ಉರಿ ಬಿಸಿಲಿಗೆ ಆಯುರ್ವೇದದ ತಂಪು: ನಮ್ಮ ಹಳ್ಳಿ ಮನೆಮದ್ದುಗಳಿಂದ ಬೇಸಿಗೆಯ ಆರೋಗ್ಯ ರಕ್ಷಣೆ!

ನಮಸ್ಕಾರ ರೈತ ಬಾಂಧವರೇ ಹಾಗೂ ಆತ್ಮೀಯ ಓದುಗರೇ, ಹೇಗಿದ್ದೀರಾ?ನಮ್ಮೂರ ಕಡೆ ಬಿಸಿಲು ಹೆಂಗೈತೆ? ಸುಮ್ನೆ ನೆತ್ತಿ ಸುಡ್ತಾ ಐತೆ ಅಲ್ವಾ?ಕೂತ್ರೂ ನಿಂತ್ರೂ ಬೆವರೇ ಬೆವರು. ಉಸ್ಸಪ್ಪಾ ಅನ್ನೋ ಅಷ್ಟು ಸೆಕೆ ಶುರುವಾಗಿದೆ.

ಆದರೆ ಬಿಸಿಲು ಎಷ್ಟೇ ಇರಲಿ, ನಮ್ಮ ಹಳ್ಳಿಯ ಜನ ಮನೇಲಿ ಕೂರೋಕೆ ಆಗುತ್ತಾ?ಹೊಲದ ಕೆಲಸ, ತೋಟದ ಕೆಲಸ ಮಾಡ್ಲೇಬೇಕು. ದುಡಿಮೆ ನಿಲ್ಲಿಸೋಕೆ ಆಗಲ್ಲ.ಆದರೆ ಈ ಉರಿ ಬಿಸಿಲಿನಿಂದ ನಮ್ಮ ಆರೋಗ್ಯ ಕಾಪಾಡಿಕೊಳ್ಳೋದು ಬಹಳ ಮುಖ್ಯ.

ನಮ್ಮ ಆಯುರ್ವೇದ ತಜ್ಞರಾದ ಡಾಕ್ಟರ್ ರಾಘವೇಂದ್ರ ಅವರು ಈ ಬೇಸಿಗೆಗೆ ತಕ್ಕಂತಹ ಭರ್ಜರಿ ಹಳ್ಳಿ ಮನೆಮದ್ದುಗಳನ್ನ ತಿಳಿಸಿದ್ದಾರೆ.ನಿಮ್ಮ ಆರೋಗ್ಯವನ್ನು ನೈಸರ್ಗಿಕವಾಗಿ ಕಾಪಾಡಿಕೊಳ್ಳಲು ಇದೊಂದು ಸುವರ್ಣ ಅವಕಾಶ! ಬನ್ನಿ, ಆ ಸುಲಭವಾದ ಟಿಪ್ಸ್ ಏನು ಅಂತ ಒಂದೊಂದಾಗಿ ನೋಡೋಣ. ಈ ಮಾಹಿತಿಯನ್ನು ಪೂರ್ತಿಯಾಗಿ ಓದಿ.

ಬಿಸಿಲಿಗೆ ಮೈಯೆಲ್ಲಾ ಒಣಗುತ್ತಾ? (Dehydration)

ಬೇಸಿಗೆ ಕಾಲ ಬಂತು ಅಂದರೆ ಸಾಕು, ನಮ್ಮ ದೇಹದಲ್ಲಿರುವ ನೀರಿನ ಅಂಶವೆಲ್ಲಾ ಬೆವರಿನ ರೂಪದಲ್ಲಿ ಆವಿಯಾಗುತ್ತದೆ.ಆಯುರ್ವೇದದಲ್ಲಿ ಇದನ್ನ ‘ಆದಾನ ಕಾಲ’ ಅಂತ ಕರೀತಾರೆ. ಅಂದರೆ ಸೂರ್ಯ ಭೂಮಿಯ ಮೇಲಿರುವ ಶಕ್ತಿಯನ್ನೆಲ್ಲಾ ಹೀರಿಕೊಳ್ಳುವ ಸಮಯ.

ಬಿಸಿಲಿಗೆ ಹೋದಾಗ ನಮಗೆ ಪದೇ ಪದೇ ಬಾಯಾರಿಕೆ ಆಗುತ್ತದೆ.
ಮೈಯಲ್ಲಿ ತ್ರಾಣ ಇಲ್ಲದಂತೆ ಸುಸ್ತು ಆವರಿಸುತ್ತದೆ.
ಇದಕ್ಕೆಲ್ಲಾ ಕಾರಣ ನಮ್ಮ ದೇಹದಲ್ಲಿ ನೀರಿನ ಅಂಶ (Dehydration) ಕಡಿಮೆಯಾಗುವುದು.

ದೇವಲೋಕದ ಅಮೃತ ನಮ್ಮೂರ ಮಜ್ಜಿಗೆ!

ಬೇಸಿಗೆ ಬಂತು ಅಂದ್ರೆ ಸಾಕು, ನಾವೆಲ್ಲಾ ಫ್ರಿಡ್ಜ್ ನೀರು, ತಂಪು ಪಾನೀಯ ಕುಡಿಯೋಕೆ ಹೋಗ್ತೀವಿ.ಆದರೆ ದಯವಿಟ್ಟು ಹಾಗೆ ಮಾಡಬೇಡಿ. ಇದೆಲ್ಲಾ ನಮ್ಮ ಹೊಟ್ಟೆಯ ಜೀರ್ಣಶಕ್ತಿಯನ್ನ (ಅಗ್ನಿಮಾಂದ್ಯ) ಸಂಪೂರ್ಣವಾಗಿ ಹಾಳು ಮಾಡುತ್ತೆ ಬೇಸಿಗೆಗೆ ಅಸಲಿಯಾದ ಅಮೃತ ಅಂದ್ರೆ ಅದು ನಮ್ಮ ಮಜ್ಜಿಗೆ. ಆದ್ರೆ ಮಜ್ಜಿಗೆ ಮಾಡೋಕು ಒಂದು ಲೆಕ್ಕ ಐತೆ!

ಮೊದಲು ಗಟ್ಟಿಯಾದ ಹಸುವಿನ ಹಾಲಿನಿಂದ ಮೊಸರು ಮಾಡಿ.
ಒಂದು ಪಾಲು ಮೊಸರಿಗೆ, ಕನಿಷ್ಠ 3 ರಿಂದ 4 ಪಾಲು ನೀರು ಸೇರಿಸಿ ಕಡೆಯಬೇಕು.
ಕಡಗೋಲಿನಲ್ಲಿ ಕಡೆದು ಬೆಣ್ಣೆ ತೆಗೆದ ಮಜ್ಜಿಗೆ ಆರೋಗ್ಯಕ್ಕೆ ಅತ್ಯುತ್ತಮ.
ನೆನಪಿರಲಿ: ಇದಕ್ಕೆ ಹಸಿಮೆಣಸಿನಕಾಯಿ ಅಥವಾ ಸಮುದ್ರದ ಉಪ್ಪು ಹಾಕಲೇಬಾರದು!
ಕೇವಲ ಕಾಳುಮೆಣಸಿನ ಪುಡಿ ಮತ್ತು ಸೈಂಧವ ಲವಣ (Rock Salt) ಮಾತ್ರ ಹಾಕಿ ಕುಡಿಯಬೇಕು.

ಇದನ್ನ ಕುಡಿದರೆ ಹೊಟ್ಟೆ ತಂಪಾಗುತ್ತೆ. ಪಿತ್ತ ಕೂಡ ನೆತ್ತಿಗೇರೋದಿಲ್ಲ. ತಿಂದ ಆಹಾರ ಚೆನ್ನಾಗಿ ಜೀರ್ಣವಾಗುತ್ತದೆ.

ಇದನ್ನೂ ಓದಿ: ಬರೀ 50 ಸಾವಿರದಲ್ಲಿ ಲೈಫ್‌ಟೈಮ್ ಫ್ರೀ ಗ್ಯಾಸ್! ಲಕ್ಷ ಲಕ್ಷ ಆದಾಯ ತರುವ ‘ಸರಣಿ ಗೋಬರ್ ಗ್ಯಾಸ್’ ಮತ್ತು ರೈತನ ಜುಗಾಡ್ ನೀರಾವರಿ!

ಹೊಲದಲ್ಲಿ ದುಡಿಯುವಾಗ ಸುಸ್ತಾದರೆ ಇಲ್ಲಿದೆ ಎನರ್ಜಿ ಡ್ರಿಂಕ್

ಬಿಸಿಲಲ್ಲಿ ಓಡಾಡಿ ಮೈಯಲ್ಲಿರೋ ನೀರೆಲ್ಲಾ ಬೆವರಾಗಿ ಹೋಗಿರುತ್ತೆ. ಇದಕ್ಕೆ ಅಂಗಡಿಯಿಂದ ದುಡ್ಡು ಕೊಟ್ಟು ORS ತರುವ ಬದಲು, ನಮ್ಮನೇಲೇ ಅತ್ಯುತ್ತಮ ಎನರ್ಜಿ ಡ್ರಿಂಕ್ ಮಾಡಬಹುದು:

ಎರಡು ಲೋಟ (ಸುಮಾರು 400 ml) ಶುದ್ಧವಾದ ನೀರು ತಗೊಳ್ಳಿ.
ಅದಕ್ಕೆ 2 ಚಮಚ ಕಲ್ಲು ಸಕ್ಕರೆ ಹಾಕಿ.
ಜೊತೆಗೆ ಒಂದು ಅರ್ಧ ಚಮಚ ಸೈಂಧವ ಲವಣ (Rock salt) ಹಾಕಿ ಕರಗಿಸಿ.

ಇದನ್ನ ಕುಡಿದರೆ ತಕ್ಷಣ ಸುಸ್ತು ಕಡಿಮೆಯಾಗಿ ಮೈಗೆ ಆನೆ ಬಲ ಬರುತ್ತದೆ. ಇದು ದೇಹದ ಎಲೆಕ್ಟ್ರೋಲೈಟ್ ಬ್ಯಾಲೆನ್ಸ್ ಕಾಪಾಡುತ್ತದೆ.

ಎದೆ ಉರಿ, ಗ್ಯಾಸ್ಟ್ರಿಕ್‌ಗೆ ನಮ್ಮನೆ ಅಡುಗೆಮನೆಯೇ ಆಸ್ಪತ್ರೆ

ಹೊಲದಲ್ಲಿ, ಫೀಲ್ಡಲ್ಲಿ ಕೆಲಸ ಮಾಡುವಾಗ ಟೈಮಿಗೆ ಸರಿಯಾಗಿ ಊಟ ಮಾಡೋಕೆ ಆಗಲ್ಲ.ಇದರಿಂದ ವಿಪರೀತ ಎದೆ ಉರಿ, ಗ್ಯಾಸ್ಟ್ರಿಕ್ ಶುರುವಾಗುತ್ತೆ. ಹುಳಿ ತೇಗು ಬರುತ್ತದೆ. ಇದಕ್ಕೆ ಆಸ್ಪತ್ರೆಗೆ ಹೋಗಿ ಸಾವಿರಾರು ರೂಪಾಯಿ ಖರ್ಚು ಮಾಡೋ ಬದಲು ಈ ಸಿಂಪಲ್ ಟ್ರಿಕ್ ಮಾಡಿ:

ಬೆಳಿಗ್ಗೆ ಎದ್ದ ತಕ್ಷಣ ಹಲ್ಲುಜ್ಜಿ ಒಂದು ಲೋಟ ನೀರು ತಗೊಳ್ಳಿ.
ಅದಕ್ಕೆ ಮೂರ್ನಾಲ್ಕು ಚಿಟಿಕೆ ಸೈಂಧವ ಲವಣ (Rock Salt) ಹಾಕಿ.
ಜೊತೆಗೆ ಒಂದು 5-6 ಪುದೀನಾ ಎಲೆಗಳನ್ನ (ಅಥವಾ ಸ್ವಲ್ಪ ಮೂಲಂಗಿ) ಬಾಯಿಗೆ ಹಾಕಿಕೊಂಡು ಚೆನ್ನಾಗಿ ಅಗಿದು ತಿನ್ನಿ.
ಆಮೇಲೆ ಆ ಉಪ್ಪಿನ ನೀರು ಕುಡಿಯಿರಿ.

ಇದನ್ನ ದಿನಾ ಮಾಡಿದ್ರೆ ಗ್ಯಾಸ್ಟ್ರಿಕ್ ಓಡಿ ಹೋಗುತ್ತೆ. ಆದ್ರೆ ಅಣ್ಣಾ, ಬೆಳಿಗ್ಗೆ ಖಾಲಿ ಹೊಟ್ಟೇಲಿ ಕುಡಿಯೋ ಟೀ, ಕಾಫಿನ ದಯವಿಟ್ಟು ಬಿಡಬೇಕು!

ಇದನ್ನೂ ಓದಿ: ಕಬ್ಬು ಬೆಳೆದು ಎಕರೆಗೆ 100 ಟನ್ ಇಳುವರಿ ತೆಗೆಯೋದು ಹೆಂಗೆ? ಇಲ್ಲಿದೆ ನೋಡ್ರಿ ಕೃಷಿ ವಿಜ್ಞಾನಿಗಳ ಅಸಲಿ ಗುಟ್ಟು!

ಉರಿ ಬಿಸಿಲಿನ ಬೆವರುಸಾಲೆ ಹಾಗೂ ಮೈ ತುರಿಕೆಗೆ ಇಲ್ಲಿದೆ ಪಕ್ಕಾ ಹಳ್ಳಿ ಮದ್ದು!

ಬೇಸಿಗೆ ಬಂತು ಅಂದ್ರೆ ಸಾಕು, ಮೈಯೆಲ್ಲಾ ಬೆವರಿ ಸಣ್ಣ ಸಣ್ಣ ಗುಳ್ಳೆಗಳು ಏಳೋದು ಮಾಮೂಲಿ ಅಲ್ವಾ?ಕೆಲವರಿಗಂತೂ ಬಿಸಿಲಿನ ಝಳಕ್ಕೆ ಚರ್ಮ ವಿಪರೀತ ಒಣಗಿ, ಸಿಕ್ಕಾಪಟ್ಟೆ ತುರಿಕೆ ಶುರುವಾಗುತ್ತೆ.ಇದಕ್ಕೆಲ್ಲಾ ಮೆಡಿಕಲ್ ಶಾಪ್‌ಗೆ ಹೋಗಿ ಕ್ರೀಮ್ ತರೋ ಬದಲು, ನಮ್ಮನೇಲೇ ಇರೋ ಈ ಸುಲಭವಾದ ಹಳ್ಳಿಮದ್ದುಗಳನ್ನೊಮ್ಮೆ ಟ್ರೈ ಮಾಡಿ ನೋಡಿ:

ಹೆಸರುಬೇಳೆ ಪುಡಿ: ಸ್ವಲ್ಪ ಹೆಸರುಬೇಳೆ ಪುಡಿಯನ್ನು ತೆಗೆದುಕೊಂಡು, ಅದಕ್ಕೆ ಗಟ್ಟಿ ಮೊಸರು ಕಲಸಿ ಮೈಗೆಲ್ಲಾ ಹಚ್ಚಿಕೊಳ್ಳಿ. ಸ್ವಲ್ಪ ಹೊತ್ತು ಬಿಟ್ಟು ಸ್ನಾನ ಮಾಡಿದ್ರೆ ಬೆವರುಸಾಲೆ ಓಡಿ ಹೋಗುತ್ತೆ.
ಲೋಳೆಸರ (ಅಲೋವೆರಾ): ನಮ್ಮನೆ ಅಂಗಳದಲ್ಲಿ ಬೆಳೆದಿರೋ ಲೋಳೆಸರದ ರಸ (ಜೆಲ್) ತೆಗೆದು ನೇರವಾಗಿ ಚರ್ಮಕ್ಕೆ ಹಚ್ಚಿಕೊಳ್ಳಿ. ಇದು ಮೈಗೆ ತಂಪು ಕೊಡುವುದರ ಜೊತೆಗೆ ತುರಿಕೆಯನ್ನೂ ಕಡಿಮೆ ಮಾಡುತ್ತದೆ.
ವಾರಕ್ಕೊಮ್ಮೆ ಎಣ್ಣೆ ಸ್ನಾನ: ವಾರದಲ್ಲಿ ಒಂದ್ಸಲ ಶುದ್ಧವಾದ ಕೊಬ್ಬರಿ ಎಣ್ಣೆ ಅಥವಾ ಎಳ್ಳೆಣ್ಣೆಯನ್ನು ಇಡೀ ಮೈಗೆ ಹಚ್ಚಿ ಚೆನ್ನಾಗಿ ತಿಕ್ಕಿ ಸ್ನಾನ (ಅಭ್ಯಂಗ) ಮಾಡಿ. ಇದರಿಂದ ಬೇಸಿಗೆಯಲ್ಲೂ ಚರ್ಮ ಒಣಗುವುದಿಲ್ಲ.

ಹಿಮ್ಮಡಿ ನೋವಿಗೆ (ವಾತಕಂಟಕ) ಅದ್ಭುತ ಹಳ್ಳಿಮದ್ದು

ಬೆಳಿಗ್ಗೆ ಎದ್ದ ತಕ್ಷಣ ನೆಲದ ಮೇಲೆ ಕಾಲಿಟ್ಟರೆ ಸಾಕು, ಹಿಮ್ಮಡಿ ಚುಚ್ಚಿದ ಹಾಗೆ ವಿಪರೀತ ನೋವಾಗುತ್ತಾ?ಸ್ವಲ್ಪ ಹೊತ್ತು ನಡೆದ ಮೇಲೆ ಆ ನೋವು ಕಡಿಮೆಯಾಗುತ್ತಾ? ಇದಕ್ಕೆ ಆಯುರ್ವೇದದಲ್ಲಿ ‘ವಾತಕಂಟಕ’ ಅಂತಾರೆ. ಮೂಳೆಯಲ್ಲಿ ಚಿಕ್ಕ ಮುಳ್ಳಿನ ತರಹ ಬೆಳೆದಿರುತ್ತದೆ. ಇದಕ್ಕೆ ಆಪರೇಷನ್ ಇಲ್ಲದೆ ಮನೇಲೆ ಸರಿ ಮಾಡಬಹುದು:

ಮೊದಲು ಹಿಮ್ಮಡಿಗೆ ಸ್ವಲ್ಪ ಬಿಸಿ ಮಾಡಿದ ಹರಳೆಣ್ಣೆ (Castor oil) ಹಚ್ಚಿ ಚೆನ್ನಾಗಿ ತಿಕ್ಕಿ.
ಒಂದು ಮಣ್ಣಿನ ಇಟ್ಟಿಗೆಯನ್ನು (ಅಥವಾ ಹಂಚು) ಒಲೆಯ ಮೇಲೆ ಇಟ್ಟು ಬಿಸಿ ಮಾಡಿ.
ಸ್ವಲ್ಪ ಹುಳಿ ಗಂಜಿ ಅಥವಾ ನಿಂಬೆರಸ ಹಿಂಡಿದ ನೀರಿನಲ್ಲಿ ಒಂದು ದಪ್ಪನೆಯ ಬಟ್ಟೆಯನ್ನು ಅದ್ದಿ ಹಿಂಡಿಕೊಳ್ಳಿ.
ಆ ಬಟ್ಟೆಯನ್ನು ಬಿಸಿ ಇಟ್ಟಿಗೆ ಮೇಲೆ ಇಟ್ಟು, ಅದರ ಮೇಲೆ ನಿಮ್ಮ ಹಿಮ್ಮಡಿ ಇಟ್ಟು ಶಾಖ (ಸ್ವೇದ) ತಗೊಳ್ಳಿ.

ಹೀಗೆ ಒಂದು ವಾರದಿಂದ 15 ದಿನ ಮಾಡಿದರೆ, ಎಷ್ಟೇ ಹಳೆಯ ಹಿಮ್ಮಡಿ ನೋವಾದರೂ ಮಾಯವಾಗುತ್ತದೆ!

ಬೇಸಿಗೆಯಲ್ಲಿ ಯಾವ ತರಕಾರಿ ತಿನ್ನಬೇಕು?

ಆಯುರ್ವೇದದ ಪ್ರಕಾರ ಬೇಸಿಗೆಯಲ್ಲಿ ನಮ್ಮ ಹೊಟ್ಟೆಗೆ ತಂಪಾಗುವ (ಶೀತಲ), ಸಿಹಿಯಾದ (ಮಧುರ) ಮತ್ತು ಜಿಡ್ಡಿನಂಶವಿರುವ (ಸ್ನಿಗ್ಧ) ಆಹಾರವನ್ನು ಮಾತ್ರ ಸೇವಿಸಬೇಕು.

ಬೂದುಗುಂಬಳಕಾಯಿ: ಇದು ದೇಹಕ್ಕೆ ಅತ್ಯಂತ ತಂಪು ಮತ್ತು ಅದ್ಭುತವಾದ ಆಂಟಿ-ಆಕ್ಸಿಡೆಂಟ್. ನಿಯಮಿತವಾಗಿ ಬಳಸಿದರೆ ಇದರ ಲಾಭ ನಿಮಗೇ ತಿಳಿಯುತ್ತದೆ.
ಹೀರೆಕಾಯಿ ಮತ್ತು ಸೋರೆಕಾಯಿ: ಹೊಟ್ಟೆಯ ಸಮಸ್ಯೆ, ಅಲ್ಸರ್ ಮತ್ತು ಪೈಲ್ಸ್ (ಮೂಲವ್ಯಾಧಿ) ಇರುವವರಿಗೆ ಇದು ಹೇಳಿ ಮಾಡಿಸಿದ ತರಕಾರಿಗಳು.
ದಾಳಿಂಬೆ ಹಣ್ಣು: ಇದು ಹೃದಯಕ್ಕೆ ಬಹಳ ಒಳ್ಳೆಯದು. ದಿನಾ ದಾಳಿಂಬೆ ತಿಂದರೆ ಸುಸ್ತು ಇರುವುದಿಲ್ಲ. ರಕ್ತನಾಳಗಳ ಬ್ಲಾಕೇಜ್ ಕೂಡ ನಿವಾರಣೆಯಾಗುತ್ತದೆ.
ಮಾವಿನಹಣ್ಣು: ಹಣ್ಣಿನ ರಾಜ ಮಾವಿನಹಣ್ಣನ್ನು ತಿನ್ನಿ, ಆದರೆ ಮಿತವಾಗಿರಲಿ. ದಿನಕ್ಕೆ 10 ಹಣ್ಣು ತಿಂದರೆ ಕಫ ಮತ್ತು ಮಧುಮೇಹದ ಸಮಸ್ಯೆ ಬರಬಹುದು.
ಶುದ್ಧವಾದ ತುಪ್ಪ: ಬೇಸಿಗೆಯಲ್ಲಿ ತುಪ್ಪ ತಿಂದರೆ ದಪ್ಪ ಆಗುವುದಿಲ್ಲ. ಇದು ದೇಹಕ್ಕೆ ಅತ್ಯಂತ ಅವಶ್ಯಕವಾದ ಲ್ಯೂಬ್ರಿಕೆಂಟ್. ದಿನಕ್ಕೆ 3-4 ಚಮಚ ತುಪ್ಪ ಧಾರಾಳವಾಗಿ ತಿನ್ನಿ.

ಇದನ್ನೂ ಓದಿ: ಕಾಯಿಲೆಗಳನ್ನುದವಾಖಾನೆಯಿಂದಲ್ಲಆತ್ಮವಿಶ್ವಾಸದಿಂದ ಓಡಿಸಿ: ಡಾ. ಸಿ.ಎನ್. ಮಂಜುನಾಥ್ ಅವರ ಹಳ್ಳಿ-ಶೈಲಿಯ ಆರೋಗ್ಯ ಸಲಹೆಗಳು

ಬೇಸಿಗೆ ಬಿಸಿಲಲ್ಲಿ ನಾಲಿಗೆ ಚಪಲಕ್ಕೆ ಇವುಗಳನ್ನ ತಿಂದ್ರೆ ಕಷ್ಟ ಕಟ್ಟಿಟ್ಟ ಬುತ್ತಿ!

ಬೇಸಿಗೆ ಬಂತು ಅಂದ್ರೆ ಸಾಕು, ನಾಲಿಗೆಗೆ ಏನಾದ್ರು ಖಾರ ಖಾರವಾಗಿ, ಚಟಪಟ ಅಂತ ತಿನ್ಬೇಕು ಅನ್ನಿಸೋದು ಸಹಜ.ಆದ್ರೆ ಉರಿ ಬಿಸಿಲಲ್ಲಿ ನಾಲಿಗೆ ಚಪಲಕ್ಕೆ ಬಿದ್ದು ಸಿಕ್ಕಾಪಟ್ಟೆ ಖಾರ ತಿಂದ್ರೆ ಹೊಟ್ಟೆಯಲ್ಲಿ ಉರಿ ಶುರುವಾಗುತ್ತೆ.

ಆಯುರ್ವೇದ ವೈದ್ಯರು ಹೇಳುವ ಹಾಗೆ, ಈ ಬೇಸಿಗೆಯಲ್ಲಿ ನಮ್ಮ ಆರೋಗ್ಯ ಕಾಪಾಡಿಕೊಳ್ಳಲು ಈ ಕೆಳಗಿನ ಆಹಾರಗಳಿಂದ ಸ್ವಲ್ಪ ದೂರ ಇರೋದು ಬಹಳ ಮುಖ್ಯ:

- ರಸ್ತೆ ಬದಿಯ ಚಾಟ್ಸ್ ಬೇಡವೇ ಬೇಡ: ಸಂಜೆ ಹೊತ್ತು ರಸ್ತೆ ಬದೀಲಿ ಸಿಗೋ ಪಾನಿಪುರಿ, ಮಸಾಲಾ ಪುರಿಯಂತಹ ಖಾರದ ತಿನಿಸುಗಳನ್ನ ದಯವಿಟ್ಟು ತಿನ್ನಬೇಡಿ. ಇದು ಹೊಟ್ಟೆಯಲ್ಲಿ ಪಿತ್ತವನ್ನು ವಿಪರೀತವಾಗಿ ಏರಿಸುತ್ತದೆ.
- ಹುಳಿ, ಖಾರ, ಉಪ್ಪು ಕಡಿಮೆ ಮಾಡಿ: ಅತಿಯಾದ ಹುಳಿ ಮತ್ತು ಉಪ್ಪಿನ ಪದಾರ್ಥಗಳು ಬೇಸಿಗೆಯಲ್ಲಿ ಮೈ ಉಷ್ಣವನ್ನು ಹೆಚ್ಚು ಮಾಡುತ್ತವೆ.
- ಹುರುಳಿಕಾಳು ಸಾರಿಗೆ ಬ್ರೇಕ್ ಹಾಕಿ: ಚಳಿಗಾಲಕ್ಕೆ ಸೈ ಅನ್ನಿಸೋ ಹುರುಳಿಕಾಳಿನ ಸಾರು ಈ ಬೇಸಿಗೆಗೆ ಸ್ವಲ್ಪವೂ ಸೂಕ್ತವಲ್ಲ. ಇದು ನಮ್ಮ ದೇಹದಲ್ಲಿರುವ ನೀರಿನಂಶವನ್ನು ಹೀರಿ ಸಂಪೂರ್ಣವಾಗಿ ಒಣಗಿಸುತ್ತದೆ (ಡ್ರೈ ಮಾಡುತ್ತದೆ).
- ಮಾಮೂಲಿ ಉಪ್ಪಿಗೆ ಗುಡ್ ಬೈ ಹೇಳಿ: ಅಡುಗೆಗೆ ಸಮುದ್ರದ ಉಪ್ಪಿನ (Sea Salt) ಬದಲು, ಕಡ್ಡಾಯವಾಗಿ ಆಯುರ್ವೇದದಲ್ಲಿ ಹೇಳಿರುವ ‘ಸೈಂಧವ ಲವಣ’ (Rock salt ಅಥವಾ ಪಿಂಕ್ ಸಾಲ್ಟ್) ಬಳಸುವುದು ಆರೋಗ್ಯಕ್ಕೆ ಬಹಳ ಉತ್ತಮ.

ಎಳನೀರು ಕುಡಿಯುವ ಸರಿಯಾದ ಸಮಯ

ಎಳನೀರು ಆರೋಗ್ಯಕ್ಕೆ ಬಹಳ ಒಳ್ಳೆಯದು. ಆದರೆ ಕುಡಿಯುವ ಸಮಯ ಸರಿಯಾಗಿರಬೇಕು.

ಬೆಳಿಗ್ಗೆ ಎದ್ದ ತಕ್ಷಣ ಖಾಲಿ ಹೊಟ್ಟೆಯಲ್ಲಿ ಲೀಟರ್ ಗಟ್ಟಲೆ ಎಳನೀರು ಕುಡಿಯಬಾರದು. ಇದರಿಂದ ಜೀರ್ಣಶಕ್ತಿ (ಅಗ್ನಿಮಾಂದ್ಯ) ಕುಂದುತ್ತದೆ.
ಊಟಕ್ಕೆ ಒಂದೂವರೆ ಗಂಟೆ ಮುಂಚೆ ಅಥವಾ ಊಟವಾದ ಒಂದೂವರೆ ಗಂಟೆಯ ನಂತರ ಕುಡಿಯುವುದು ಸೂಕ್ತ.
ಬೆಳಿಗ್ಗೆ 10:30 ರಿಂದ 11:30 ರ ಸುಮಾರಿಗೆ ಕುಡಿಯುವುದು ಅತ್ಯುತ್ತಮ.
ಕೇವಲ ನೀರಿರುವ ಎಳನೀರಿಗಿಂತ, ಸ್ವಲ್ಪ ಪೇಪರ್ ಗಂಜಿ ಇರುವ ಎಳನೀರು ವಾತ ಮತ್ತು ಪಿತ್ತ ಎರಡನ್ನೂ ಸಮತೋಲನದಲ್ಲಿ ಇಡುತ್ತದೆ. ತಾಟಿನಿಂಗು (ತಾಳೆ ಹಣ್ಣು) ಕೂಡ ಅತ್ಯುತ್ತಮ.

ಕುಡಿಯುವ ನೀರಿನ ಬಗ್ಗೆ ಇರಲಿ ಎಚ್ಚರ!

ಇತ್ತೀಚೆಗೆ ನಾವೆಲ್ಲಾ ಬರೀ RO ಫಿಲ್ಟರ್ ನೀರನ್ನೇ ಕುಡಿಯೋಕೆ ಶುರು ಮಾಡಿದ್ದೀವಿ ಅಲ್ವಾ?ಆದ್ರೆ ಹೀಗೆ ಫಿಲ್ಟರ್ ಆದಾಗ ಅದರಲ್ಲಿರೋ ಮಿನರಲ್ಸ್ (ಸತ್ವ) ಎಲ್ಲಾ ಹೊರಟುಹೋಗಿ, ಆ ನೀರು ಕೇವಲ ‘ನೀರಸ’ ವಾಗಿರುತ್ತೆ.

ಇದನ್ನೇ ಸದಾ ಕುಡಿಯುತ್ತಾ ಇದ್ರೆ ನಮ್ಮ ಮೂಳೆಗಳು ಬಹಳ ಬೇಗ ಸವೆದು ಹೋಗುತ್ತವೆ. ಜೊತೆಗೆ ಈ ಬೇಸಿಗೆ ಬಿಸಿಲಲ್ಲಿ ಎಷ್ಟೇ ನೀರು ಕುಡಿದ್ರೂ ದಾಹವೇ ತೀರಲ್ಲ.ಇದನ್ನ ತಪ್ಪಿಸಿ, ಕುಡಿಯುವ ನೀರಿಗೆ ಮರಳಿ ‘ಜೀವ’ ತುಂಬಲು ನಮ್ಮ ಆಯುರ್ವೇದದಲ್ಲಿ ಒಂದು ಅದ್ಭುತವಾದ ಐಡಿಯಾ ಇದೆ. ಈ ಸಿಂಪಲ್ ಟ್ರಿಕ್ ಮಾಡಿ:

ಜೀವಜಲ ಮಾಡುವ ವಿಧಾನ: ಒಂದು ಪಾತ್ರೆಯಲ್ಲಿ ಎರಡು ಲೀಟರ್ ಶುದ್ಧವಾದ ನೀರು ತೆಗೆದುಕೊಳ್ಳಿ. ಅದಕ್ಕೆ ಸ್ವಲ್ಪ ತುಳಸಿ ರಸ (ಅಥವಾ ಎಲೆ), ಸ್ವಲ್ಪ ಜೀರಿಗೆ ಮತ್ತು ಸ್ವಲ್ಪ ಕೊತ್ತಂಬರಿ ಬೀಜ (ಧನಿಯಾ) ಹಾಕಿ ಚೆನ್ನಾಗಿ ಕುದಿಸಿ.
ಬಳಸುವ ರೀತಿ: ಕುದಿಸಿದ ಈ ನೀರನ್ನು ಚೆನ್ನಾಗಿ ಆರಿಸಿ (ತಂಪಾಗಿಸಿ). ದಿನವಿಡೀ ಬೇರೆ ನೀರಿನ ಬದಲು ಇದನ್ನೇ ಕುಡಿಯುತ್ತಾ ಇರಿ.

ಇದರ ಲಾಭಗಳು: ಇದರಿಂದ ಬಿಸಿಲಿನ ಝಳಕ್ಕೆ ಕುಗ್ಗಿದ ನಮ್ಮ ದೇಹಕ್ಕೆ ಒಳ್ಳೆ ಎನರ್ಜಿ ಸಿಗುತ್ತೆ. ಹೊಟ್ಟೆಯಲ್ಲಿರೋ ಉಷ್ಣವೆಲ್ಲಾ ಕಡಿಮೆಯಾಗಿ, ಪದೇ ಪದೇ ಬಾಯಾರಿಕೆ ಆಗೋದು ಖಂಡಿತ ತಪ್ಪುತ್ತೆ. ಮೈಗೂ ಬಹಳ ತಂಪು!

ಈ ಮಾಹಿತಿಯನ್ನು ಇನ್ನೂ ಸಂಪೂರ್ಣವಾಗಿ ತಿಳಿದುಕೊಳ್ಳಲು ಇಲ್ಲಿ ಕ್ಲಿಕ್ ಮಾಡಿ

ಆರೋಗ್ಯವೇ ಭಾಗ್ಯ!

ವೀಕ್ಷಕರೇ, ನಮ್ಮ ಹಿರಿಯರು ಹೇಳಿಕೊಟ್ಟ ಈ ಆರೋಗ್ಯದ ಗುಟ್ಟುಗಳನ್ನ ಪ್ರತಿದಿನ ಪಾಲಿಸಿ. ಪ್ರಕೃತಿಯ ಜೊತೆ ಹೊಂದಿಕೊಂಡು ಜೀವಿಸಿದರೆ ಯಾವ ಕಾಯಿಲೆಯೂ ನಮ್ಮ ಹತ್ತಿರ ಸುಳಿಯುವುದಿಲ್ಲ.ಬಿಸಿಲಿನ ಬೇಗೆಯಿಂದ ನಿಮ್ಮನ್ನ ಮತ್ತು ನಿಮ್ಮ ಕುಟುಂಬವನ್ನ ರಕ್ಷಿಸಿಕೊಳ್ಳಿ.

ಈ ಉಪಯುಕ್ತ ಮಾಹಿತಿ ನಿಮಗೆ ಇಷ್ಟ ಆಗಿದ್ದರೆ, ದಯವಿಟ್ಟು ನಿಮ್ಮ ಸ್ನೇಹಿತರು ಹಾಗೂ ವಾಟ್ಸಾಪ್ ಗ್ರೂಪ್‌ಗಳಲ್ಲಿ ಶೇರ್ ಮಾಡಿ.ಇದೇ ರೀತಿಯ ದಿನನಿತ್ಯದ ಉಪಯುಕ್ತ ಮಾಹಿತಿಗಳು, ಸರ್ಕಾರಿ ಯೋಜನೆಗಳು, ಉದ್ಯೋಗ ಮಾಹಿತಿಗಾಗಿ ನಮ್ಮ ವೆಬ್‌ಸೈಟ್‌ಗೆ ಪ್ರತಿದಿನ ಭೇಟಿ ನೀಡುತ್ತಿರಿ. ಆರೋಗ್ಯವೇ ಭಾಗ್ಯ!

ಈ ಉಪಯುಕ್ತ ಮಾಹಿತಿ ನಿಮಗೆ ಇಷ್ಟ ಆಗಿದ್ದರೆ, ದಯವಿಟ್ಟು ನಿಮ್ಮ ಸ್ನೇಹಿತರು ಹಾಗೂ ವಾಟ್ಸಾಪ್ ಗ್ರೂಪ್‌ಗಳಲ್ಲಿ ಶೇರ್ ಮಾಡಿ.