school teachers: ಗುರುವಿನ ಗುಲಾಮನಾಗುವ ತನಕ ದೊರೆಯದಣ್ಣ ಮುಕ್ತಿ ಇಂದಿನ ಕಾಲಕ್ಕೆ ಬೇಕಾಗಿದ್ದಾರೆ ಅಂದಿನ ಕಾಲದ ಶಿಕ್ಷಕರು

ಸಂಜೆ ನಮ್ಮೂರಿನ ಅರಳಿಕಟ್ಟೆ ಮೇಲೆ ಕೂತು ಬಿಸಿ ಬಿಸಿ ಚಹಾ ಕುಡಿತಾ ಇದ್ದೆ. ಆಗ ಹಳೇ ನೆನಪುಗಳು ಒಮ್ಮೆಲೆ ಕಣ್ಣ ಮುಂದೆ ಬಂದು ಹೋದವು. ಹಿಂದಿನ ಕಾಲದ ನಮ್ಮೂರಿನ ಆ ಹೆಂಚಿನ ಶಾಲೆ

ಅಲ್ಲಿಯ ಖದರ್ ಮೇಷ್ಟ್ರುಗಳು ನೆನಪಾದರು. ಅವರು ಪಾಠ ಮಾಡ್ತಿದ್ದ ರೀತಿ, ತಪ್ಪು ಮಾಡಿದಾಗ ಬೀಳುತ್ತಿದ್ದ ಆ ಬೆತ್ತದ ಏಟು, ಜೊತೆಗೆ ಅವರು ತೋರುತ್ತಿದ್ದ ಅಪ್ಪಟ ಪ್ರೀತಿ ಎಲ್ಲವೂ ನಿನ್ನೆಯಷ್ಟೇ ನಡೆದ ಹಾಗೆ ಕಣ್ಣಿಗೆ ಕಟ್ಟಿತು.

ಇದೇ ಹೊತ್ತಿಗೆ, ನಾನು ಮೊನ್ನೆ ಕೇಳಿದ ಒಬ್ಬರು ಹಿರಿಯ ಹಾಗೂ ಅತಿ ದೊಡ್ಡ ಅನುಭವಿ ಶಿಕ್ಷಕರೊಬ್ಬರ ಮಾತುಗಳು ಕಿವಿಯಲ್ಲಿ ಗುಯ್ಗುಡಲು ಶುರುವಾಯ್ತು.

ಅವರು ಹೇಳಿದ ಆ ಮಾತು ಕೇಳಿದ್ರೆ, ನಿಮ್ಮ ಮನಸ್ಸಿಗೂ ಹೌದಲ್ರೀ, ಈ ಮೇಷ್ಟ್ರು ಹೇಳೋದು ನೂರಕ್ಕೆ ನೂರು ಸತ್ಯ ಅಂತ ಅನಿಸದೆ ಇರದು. ಎಂಥಾ ಮಾತು ಗೊತ್ತಾ ಅದು

ಬರುವ ದಿನಗಳಲ್ಲಿ ನಮಗೆ ಅತ್ಯುತ್ತಮವಾದ ಡಾಕ್ಟರ್‌ಗಳು ಸಿಗಬಹುದು, ಬ್ರಿಲಿಯಂಟ್ ಆಗಿರೋ ಇಂಜಿನಿಯರ್‌ಗಳು ಸಿಗಬಹುದು. ಆದ್ರೆ, ಒಬ್ಬ ಒಳ್ಳೆಯ ಮೇಷ್ಟ್ರು ಸಿಗೋದು ಮಾತ್ರ ಬಹಳ ಅಂದ್ರೆ ಬಹಳ ಕಷ್ಟ

ಯಾಕೆ ಹಿಂಗೆ ಹೇಳಿದ್ರು ನಮ್ಮ ಜೀವನದಲ್ಲಿ ಒಬ್ಬ ಗುರುವಿನ ಬೆಲೆ ಏನು ಬನ್ನಿ, ಇವತ್ತು ಈ ಗುರುವಿನ ಮಾತಿನ ಹಿಂದಿರುವ ಆಳವಾದ ಅರ್ಥವನ್ನ ನಮ್ಮ ಭಾಷೆಯಲ್ಲೇ, ಸ್ವಲ್ಪ ಆಪ್ತವಾಗಿ, ವಿವರವಾಗಿ ನೋಡೋಣ.

ಇದನ್ನೂ ಓದಿ: ಸರ್ಕಾರಿ ಶಾಲೆ ಶಿಕ್ಷಕರ ವರ್ಗಾವಣೆ: ಏನಿದು 2026ರ ಹೊಸ ಕಡಕ್ ರೂಲ್ಸ್ ನ ಬಗ್ಗೆ ಸಂಪೂರ್ಣ ಮಾಹಿತಿ

ಸಸಿ ಸಣ್ಣದಿದ್ದಾಗಲೇ ಬೇಲಿ ಹಾಕಬೇಕು

ಈ ನಮ್ಮ ಹಿರಿಯ ಮೇಷ್ಟ್ರು, ಮೊದಲು ದೊಡ್ಡ ಕಾಲೇಜೊಂದರಲ್ಲಿ ಪ್ರಿನ್ಸಿಪಾಲ್ ಆಗಿದ್ದವರು. ಅಲ್ಲಿಗೆ ಬರೋರು ಯಾರು ಮೀಸೆ ಚಿಗುರಿರೋ, ಜವಾಬ್ದಾರಿ ಅರಿಯುವ ದೊಡ್ಡ ದೊಡ್ಡ ವಯಸ್ಸಿನ ಮಕ್ಕಳು.

ಆದರೆ, ಆ ಮೇಷ್ಟ್ರಿಗೆ ಇದ್ದಕ್ಕಿದ್ದಂತೆ ಆ ದೊಡ್ಡ ಕಾಲೇಜಿನ ಕೆಲಸ ಬಿಟ್ಟು, ಸಣ್ಣ ಸಣ್ಣ ಮಕ್ಕಳಿರೋ ಪ್ರೈಮರಿ ಶಾಲೆಗೆ ಹೋಗಿ ಪಾಠ ಮಾಡಬೇಕು ಅಂತ ಆಸೆ ಆಯ್ತಂತೆ.

ಅದನ್ನ ಕೇಳಿ ಅವರ ಸ್ನೇಹಿತರೆಲ್ಲಾ ಏನ್ರೀ ನಿಮಗೆ ಹುಚ್ಚಾ ಎಲ್ಲರೂ ಸ್ಕೂಲ್ ಬಿಟ್ಟು ದೊಡ್ಡ ಹುದ್ದೆ ಅಂತ ಕಾಲೇಜಿಗೆ, ಯೂನಿವರ್ಸಿಟಿಗೆ ಹೋದ್ರೆ, ನೀವು ಕಾಲೇಜ್ ಬಿಟ್ಟು ವಾಪಸ್ ಸ್ಕೂಲಿಗೆ ಹೋಗ್ತಿದ್ದೀರಲ್ಲಾ ಅಂತ ಬೈದ್ರಂತೆ. ಆದರೆ, ಅದಕ್ಕೆ ಆ ಮೇಷ್ಟ್ರು ಕೊಟ್ಟ ಉತ್ತರ ಮಾತ್ರ ಪ್ರತಿಯೊಬ್ಬ ತಂದೆ ತಾಯಿಯೂ ಕೇಳಲೇಬೇಕು. ಅವರು ಹೇಳಿದ್ದು ಇಷ್ಟೇ.

ನೋಡ್ರಪ್ಪ, ನಾವು ಹೊಲದಲ್ಲಿ ಒಂದು ಗಿಡ ನೆಡ್ತೀವಿ ಅಂದುಕೊಳ್ಳಿ. ಸಸಿ ಸಣ್ಣದಿದ್ದಾಗಲೇ ಅದಕ್ಕೊಂದು ಬೇಲಿ ಹಾಕಬೇಕು. ಅದು ನೆಟ್ಟಗೆ ಬೆಳೆಯಲಿ ಅಂತ ಪಕ್ಕದಲ್ಲಿ ಒಂದು ಕಡ್ಡಿ ನೆಟ್ಟು ದಾರದಲ್ಲಿ ಕಟ್ಟಬೇಕು. ಹೌದಲ್ವಾ

ಹಾಗೆ ಕಟ್ಟದೆ ಹೋದ್ರೆ ಏನಾಗುತ್ತೆ ಗಿಡ ಸೊಟ್ಟಗೆ ಬೆಳೆದು ರಸ್ತೆಗೆ ಅಡ್ಡ ಬರುತ್ತೆ. ಆಮೇಲೆ ಕರೆಂಟ್ (KEB) ನವರು ಬಂದು ಕತ್ತರಿಸಿ ಹಾಕ್ತಾರೆ. ಅಯ್ಯೋ, ಚೆನ್ನಾಗಿ ಬೆಳೆದಿದ್ದ ಗಿಡ ಕತ್ತರಿಸಿಬಿಟ್ರಲ್ಲಾ ಅಂತ ನಾವು ಆಮೇಲೆ ಕೂತು ಅಳ್ತೀವಿ.

ಮಕ್ಕಳ ವಿಷಯದಲ್ಲೂ ಅಷ್ಟೇ ಕಣ್ರೀ. ಸಣ್ಣ ವಯಸ್ಸಿನಲ್ಲೇ ಅವರಿಗೆ ಒಳ್ಳೆ ಗುಣ, ಸಂಸ್ಕೃತಿ ಕಲಿಸಬೇಕು. ಅಪ್ಪ-ಅಮ್ಮ ಹಾಗೂ ಮೇಷ್ಟ್ರುಗಳು ಸಣ್ಣ ವಯಸ್ಸಿಗೆ ಮೌಲ್ಯಗಳನ್ನು ತುಂಬಲಿಲ್ಲ ಅಂದ್ರೆ, ಮುಂದೆ ಮಕ್ಕಳು ದಾರಿ ತಪ್ಪುತ್ತಾರೆ. ಮಕ್ಕಳಿಗೆ ಸಂಸ್ಕೃತಿ ಇಲ್ಲ ಅಂದ್ರೆ ಅದು ಮಕ್ಕಳ ತಪ್ಪಲ್ಲ. ನಾವು ದೊಡ್ಡವರು ಅವರಿಗೆ ಕಲಿಸುವಲ್ಲಿ ಸೋತಿದ್ದೀವಿ ಅಂತ ಅರ್ಥ.

ಇರುವೆ ನಿದ್ದೆ ಮಾಡೋದನ್ನ ಹುಡುಕಿದ ಆ ಪುಟ್ಟ ಹುಡುಗ

ಒಳ್ಳೆಯ ಮೇಷ್ಟ್ರು ಅಂದ್ರೆ ಬರೀ ಬೋರ್ಡ್ ಮೇಲೆ ಬರೆದು, ಬಾಯಿಪಾಠ ಮಾಡಿಸೋರಲ್ಲ. ಮಕ್ಕಳ ಮನಸ್ಸಿನಲ್ಲಿ ಹೊಸದೊಂದು ವಿಚಾರವನ್ನ, ಕುತೂಹಲವನ್ನ ಹುಟ್ಟುಹಾಕೋರು. ಇದಕ್ಕೆ ನಮ್ಮ ಮೇಷ್ಟ್ರು ಹೇಳಿದ ಒಂದು ಅದ್ಭುತ ಘಟನೆ ಕೇಳಿ. ಒಮ್ಮೆ ಇವರ ಶಾಲೆಯಲ್ಲಿದ್ದ ಮೂರು ಜನ ಸಣ್ಣ ಹುಡುಗರು ಓಡೋಡಿ ಬಂದು, ಸರ್, ಇರುವೆ ಹೇಗೆ ನಿದ್ದೆ ಮಾಡುತ್ತೆ ಅಂತ ಕೇಳಿದ್ರಂತೆ.

ನಮ್ಮಂತವರಾಗಿದ್ರೆ ಏನ್ ಮಾಡ್ತಿದ್ವಿ ಹೋಗ್ರೋ ನನ್ಮಕ್ಕಳಾ, ಅದೇನ್ ಹುಚ್ಚು ಪ್ರಶ್ನೆ ಹೋಗಿ ಓದಿಕೊಳ್ಳಿ ಅಂತ ಬೈದು ಕಳಿಸ್ತಿದ್ವಿ. ಇಲ್ಲಾಂದ್ರೆ ನಾವು ಮೊಬೈಲ್ ತೆಗೆದು ಗೂಗಲ್ ನೋಡಿ ಹೇಳ್ತಿದ್ವಿ.

ಆದರೆ ಮೇಷ್ಟ್ರು ಹಾಗೆ ಮಾಡ್ಲಿಲ್ಲ. ಅಡುಗೆ ಮನೆಗೆ ಹೋಗಿ ಒಂದು ಪ್ಲಾಸ್ಟಿಕ್ ಡಬ್ಬಿ ತಂದು, ಅದರಲ್ಲಿ ಮೂರು ದೊಡ್ಡ ಕಪ್ಪು ಇರುವೆ ಹಾಕಿ, ಸ್ವಲ್ಪ ಕಲ್ಲು ಸಕ್ಕರೆ ಹಾಕಿ ಆ ಮಕ್ಕಳ ಕೈಗೆ ಕೊಟ್ರು.

ನನಗೂ ಗೊತ್ತಿಲ್ಲಪ್ಪ, ನೀವೇ ನೋಡಿ ಕಂಡುಹಿಡಿಯಿರಿ. ಇದೇ ನಿಮ್ಮ ಪ್ರಾಜೆಕ್ಟ್ ಅಂತ ಹೇಳಿಬಿಟ್ರು. ಆ ಮಕ್ಕಳು ಮಧ್ಯಾಹ್ನದಿಂದ ಆ ಡಬ್ಬಿಯನ್ನೇ ಗುರಾಯಿಸಿಕೊಂಡು ಕೂತರು.

ಮೂರು ಇರುವೆಗಳೂ ಕಪ್ಪಗೇ ಇದ್ದಿದ್ದರಿಂದ ಯಾವ ಇರುವೆ ಮಲಗಿದೆ ಅಂತ ಅವರಿಗೆ ಗೊತ್ತಾಗಲಿಲ್ಲ. ಆಗ ಆ ಜಾಣ ಮಕ್ಕಳು ಆರ್ಟ್ ರೂಮಿಗೆ ಹೋಗಿ, ಮೂರು ಇರುವೆಗಳಿಗೆ ಮೂರು ಬೇರೆ ಬೇರೆ ಬಣ್ಣ (ಹಸಿರು, ಕೆಂಪು) ಹಚ್ಚಿ ಪರೀಕ್ಷೆ ಮಾಡಿದರಂತೆ

ಕಡೆಗೆ ಸಂಜೆ ಬಂದು, ನಗುನಗುತ್ತಾ ಸರ್, ಇರುವೆ ಹೆಂಗೆ ನಿದ್ದೆ ಮಾಡುತ್ತೆ ಅಂತ ಗೊತ್ತಾಯ್ತು ಅದು ತನ್ನ ಮುಂದಿನ ಎರಡು ಕಾಲುಗಳನ್ನ ಎತ್ತಿ, ತಲೆ ಅಡ್ಡ ಇಟ್ಟು ಕೇವಲ ಹದಿನೈದು ಸೆಕೆಂಡ್ ಮಲ್ಕೊಳ್ಳುತ್ತೆ ಸರ್ ಅಂದ್ರಂತೆ.

ಇಷ್ಟೇನಾ ನಿದ್ದೆ ಅಂತ ಕೇಳಿದ್ರೆ, ಹೌದು ಸರ್, ನಾವು ದೊಡ್ಡವರಲ್ವಾ ಅದಕ್ಕೆ ಎಂಟು ತಾಸು ನಿದ್ದೆ ಬೇಕು, ಅದು ಸಣ್ಣದಲ್ವಾ ಅದಕ್ಕೆ 15 ಸೆಕೆಂಡ್ ಸಾಕು ಅಂತ ನಕ್ಕರಂತೆ ಆ ಮಕ್ಕಳು.

ನೋಡಿದ್ರಾ ನಮ್ಮ ಮೇಷ್ಟ್ರ ಜಾಣ್ಮೆ! ಮಕ್ಕಳು ತಾವೇ ಕಷ್ಟಪಟ್ಟು, ಅನುಭವಿಸಿ ಕಲಿತದ್ದು ಅವರ ತಲೆಯಲ್ಲಿ ಶಾಶ್ವತವಾಗಿ ಉಳಿಯುತ್ತೆ. ಬರೀ ಬಾಯಿಪಾಠ ಮಾಡಿಸಿದ್ದು ಪರೀಕ್ಷೆ ಮುಗಿದ ಮರುದಿನವೇ ಮರೆತುಹೋಗುತ್ತೆ.

ಆವತ್ತು ಆ ಇರುವೆ ಬಗ್ಗೆ ಸಂಶೋಧನೆ ಮಾಡಿದ ಆ ಸಣ್ಣ ಹುಡುಗ, 20 ವರ್ಷದ ನಂತರ ಅಮೆರಿಕಾದಲ್ಲಿ ದೊಡ್ಡ ವಿಜ್ಞಾನಿ ಆಗಿ ಏಳು ಪೇಟೆಂಟ್ ಗಳನ್ನ ಪಡ್ಕೊಂಡನಂತೆ. ಇದೆಲ್ಲಾ ಸಾಧ್ಯವಾಗಿದ್ದು, ಆವತ್ತು ಆ ಮೇಷ್ಟ್ರು ಕೊಟ್ಟ ಆ ಪುಟ್ಟ ಪ್ರೋತ್ಸಾಹದಿಂದ ತಾನೇ

ಇದನ್ನೂ ಓದಿ: ಆರ್.ಟಿ.ಇ ಅರ್ಜಿ2026-27: ಖಾಸಗಿ ಶಾಲೆಯಲ್ಲಿ ಫೀಸ್ ಇಲ್ಲದೆ ಓದಿಸಬೇಕೆ ಹಾಗಾದ್ರೆ ಅರ್ಜಿ ಬಗ್ಗೆಈಗಲೇ ತಿಳಿಯಿರಿ

ಹೋದ ರೈಲನ್ನೇ ಹಿಂದಕ್ಕೆ ತರಿಸಿದ ಗುರುವಿನ ತಾಕತ್ತು

ಇನ್ನೊಂದು ಕಥೆ ಕೇಳ್ತೀರಾ ಗುರುವಿನ ಸ್ಥಾನ ಎಂಥದ್ದು, ಅವರು ತೋರುವ ಪ್ರೀತಿಗೆ ಎಂಥಾ ಶಕ್ತಿ ಇದೆ ಅಂತ ಈ ಘಟನೆ ಹೇಳುತ್ತೆ. ಒಮ್ಮೆ ಇನ್ನೊಬ್ಬರು ಮಹಾನ್ ಶಿಕ್ಷಕರು,

ರಾತ್ರಿ ರೈಲಿನಲ್ಲಿ ಬೇರೊಂದು ಊರಿಗೆ ಪ್ರಯಾಣ ಮಾಡ್ತಿದ್ರಂತೆ. ಬೆಳಗಿನ ಜಾವ ರೈಲು ಯಾವುದೋ ಸ್ಟೇಷನ್‌ನಲ್ಲಿ ನಿಂತಾಗ, ಬಿಸಿ ಬಿಸಿ ಚಹಾ ಕುಡಿಯೋಣ ಅಂತ ತಾವು ಮಲಗಿದ್ದ ಬಟ್ಟೆಯಲ್ಲೇ (ಪೈಜಾಮ, ಬನಿಯನ್) ಕೆಳಗೆ ಇಳಿದ್ರು.

ಸ್ಟಾಲ್ ಬಳಿ ಹೋಗಿ ಚಹಾ ತಗೊಳ್ಳೋಷ್ಟರಲ್ಲಿ ರೈಲು ಬಿಟ್ಟೇ ಬಿಡ್ತುಇವರ ಸೂಟ್ಕೇಸ್, ಒಳ್ಳೆ ಬಟ್ಟೆ, ದುಡ್ಡು ಎಲ್ಲವೂ ರೈಲಿನಲ್ಲೇ ಇದೆ. ಇವರಿಗೆ ಮುಂದೆ ಬೇರೊಂದು ಊರಿನಲ್ಲಿ ದೊಡ್ಡ ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಯಾಗಿ ಹೋಗಬೇಕಿತ್ತು.

ಅಯ್ಯೋ ಶಿವನೇ, ಏನ್ ಮಾಡೋದು ಈಗ ಅಂತ ತಲೆ ಮೇಲೆ ಕೈ ಹೊತ್ತು ಪ್ಲಾಟ್‌ಫಾರ್ಮ್ ಮೇಲೆ ನಿಂತ್ಕೊಂಡು ಬಿಟ್ರಂತೆ. ಆದರೆ ಅಚ್ಚರಿ ಅಂದ್ರೆ ಮಹಾ ಅಚ್ಚರಿ ಮುಂದೆ ಹೋಗಿದ್ದ ಆ ದೊಡ್ಡ ರೈಲು, ಸ್ವಲ್ಪ ಹೊತ್ತಿನಲ್ಲೇ ರಿವರ್ಸ್ (ಹಿಂದಕ್ಕೆ) ಬಂದು ಇವರ ಮುಂದೆ ನಿಂತುಕೊಳ್ತು

ರೈಲಿನ ಒಳಗಡೆಯಿಂದ ಗಾರ್ಡ್ ಒಬ್ಬ ಓಡಿ ಬಂದು, ಈ ಮೇಷ್ಟ್ರ ಕಾಲು ಮುಟ್ಟಿ ನಮಸ್ಕಾರ ಮಾಡಿದ. ಸರ್, ನೀವು ಟ್ರೈನ್ ಮಿಸ್ ಮಾಡ್ಕೊಂಡಿದ್ದನ್ನ ನಾನು ಹಿಂದಿನಿಂದ ನೋಡಿದೆ, ಅದಕ್ಕೆ ಟ್ರೈನನ್ನು ವಾಪಸ್ ತಂದೆ ಅಂದ.

ಆ ಗಾರ್ಡ್ ಯಾರು ಗೊತ್ತಾ ಹಿಂದೊಮ್ಮೆ ಪರೀಕ್ಷೆಯಲ್ಲಿ ಕಾಪಿ ಮಾಡಿದಾಗ, ಇದೇ ಮೇಷ್ಟ್ರು ಅವನನ್ನ ಪ್ರೀತಿಯಿಂದ ತಿದ್ದಿ, ಕಡಿಮೆ ಶಿಕ್ಷೆ ಕೊಟ್ಟು ಅವನ ಭವಿಷ್ಯ ಹಾಳಾಗದಂತೆ ಕಾಪಾಡಿದ್ದ ಹಳೇ ವಿದ್ಯಾರ್ಥಿ ಆ ಪ್ರೀತಿಗೆ, ಅವನು ಇಡೀ ಟ್ರೈನ್ ಅನ್ನೇ ವಾಪಸ್ ತಂದಿದ್ದ. ಒಳ್ಳೆ ಮೇಷ್ಟ್ರು ಪಾಠ ಮಾಡಿದ್ರೆ, ಜ್ಞಾನ ಬರೋದು ಮಾತ್ರವಲ್ಲ, ಹೋದ ಟ್ರೈನ್ ಕೂಡ ವಾಪಸ್ ಬರುತ್ತೆ ಕಣ್ರೀ!

ವಿಮಾನವನ್ನೇ ನಿಲ್ಲಿಸಿದ ನಮ್ಮ ಮೇಷ್ಟ್ರು

ಇದೇ ರೀತಿ, ನಮ್ಮ ಹಿರಿಯ ಮೇಷ್ಟ್ರಿಗೂ ಒಮ್ಮೆ ಆಗಿತ್ತಂತೆ. ವಿಪರೀತ ಮಳೆಯಲ್ಲಿ ಸಿಕ್ಕಿಹಾಕಿಕೊಂಡು, ಏರ್ಪೋರ್ಟ್ ತಲುಪೋದು ತುಂಬಾ ತಡವಾಯ್ತು. ಏಳು ಗಂಟೆಗೆ ಬರ್ಲಿಲ್ಲ ಅಂದ್ರೆ ನಿಮ್ಮನ್ನ ವಿಮಾನ ಹತ್ತಿಸಲ್ಲ. ಕೌಂಟರ್ ಕ್ಲೋಸ್ ಮಾಡ್ತೀವಿ ಅಂತ ಅಲ್ಲಿನ ಅಧಿಕಾರಿಗಳು ಕಡ್ಡಿ ಮುರಿದಂತೆ ಹೇಳಿಬಿಟ್ಟಿದ್ದರು.

ಆಗ ಮೇಷ್ಟ್ರು, ಆ ವಿಮಾನಯಾನ ಸಂಸ್ಥೆಯ ಮಾಲೀಕನಾಗಿದ್ದ ತಮ್ಮ ಹಳೇ ವಿದ್ಯಾರ್ಥಿಗೆ ಒಂದೇ ಒಂದು ಮೆಸೇಜ್ ಮಾಡಿದ್ರಂತೆ: ನನಗೆ ತಡವಾಗ್ತಿದೆ, ಆದ್ರೆ ಅಲ್ಲಿಗೆ ಬರೋದು ಬಹಳ ಮುಖ್ಯ ಅಂತ. ಆ ಕಡೆಯಿಂದ ಕೇವಲ ಒಂದೇ ನಿಮಿಷದಲ್ಲಿ ಉತ್ತರ ಬಂತು: ಸರ್, ನೀವು ಬರುವವರೆಗೂ ವಿಮಾನ ಹಾರಲ್ಲ. ನೀವು ನಿಧಾನವಾಗಿ, ಆರಾಮಾಗಿ ಬನ್ನಿ.

ನೋಡಿದ್ರಾ ಒಬ್ಬ ಒಳ್ಳೆಯ ಮೇಷ್ಟ್ರಿಗೆ ಎಂಥಾ ಬೆಲೆ ಇದೆ ಅಂತ. ತಾವು ವಿದ್ಯೆ ಕಲಿಸಿದ ಮಕ್ಕಳ ಮನಸ್ಸಲ್ಲಿ ಮೇಷ್ಟ್ರು ಅಂದ್ರೆ ಅದೆಷ್ಟು ಭಕ್ತಿ, ಗೌರವ ಇರುತ್ತೆ ಅನ್ನೋದಕ್ಕೆ ಇದಕ್ಕಿಂತ ದೊಡ್ಡ ಉದಾಹರಣೆ ಬೇಕೇನ್ರೀ ರಾಜಕಾರಣಿಗಳು ಕಾಯುವಂತೆ ಮಾಡಿ, ತಮ್ಮ ಮೇಷ್ಟ್ರಿಗಾಗಿ ವಿಮಾನ ನಿಲ್ಲಿಸಿದ ಆ ಶಿಷ್ಯನ ಭಕ್ತಿ ನಿಜಕ್ಕೂ ದೊಡ್ಡದು.

ಇದನ್ನೂ ಓದಿ: ಪಹಣಿ (RTC) ತಿದ್ದುಪಡಿ ಅದಾಲತ್ 2026 : ನಿಮ್ಮ ಹೊಲದ ಪಹಣೀಲಿ ಹೆಸರು ಎಕರೆ-ಗುಂಟೆ ತಪ್ಪಾಗಿದೆಯಾ ಇಲ್ಲಿದೆ ನೋಡಿ ಸುಲಭ ಪರಿಹಾರ

ನಿಜವಾದ ಮೇಷ್ಟ್ರು ಅಂದ್ರೆ ಹೆಂಗಿರಬೇಕು?

ಹಾಗಾದ್ರೆ ಬನ್ನಿ, ಒಬ್ಬ ಒಳ್ಳೆ ಮೇಷ್ಟ್ರು ಅಂದ್ರೆ ಹೆಂಗಿರಬೇಕು ಅಂತ ನಾವೆಲ್ಲ ಒಂದಷ್ಟು ಪಾಯಿಂಟ್ಸ್ ಮಾಡೋಣ. ಇದು ಪ್ರತಿಯೊಬ್ಬ ಶಿಕ್ಷಕರಿಗೂ, ತಂದೆ-ತಾಯಿಗೂ ಅನ್ವಯಿಸುತ್ತೆ:

ಪ್ರಶ್ನೆ ಹುಟ್ಟಿಸುವವರು: ಬರೀ ಪಾಠ ಮಾಡಿ, ಪುಸ್ತಕದ ಬದನೆಕಾಯಿ ಉರು ಹೊಡೆಸುವವರಲ್ಲ. ಮಕ್ಕಳ ತಲೆಯಲ್ಲಿ ಇದು ಯಾಕೆ ಹೀಗೆ ಅನ್ನೋ ಪ್ರಶ್ನೆ ಬರೋ ಹಾಗೆ ಮಾಡುವವರು ನಿಜವಾದ ಶಿಕ್ಷಕರು.
ತಾವೇ ಮಾದರಿಯಾಗುವವರು: ಮೌಲ್ಯಗಳನ್ನ ಬರೀ ಬಾಯಲ್ಲಿ ಹೇಳಿದ್ರೆ ಸಾಲದು. ಶಿಕ್ಷಕರು ತಾವೇ ಆ ಮೌಲ್ಯಗಳನ್ನ ಬದುಕಿ ತೋರಿಸಬೇಕು. ಶಿಕ್ಷಕರು ಹೇಗೆ ಬದುಕುತ್ತಾರೋ, ಮಕ್ಕಳು ಅದನ್ನೇ ನೋಡಿ ಕಲಿಯುತ್ತಾರೆ.
ಕ್ಷಮಿಸುವ ಗುಣ: ಮಕ್ಕಳು ತಪ್ಪು ಮಾಡಿದಾಗ ಸಿಕ್ಕಾಪಟ್ಟೆ ಕೋಪ ಮಾಡಿಕೊಂಡು ಹೊಡೆಯುವುದಲ್ಲ. ಪ್ರೀತಿಯಿಂದ ತಿದ್ದಿ, ಅವರ ಭವಿಷ್ಯಕ್ಕೆ ಅಡ್ಡಿಯಾಗದಂತೆ ಸರಿದಾರಿಗೆ ತರುವವರು.
ಪ್ರತಿಭೆ ಗುರುತಿಸುವವರು: ಆ ಪುಟ್ಟಿ ಹುಡುಗನಿಗೆ ಇರುವೆಯಾಟ ತೋರಿಸಿ ವಿಜ್ಞಾನಿಯನ್ನಾಗಿ ಮಾಡಿದರಲ್ಲ, ಹಾಗೆ ಪ್ರತಿಯೊಂದು ಮಗುವಿನ ಒಳಗಿರುವ ವಿಶೇಷ ಪ್ರತಿಭೆಯನ್ನ ಹೊರತೆಗೆಯುವ ಕಲೆಗಾರರು.
ಜಾದುಗಾರರು (Magicians): ಕ್ಲಾಸಿಗೆ ಹೋದರೆ ಮಕ್ಕಳು ಕಣ್ಣು ಮಿಟುಕಿಸದೆ ಕೇಳಬೇಕು. ಮುಂದೇನಾಗುತ್ತೆ ಅನ್ನೋ ಕುತೂಹಲ ಮೂಡಿಸುವ ಜಾದುಗಾರನಂತೆ ಇರಬೇಕು ಶಿಕ್ಷಕ.

ಶಿಕ್ಷಕ ರಾಷ್ಟ್ರದ ರಕ್ಷಕ

ಶಿಕ್ಷಕರ ವೃತ್ತಿ ಅಂದ್ರೆ ಅದು ಕೇವಲ ತಿಂಗಳ ಸಂಬಳಕ್ಕೆ ಮಾಡೋ ಕೆಲಸ ಅಲ್ಲ ಕಣ್ರೀ. ಅದು ಜೀವಗಳನ್ನ ಕಟ್ಟುವ, ಸಮಾಜವನ್ನ ರೂಪಿಸುವ ಕಾಯಕ. ಮಣ್ಣಿನ ಮುದ್ದೆಯಂತಿರುವ ಮಕ್ಕಳನ್ನ, ಸುಂದರವಾದ ಮೂರ್ತಿಯನ್ನಾಗಿ ಮಾಡುವ ಕರುಣಾಮಯಿ ಶಿಲ್ಪಿಗಳು ಅವರು.

ಬರುವ ದಿನಗಳಲ್ಲಿ ತಂತ್ರಜ್ಞಾನ ಎಷ್ಟೇ ಮುಂದುವರೆಯಲಿ. ಮೊಬೈಲ್, ಇಂಟರ್ನೆಟ್, ಗೂಗಲ್, ಏನೇನೋ ಹೊಸ ವಸ್ತುಗಳು ಬರಲಿ ಒಬ್ಬ ಜೀವಂತ, ಪ್ರೀತಿ ತುಂಬಿದ, ಸ್ಫೂರ್ತಿ ನೀಡುವ ಮೇಷ್ಟ್ರು ಮಾಡೋ ಮ್ಯಾಜಿಕ್ ಅನ್ನ ಯಾವ ಮಷೀನ್ ಕೂಡ ಮಾಡೋಕೆ ಆಗಲ್ಲ.

ನಮ್ಮೂರುಗಳಲ್ಲಿ ಇವತ್ತಿಗೂ ಅಂತ ಎಷ್ಟೋ ಮೇಷ್ಟ್ರುಗಳಿದ್ದಾರೆ. ಸೈಕಲ್ ಹೊಡ್ಕೊಂಡು ಬಂದು, ಪ್ರೀತಿಯಿಂದ ಪಾಠ ಮಾಡೋ ದೇವರಂತ ಮನುಷ್ಯರಿದ್ದಾರೆ. ಅವರನ್ನೆಲ್ಲಾ ನಾವು ಸದಾ ನೆನಪಿಸಿಕೊಳ್ಳಬೇಕು, ಗೌರವಿಸಬೇಕು.

ನಮ್ಮ ಮುಂದಿನ ಪೀಳಿಗೆಗೂ ಕೇವಲ ಮಾರ್ಕ್ಸ್ ಹಿಂದೆ ಓಡುವ ಯಂತ್ರಗಳಾಗದೆ, ಇಂಥಾ ಅದ್ಭುತ ಮೇಷ್ಟ್ರುಗಳು ಸಿಗಲಿ, ಒಳ್ಳೆ ಮನುಷ್ಯರಾಗಲಿ ಅಂತ ಆ ದೇವರಲ್ಲಿ ಬೇಡಿಕೊಳ್ಳೋಣ.

ನಿಮಗೂ ನಿಮ್ಮ ಜೀವನದಲ್ಲಿ ಇಂಥಾ ಯಾರಾದ್ರೂ ಮೇಷ್ಟ್ರು ನೆನಪಾಗಿದ್ರೆ, ಒಮ್ಮೆ ಕಣ್ಮುಚ್ಚಿ ಅವರನ್ನ ಪ್ರೀತಿಯಿಂದ ಸ್ಮರಿಸಿಕೊಳ್ಳಿ. ಸಾಧ್ಯವಾದರೆ ಅವರಿಗೊಂದು ಫೋನ್ ಮಾಡಿ ಮಾತಾಡಿಸಿ. ಬದುಕು ಎಲ್ಲರಿಗೂ ಚೆನ್ನಾಗಿರಲಿ.