ಅಥವಾ ಸಸಿಯನ್ನು ಕಡ್ಡಾಯವಾಗಿ ‘ಬೀಜಾಮೃತ’ದಲ್ಲಿ ನೆನೆಸಿ, ಸಂಸ್ಕರಣೆ ಮಾಡಿಯೇ ನಾಟಿ ಮಾಡಬೇಕು.
ಬದುವಿನಲ್ಲಿ ಗಿಡ ನೆಡುವ ಜಾಗದಲ್ಲಿ ಸ್ವಲ್ಪ ಮಣ್ಣು ತೆಗೆದು, ಅಲ್ಲಿಗೆ ಒಂದು ಹಿಡಿ ಘನ ಜೀವಾಮೃತ ಹಾಕಿ ಮಣ್ಣಿಗೆ ಬೆರೆಸಬೇಕು.
ಆಮೇಲೆ ಬೀಜ ಅಥವಾ ಸಸಿ ನೆಟ್ಟು ಮಣ್ಣು ಮುಚ್ಚಬೇಕು. ಗಾಳಿ ಒಳಹೋಗದಂತೆ ಭದ್ರ ಮಾಡಬೇಕು. ತದನಂತರ ತೆಳ್ಳಗೆ ದ್ರವ ಜೀವಾಮೃತ ಕೊಟ್ಟುಕೊಂಡು ಹೋಗಬೇಕು.

ಭೂತಾಯಿ ಯಾವತ್ತೂ ತನ್ನ ಮಕ್ಕಳ ಕೈಬಿಡಲ್ಲ

ನೋಡಿದ್ರಲ್ಲಾ ರೈತರಣ್ಣಂದಿರೆ, ಈ ನೈಸರ್ಗಿಕ ಕೃಷಿ ಅಂದ್ರೆ ಸುಮ್ನೆ ಆಟದ ಮಾತಲ್ಲ. ಪ್ರಕೃತಿಯ ಜೊತೆಗೇ ನಡೆಯುವ ಇದೊಂದು ದೊಡ್ಡ ವಿಜ್ಞಾನ ಕಣ್ರೀ! ಬರೀ ಒಂದೇ ಬೆಳೆ ಹಾಕಿ, ಮಾರುಕಟ್ಟೆಯಲ್ಲಿ ರೇಟ್ ಪಾತಾಳಕ್ಕೆ ಬಿದ್ದಾಗ ತಲೆ ಮೇಲೆ ಕೈ ಹೊತ್ತು ಕೂರೋ ಬದಲು, ಹಿಂಗೆ ಜಾಣ್ಮೆಯಿಂದ ‘ಮಿಶ್ರಬೆಳೆ’ ಮಾಡಬೇಕು.

ಒಂದೇ ಹೊಲದಲ್ಲಿ ತರಕಾರಿ, ಅದರ ಪಕ್ಕ ಚಂಡು ಹೂವು, ನಡುವೆ ಮುಸುಕಿನ ಜೋಳ, ಬದುವಿನ ಮೇಲೆ ಗೆಡ್ಡೆ-ಗೆಣಸು… ಹಿಂಗೆಲ್ಲಾ ಬೆಳೆದರೆ ನಮಗೆ ನಾಲ್ಕೂ ಕಡೆಯಿಂದ ಕಾಸು ಬಂದೇ ಬರುತ್ತೆ.ಇದರಿಂದ ನಮಗೆ ಏನೆಲ್ಲಾ ಲಾಭ ಅಂತೀರಾ?

ಟೊಮೆಟೊ ರೇಟ್ ಕಮ್ಮಿ ಆದ್ರೆ, ಪೂಜೆಗೆ ಮಾರೋ ಚಂಡು ಹೂವು ನಮ್ಮ ಕೈ ಹಿಡಿಯುತ್ತೆ.
ರೋಗ-ರುಜಿನ, ಹುಳ-ಉಪ್ಪಟೆಗಳು ನಮ್ಮ ತೋಟದ ಕಾಂಪೌಂಡ್ ಕೂಡ ಹತ್ತಲ್ಲ!
ಪುಕ್ಕಟ್ಟೆ ಗೊಬ್ಬರ, ಉಚಿತ ಕಾವಲುಗಾರರು ಸಿಕ್ಕಂಗೆ ಆಗುತ್ತೆ.

ಯಾವ ಕೆಮಿಕಲ್ ಇಲ್ಲದೆ, ಶುದ್ಧವಾಗಿ ಬೆಳೆದ ಈ ತರಕಾರಿಗಳಿಗೆ ರುಚಿನೂ ಜಾಸ್ತಿ, ಮಾರ್ಕೆಟ್‌ನಲ್ಲಿ ಬೇಡಿಕೆನೂ ಜಾಸ್ತಿ. ತಿನ್ನೋ ಜನರಿಗೂ ಒಳ್ಳೇ ಆರೋಗ್ಯ, ನಮ್ಮ ಭೂಮಿಗೂ ಒಳ್ಳೇ ಆಯಸ್ಸು.

ಅದಕ್ಕೆ ಹೇಳೋದು, ಮುಂದಿನ ಸಾರಿ ನಿಮ್ಮ ಹೊಲದಲ್ಲಿ ತರಕಾರಿ ಹಾಕುವಾಗ ಖಂಡಿತಾ ಇದೇ ಪದ್ಧತಿ ಫಾಲೋ ಮಾಡಿ ನೋಡಿ.ನಮ್ಮನ್ನ ಸಾಕೋ ಭೂತಾಯಿನ, ಮಣ್ಣಲ್ಲಿ ಮಣ್ಣಾಗಿ ನಮಗಾಗಿ ದುಡಿಯೋ ಎರೆಹುಳುವನ್ನ ನಂಬಿ ಕೃಷಿ ಮಾಡಿದ್ರೆ, ಆ ತಾಯಿ ಯಾವತ್ತೂ ನಮಗೆ ಮೋಸ ಮಾಡಲ್ಲ.