ನಮ್ಮ ಹೊಲ ನಮ್ಮ ಹಕ್ಕು ಹದ್ದುಬಸ್ತು ಮಾಡ್ಸಿದಾಗ ಜಮೀನು ಒತ್ತುವರಿಯಾಗಿದ್ರೆ ವಾಪಸ್ ಪಡೆಯೋದು ಹೆಂಗೆ ಸಂಪೂರ್ಣ ಮಾಹಿತಿ

ನಮ್ಮ ಹೊಲ, ನಮ್ಮ ಹಕ್ಕು: ಹದ್ದುಬಸ್ತು ಮಾಡ್ಸಿದಾಗ ಜಮೀನು ಒತ್ತುವರಿಯಾಗಿದ್ರೆ ವಾಪಸ್ ಪಡೆಯೋದು ಹೆಂಗೆ ಸಂಪೂರ್ಣ ಮಾಹಿತಿ 

ನಮ್ಮ ಹಳ್ಳಿ ಕಡೆ ಒಂದು ಮಾತಿದೆ, ಹೆಣ್ಣು, ಹೊನ್ನು, ಮಣ್ಣು ಮೂರೂ ಕಿರಿಕ್ ತರಿಸ್ತಾವೆ ಅಂತ. ಅದರಲ್ಲೂ ಈ ಮಣ್ಣು, ಅಂದ್ರೆ ನಮ್ಮ ಜಮೀನಿನ ವಿಚಾರ ಬಂದ್ರೆ ನಾವ್ಯಾರೂ ಒಂದು ಗೇಣು ಜಾಗ ಕೂಡ ಬಿಟ್ಟುಕೊಡಲ್ಲ,ಅಲ್ವಾ

ನಮ್ಮ ತಾತ, ಮುತ್ತಾತಂದಿರ ಕಾಲದಿಂದಲೂ ಬೆವರು ಸುರಿಸಿ, ರಕ್ತ ನೀರಾಗಿ ಮಾಡಿ ಒಂದ್ ನಾಲ್ಕು ಎಕರೆ ಹೊಲನ ಕಷ್ಟಪಟ್ಟು ಉಳಿಸ್ಕೊಂಡಿರ್ತೀವಿ. ಆ ಮಣ್ಣಿನ ಮೇಲೆ ನಮಗೆ ಇರೋ ಮಮಕಾರ, ಪ್ರೀತಿ ಬೇರೆ ಯಾವುದರ ಮೇಲೂ ಇರಲ್ಲ.

ಆದ್ರೆ, ಒಮ್ಮೊಮ್ಮೆ ನಮ್ಮ ಜಮೀನಿನ ಗಡಿ (ಬೌಂಡರಿ) ವಿಚಾರಕ್ಕೆ ಪಕ್ಕದ ಹೊಲದವರ ಜೊತೆ ಸುಮ್ಸುಮ್ನೆ ಕಿರಿಕ್ ಶುರುವಾಗುತ್ತೆ.ಇದು ಹಳ್ಳಿಗಳಲ್ಲಿ ಮಾಮೂಲಿ.

ಗಡಿ ಕಿರಿಕ್: ಶುರುವಾಗೋದು ಹೆಂಗೆ

ನಾವೆಲ್ಲೋ ನಮ್ ಪಾಡಿಗೆ ಉಳುಮೆ ಮಾಡ್ಕೊಂಡು, ಗೊಬ್ಬರ ಹಾಕೊಂಡು ನೆಮ್ಮದಿಯಾಗಿ ಇರ್ತೀವಿ. ಆದರೆ ದಿನೇ ದಿನೇ ಪಕ್ಕದವ್ರು ನಮ್ಮ ಜಾಗದ ಕಡೆಗೆ ನೇಗಿಲು ಹೊಡೀತಾ ಬರ್ತಿದಾರೆ ಅಂತ ನಮಗೆ ಗುಮಾನಿ ಶುರುವಾಗುತ್ತೆ.

ವರ್ಷದಿಂದ ವರ್ಷಕ್ಕೆ ನಮ್ಮ ಹೊಲದ ಬದು (ಗಡಿ) ಸಣ್ಣದಾಗ್ತಾ ಹೋಗುತ್ತೆ. ಪಕ್ಕದ ಹೊಲದವರು ನಮ್ಮ ಜಾಗನ ನುಂಗುತಿದಾರೆ ಅನ್ನೋದು ನಮಗೆ ಗೊತ್ತಾಗ್ತಾ ಇರುತ್ತೆ.

ಆಗ ನಾವು ಹೋಗಿ ಕೇಳಿದ್ರೆ, ಇಲ್ಲಪ್ಪ, ನಮ್ಮ ತಾತನ ಕಾಲದಿಂದ ನಾವೇ ಇಲ್ಲೇ ಉಳುಮೆ ಮಾಡ್ತಿರೋದು ಅಂತ ಜಗಳಕ್ಕೆ ಬರ್ತಾರೆ.ಇಂಥಾ ಟೈಮಲ್ಲಿ, ನಾವು ನಮ್ಮ ಜಮೀನಿನ ಹದ್ದುಬಸ್ತು ಅಂದ್ರೆ ಸರ್ವೆ ಮಾಡಿಸ್ತೀವಿ.

ಇದನ್ನೂ ಓದಿ: 10ನೇ ಕ್ಲಾಸ್ ಪಾಸಾಗಿದ್ದೀರಾ ಕೇವಲ 5000ರೂ ಬಂಡವಾಳ ಹಾಕಿ ಊರಲ್ಲೇ ಪೋಸ್ಟ್ ಆಫೀಸ್ ತೆಗೆದು ತಿಂಗಳಿಗೆ 80 ಸಾವಿರ ದುಡಿಯಿರಿ

ಹದ್ದುಬಸ್ತು ಅಂದ್ರೆ ಏನ್ರೀ

ನೋಡಿ ಅಣ್ಣಾ, ಹದ್ದುಬಸ್ತು ಅಂದ್ರೆ ನಮ್ಮ ಜಮೀನು ಎಲ್ಲಿಂದ ಎಲ್ಲಿಯವರೆಗೆ ಇದೆ ಅಂತ ಅಧಿಕೃತವಾಗಿ, ಸರ್ಕಾರದ ಲೆಕ್ಕದಲ್ಲಿಗಡಿಯನ್ನ ಗುರುತಿಸಿಕೊಳ್ಳೋದು.

ನಮ್ಮ ಕರ್ನಾಟಕ ಭೂ ಕಂದಾಯ ಕಾಯ್ದೆ (Karnataka Land Revenue Act) ಪ್ರಕಾರ ಪ್ರತಿಯೊಬ್ಬ ರೈತನಿಗೂ ತನ್ನ ಜಾಗದ ಅಳತೆ ಮಾಡಿಸ್ಕೊಳೋ ಸಂಪೂರ್ಣ ಹಕ್ಕಿದೆ. ಇದನ್ನ ಮಾಡಿಸೋದು ತುಂಬಾನೇ ಮುಖ್ಯ. ಯಾಕಂದ್ರೆ ಬಾಯಲ್ಲಿ ಎಷ್ಟೇ ಜಗಳ ಆಡಿದ್ರೂ, ದಾಖಲೆ ಇದ್ರೆ ಮಾತ್ರ ನಮಗೆ ಬೆಲೆ ಸಿಗೋದು.

ಸರ್ವೆ ಮಾಡಿಸೋದು ಹೇಗೆ

• ಇದಕ್ಕಾಗಿ ನಾವು ಮೊದಲು ನಾಡಕಚೇರಿಯಲ್ಲಿ ಅಥವಾ ಆನ್‌ಲೈನ್ ಮೂಲಕ ಸರ್ಕಾರಿ ಸರ್ವೆಯರ್‌ಗೆ ಅರ್ಜಿ ಹಾಕಬೇಕು.

• ಅರ್ಜಿ ಹಾಕಿದ್ಮೇಲೆ, ಅವರು ಬಂದು ನಮ್ಮ ಹಳೇ ಕಂದಾಯ ದಾಖಲೆಗಳನ್ನ ಕೇಳ್ತಾರೆ.

• ಮುಖ್ಯವಾಗಿ ಆಕಾರ್‌ಬಂದ್ ಟಿಪ್ಪಣಿ ಮತ್ತು ಪೋಡಿ ನಕ್ಷೆಗಳನ್ನ ಪರಿಶೀಲನೆ ಮಾಡ್ತಾರೆ.

• ಆ ಹಳೆಯ ನಕ್ಷೆಗಳ ಆಧಾರದ ಮೇಲೆ ಅಳತೆ ಮಾಡಿ, ಎಲ್ಲಿಂದ ಎಲ್ಲಿಗೆ ನಿಮ್ಮ ಜಾಗ ಅಂತ ಕಲ್ಲು ನೆಡ್ತಾರೆ. ಇದಕ್ಕೇ ಹದ್ದುಬಸ್ತು ಅನ್ನೋದು.

ಸರ್ವೆಯರ್ ಬರ್ತಾರೆ, ಅಳತೆ ಮಾಡ್ತಾರೆ

ಸರ್ವೆಯರ್ ಬರೋಕು ಮುಂಚೆ ಸುಮ್ನೆ ಬಂದು ಅಳೆದು ಹೋಗಲ್ಲ. ಪಕ್ಕದ ಹೊಲದವರಿಗೂ, ಅಕ್ಕಪಕ್ಕದ ಜಮೀನಿನ ಮಾಲೀಕರಿಗೂ ನೋಟಿಸ್ ಕೊಟ್ಟಿರ್ತಾರೆ. ಅವರೆಲ್ಲರ ಸಮಕ್ಷಮದಲ್ಲೇ ಬಂದು ಜಾಗ ಅಳೆದಾಗ, ನಮ್ಮ ಜಾಗನ ಪಕ್ಕದವ್ರು ಎಷ್ಟು ಗುಂಟೆ ಒತ್ತುವರಿ ಮಾಡಿದ್ದಾರೆ ಅಂತ ಗೊತ್ತಾಗುತ್ತೆ.

ಇದನ್ನ ಸರ್ವೆಯರ್ ಅವರು ಸರ್ವೆ ಸ್ಕೆಚ್ ಅಥವಾ ಹದ್ದುಬಸ್ತು ವರದಿ ಯಲ್ಲಿ ಸ್ಪಷ್ಟವಾಗಿ ಬರೆದುಕೊಡ್ತಾರೆ. ಇಷ್ಟು ಜಾಗ ಒತ್ತುವರಿಯಾಗಿದೆ ಅಂತ ಸೀಲ್ ಹಾಕಿ ಕೊಡ್ತಾರೆ.

ಹದ್ದಬಸ್ತಿಗಾಗಿ ಈಗಾಗಲೇ ಅರ್ಜಿ ತುಂಬಿದ್ದರೆ ಅರ್ಜಿ ಸ್ಥಿತಿಯನ್ನು ಪರಿಶೀಲಿಸಲು ಇಲ್ಲಿ ಕ್ಲಿಕ್ ಮಾಡಿ

ಒತ್ತುವರಿ ಆಗ್ಬಿಟ್ಟಿದೆ! ಮುಂದೇನು

ಸರ್ವೆಯರ್ ಬಂದು ಅಳತೆ ಮಾಡಿ, ಕಲ್ಲು ನೆಟ್ಟು, ನಿಮ್ಮ ಜಾಗ ಇಷ್ಟು ಗುಂಟೆ ಒತ್ತುವರಿ ಆಗಿದೆ ಬಿಡಿ ಅಂತ ಹೇಳಿ ಹೋದಾಗ ನಮಗೆ ಆಕಾಶ ಕಳಚಿ ಬಿದ್ದಂಗೆ ಆಗುತ್ತೆ. ನಮ್ಮ ಹೊಟ್ಟೆ ಉರಿಯುತ್ತೆ.ಇಲ್ಲೇ ನೋಡಿ ಅಸಲಿ ಆಟ, ಇಲ್ಲಾಂದ್ರೆ ಅಸಲಿ ತಕರಾರು ಶುರುವಾಗೋದು!

ಪಕ್ಕದ ಹೊಲದವರು ನಮ್ಮ ಜಾಗನ ನುಂಗಿ ನೀರು ಕುಡಿದಿರ್ತಾರೆ. ಸರ್ವೆ ರಿಪೋರ್ಟ್ ನಿಮ್ಮ ಪರವಾಗಿ ಬಂತು ಅಂದಾಕ್ಷಣ, ಅವರು ಅಷ್ಟು ಸುಲಭವಾಗಿ ತಗೋಳಪ್ಪಾ ನಿನ್ ಜಾಗ ಅಂತ ಬಿಟ್ಟುಕೊಡ್ತಾರಾ ಖಂಡಿತಾ ಇಲ್ಲವೇ ಇಲ್ಲ.ಅಲ್ಲಿ ಶುರುವಾಗುತ್ತೆ ನೋಡಿ ಅವರ ದೊಡ್ಡ ಧ್ವನಿಯ ವಾದ-ವಿವಾದಗಳು. ಜಾಗ ಬಿಡದಿರಲು ಅವರು ಏನೇನು ನೆಪ ಹೇಳ್ತಾರೆ ಗೊತ್ತಾ?

• ಹಳೇ ಕಥೆ: ಏನ್ರೀ, ನಮ್ಮ ತಾತ-ಮುತ್ತಾತನ ಕಾಲದಿಂದ, ಹತ್ತು-ಇಪ್ಪತ್ತು ವರ್ಷದಿಂದ ನಾವೇ ಇಲ್ಲೇ ಉಳುಮೆ ಮಾಡ್ಕೊಂಡು ಬಂದಿದೀವಿ. ಈಗ ದಿಢೀರ್ ಅಂತ ಜಾಗ ಬಿಡೋಕೆ ಆಗಲ್ಲ.

• ಭಾವನಾತ್ಮಕ ವಾದ: ನಾವು ಇಲ್ಲಿ ರಕ್ತ, ಬೆವರು ಸುರಿಸಿ ಮಣ್ಣು ಹದ ಮಾಡಿದ್ದೀವಿ, ಪ್ರಾಣ ಹೋದ್ರು ಒಂದು ಹಿಡಿ ಮಣ್ಣು ಕೂಡ ಬಿಡಲ್ಲ.

• ಅಧಿಕಾರಿಗಳ ಮೇಲೆ ಗೂಬೆ: ಈ ನಿಮ್ಮ ಸರ್ವೆಯರ್ ಮಾಡಿರೋ ರಿಪೋರ್ಟ್ ಪೂರ್ತಿ ಸುಳ್ಳು. ಕಾಸು ಇಸ್ಕೊಂಡು ನಿಮ್ ಕಡೆ ಬರ್ದಿದ್ದಾನೆ. ಈ ಕಚೇರಿ ಆಫೀಸರ್ ಗಳಿಗೆ ಏನಪ್ಪಾ ಗೊತ್ತು ನಮ್ಮೂರಿನ ಗಡಿಗಳ ಬಗ್ಗೆ?

ಹೀಗೆಲ್ಲಾ ಊರವರ ಮುಂದೆ ಏರುಧ್ವನಿಯಲ್ಲಿ ವಾದ ಮಾಡೋಕೆ ನಿಲ್ತಾರೆ. ತಮ್ಮದೇ ಸರಿ ಅಂತ ಸಾಧಿಸ್ತಾರೆ. ಕೆಲವೊಮ್ಮೆ ಪರಿಸ್ಥಿತಿ ನಮಗೆ ಇನ್ನಷ್ಟು ಸಂಕಟ ತರಿಸುವಂತೆ ಇರುತ್ತೆ. ಯಾಕಂದ್ರೆ, ಆ ಒತ್ತುವರಿ ಮಾಡಿರೋ ನಮ್ಮದೇ ಜಾಗದಲ್ಲಿ ಅವರು ಆಗ್ಲೇ ರಾಗಿ, ಜೋಳ ಬೆಳೆದಿರ್ತಾರೆ. ಅಥವಾ ಅಡಿಕೆ, ತೆಂಗಿನ ಸಸಿ ನೆಟ್ಟುಬಿಟ್ಟಿರ್ತಾರೆ.

ಇನ್ನೂ ಕೆಲವರು ಒಂದು ಹೆಜ್ಜೆ ಮುಂದೆ ಹೋಗಿ, ನಮ್ಮ ಕಣ್ಣೆದುರಿಗೆನೇ ಗಟ್ಟಿಯಾಗಿ ಸಿಮೆಂಟ್ ಕಂಬ ನೆಟ್ಟು, ಅದಕ್ಕೆ ತಂತಿ ಬೇಲಿ ಹಾಕಿ ಕಾಂಪೌಂಡ್ ತರಹ ಭದ್ರ ಮಾಡ್ಕೊಂಡಿರ್ತಾರೆ.

ನಮ್ಮದೇ ಜಾಗದಲ್ಲಿ ಬೇರೆಯವರು ಬೇಲಿ ಹಾಕಿದ್ದನ್ನ ನೋಡಿದಾಗ ನಮ್ಮ ರಕ್ತ ಕುದಿಯೋದು ಸಹಜ. ಆದ್ರೆ ಇಂಥಾ ಟೈಮಲ್ಲಿ ಕೋಪ ಮಾಡ್ಕೊಂಡು, ಕುಡುಗೋಲು ಹಿಡಿದು ಬೇಲಿ ಕಡಿಯೋಕೆ ಹೋಗಬಾರದು. ಇದನ್ನ ಕಾನೂನಿನ ಮೂಲಕವೇ ಮೆಟ್ಟಿ ನಿಲ್ಲಬೇಕು.

ಇದನ್ನೂ ಓದಿ: ಹಿರಿಯ ನಾಗರಿಕರ ಸೀನಿಯರ್ ಸಿಟಿಜನ್ ಕಾರ್ಡ್ ಇದ್ರೆ ಸಿಗುತ್ತೆ ವಿಐಪಿ ಮರ್ಯಾದೆ

ಸರ್ವೆಯರ್ ಬಂದು ಅಳೆದ ತಕ್ಷಣ ಜಾಗ ನಮ್ ಕೈಗೆ ಸಿಗಲ್ವಾ

ತುಂಬಾ ಜನ ರೈತರು ಇಲ್ಲೇ ಒಂಥರಾ ಗೊಂದಲಕ್ಕೆ ಬೀಳೋದು. ಜಾಗ ಅಳೆದ ತಕ್ಷಣ ಸರ್ವೆಯರ್ ಕೈಯೇ ಹಿಡ್ಕೊಂಡು, ಸಾರ್, ನೀವೇ ಅಳೆದು ಇದು ನಮ್ಮ ಜಾಗ ಅಂತ ಹೇಳಿದ್ರಲ್ಲ, ಆ ಪಕ್ಕದವನ್ನ ಎಬ್ಬಿಸಿ ನಮ್ಮ ಜಾಗ ನಮಗೆ ಬಿಡಿಸಿಕೊಡಿ ಅಂತ ಅವರಿಗೇ ಪಟ್ಟು ಹಿಡೀತಾರೆ.

ಆದ್ರೆ ಅಣ್ಣಾ, ನಾವಿಲ್ಲಿ ಒಂದು ವಿಷಯನ ಕಡ್ಡಾಯವಾಗಿ, ತಲೆಯಲ್ಲಿ ಅಚ್ಚಳಿಯದೆ ನೆನಪಿಟ್ಕೋಬೇಕು. ಸರ್ವೆಯರ್ ಅಂದ್ರೆ ಅವರೇನು ಖಾಕಿ ಬಟ್ಟೆ ಹಾಕಿರೋ ಪೋಲಿಸರಲ್ಲ!

ಅವರಿಗೂ ಕಾನೂನಿನಲ್ಲಿ ಕೆಲವೊಂದು ಮಿತಿಗಳಿರುತ್ತವೆ. ಅವರ ಕೆಲಸ ಏನು, ಅವರಿಗೆ ಯಾಕೆ ಪವರ್ ಇರಲ್ಲ ಅನ್ನೋದನ್ನ ಈ ಕೆಳಗೆ ಸ್ಪಷ್ಟವಾಗಿ ತಿಳ್ಕೊಳಿ:

• ಅವರ ಕೈಲಿ ಇರೋದು ಟೇಪು, ಲಾಠಿ ಅಲ್ಲ: ಸರ್ವೆಯರ್ ಕೆಲಸ ಬರೀ ನಿಮ್ಮ ಹಳೇ ದಾಖಲೆ ನೋಡಿ ಜಾಗ ಅಳೆಯೋದು. ಒತ್ತುವರಿ ಎಲ್ಲಿದೆ, ಎಷ್ಟು ಗುಂಟೆ ಹೋಗಿದೆ ಅಂತ ಕರಾರುವಾಕ್ಕಾಗಿ ನಕ್ಷೆಯಲ್ಲಿ (ಮ್ಯಾಪ್‌ನಲ್ಲಿ) ತೋರಿಸೋದು ಅಷ್ಟೇ.

• ಗಡಿ ಗುರುತಿಸ್ತಾರೆ, ಜಾಗ ಕೊಡಿಸಲ್ಲ: ನಿಮ್ಮ ಗಡಿ ಎಲ್ಲಿಗೆ ಮುಗಿಯುತ್ತೆ ಅಂತ ಕಲ್ಲು ನೆಟ್ಟು ಕೊಡ್ತಾರೆ. ಆದರೆ ಒತ್ತುವರಿ ಮಾಡಿರೋ ಪಕ್ಕದ ಹೊಲದವನ ಜೊತೆ ಜಗಳ ಆಡಿ, ಆ ಜಾಗನ ಖಾಲಿ ಮಾಡಿಸಿಕೊಡೋಕೆ ಬರೋದಿಲ್ಲ.

• ಒಕ್ಕಲೆಬ್ಬಿಸುವ ಪವರ್ ಇಲ್ಲ: ನಮ್ಮ ಜಾಗ ಒತ್ತುವರಿ ಮಾಡಿದವರನ್ನ ಕುತ್ತಿಗೆ ಪಟ್ಟಿ ಹಿಡಿದು, ಬಲವಂತವಾಗಿ ಆಚೆ ಹಾಕೋಕೆ ಸರ್ವೆಯರ್‌ಗೆ ಯಾವುದೇ ಅಧಿಕಾರ ಇರಲ್ಲ.

• ಬೇಲಿ ಕೀಳುವಂತಿಲ್ಲ: ಪಕ್ಕದವರು ನಿಮ್ಮ ಜಾಗದಲ್ಲಿ ದರ್ಪದಿಂದ ಹಾಕಿರೋ ಸಿಮೆಂಟ್ ಕಂಬದ ಬೇಲಿನೋ, ತಂತಿ ಬೇಲಿನೋ ಬಂದು ಕಿತ್ತುಹಾಕೋ ಪವರ್ ಕೂಡ ಸರ್ವೆಯರ್‌ಗೆ ಇರಲ್ಲ.

ನಮ್ಮ ಹಳ್ಳಿ ಭಾಷೆಯಲ್ಲಿ ಹೇಳ್ಬೇಕು ಅಂದ್ರೆ, ಸರ್ವೆಯರ್ ಬಂದು ಡಾಕ್ಟರ್ ತರಹ ರೋಗ (ಒತ್ತುವರಿ) ಎಲ್ಲಿದೆ ಅಂತ ಎಕ್ಸ್-ರೇ ರಿಪೋರ್ಟ್ ಕೊಡ್ತಾರೆ ಅಷ್ಟೇ. ಆದ್ರೆ ಆ ರೋಗಾನ ಗುಣ ಮಾಡೋಕೆ, ಅಂದ್ರೆ ಜಾಗಾನ ಬಿಡಿಸಿಕೊಳ್ಳೋಕೆ ನಾವು ಕಂದಾಯ ಇಲಾಖೆ ಅಥವಾ ಕೋರ್ಟ್ ಮೆಟ್ಟಿಲು ಹತ್ತಲೇಬೇಕು.

ಕಂದಾಯ ಇಲಾಖೆ ಮೆಟ್ಟಿಲು ಹತ್ತಿದ್ರೆ ಏನ್ ಪರಿಹಾರ ಸಿಗುತ್ತೆ

ಒಂದು ವೇಳೆ ಪಕ್ಕದ ಹೊಲದವ್ರು ಗಲಾಟೆ ಮಾಡಿ ಈ ಸರ್ವೆ ರಿಪೋರ್ಟ್ ನಾನೊಪ್ಪಲ್ಲ, ಇದು ಸುಳ್ಳು ಅಂತ ಕಿರಿಕ್ ಮಾಡಿದ್ರೆ  ಅಥವಾ ಸರ್ವೆಯರ್ ಏನಾದ್ರು ಲಂಚ ಇಸ್ಕೊಂಡು ಪಕ್ಕದವರ ಕಡೆ ವಾಲಿದ್ದಾರೆ, ನಮಗೆ ಮೋಸ ಆಗಿದೆ ಅಂತ ನಿಮಗೇ ಗುಮಾನಿ ಬಂದ್ರೆ

ಅಯ್ಯೋ ನಮ್ ಜಾಗ ಹೋಯ್ತಲ್ಲಾ ಅಂತ ಎದೆ ಬಡ್ಕೊಂಡು ಗಾಬರಿಯಾಗೋದು ಬೇಡವೇ ಬೇಡ. ಯಾಕಂದ್ರೆ ಕಂದಾಯ ಇಲಾಖೆಯಲ್ಲಿ ನಮಗೆ ನ್ಯಾಯ ಒದಗಿಸಿಕೊಡೋಕೆ ಮೇಲಧಿಕಾರಿಗಳು ಇರ್ತಾರೆ. ಅಲ್ಲಿ ನಾವು ಏನೇನು ಮಾಡಬಹುದು ಅನ್ನೋದನ್ನ ಇಲ್ಲಿ ನೋಡೋಣ.

• 60 ದಿನಗಳ ಟೈಮ್ ಇರುತ್ತೆ ನೋಡಿ: ಸರ್ವೆಯರ್ ಬಂದು ಅಳೆದು ರಿಪೋರ್ಟ್ (ಹದ್ದುಬಸ್ತು ವರದಿ) ಕೊಟ್ಟ ಮೇಲೆ, ನಮಗೆ ಕಂದಾಯ ಇಲಾಖೆಯ ಮೇಲಧಿಕಾರಿಗಳಿಗೆ (ಅಂದ್ರೆ ಎ.ಡಿ.ಎಲ್.ಆರ್ ಸಾಹೇಬ್ರಿಗೆ ಅಥವಾ ತಹಶೀಲ್ದಾರ್‌ಗೆ) ಮೇಲ್ಮನವಿ (Appeal) ಹಾಕೋಕೆ 60 ದಿನಗಳ ಕಾಲಾವಕಾಶ ಇರುತ್ತೆ. ಸ್ವಾಮಿ, ಈ ಸರ್ವೆ ಸರಿಯಾಗಿ ಆಗಿಲ್ಲ, ನಮಗೆ ಅನ್ಯಾಯ ಆಗಿದೆ ಅಂತ ಅವರ ಮುಂದೆ ಅರ್ಜಿ ಗುಜರಾಯಿಸಬಹುದು.

• ಮತ್ತೆ ಅಳತೆ ಮಾಡ್ತಾರೆ (ಮರು ಸರ್ವೆ): ನೀವು ಮೇಲ್ಮನವಿ ಹಾಕಿದ ತಕ್ಷಣ, ಆ ದೊಡ್ಡ ಅಧಿಕಾರಿಗಳು ಸುಮ್ಮನೆ ಕೂರಲ್ಲ. ನಿಮ್ಮ ಹಳೇ ಪಹಣಿ, ಆಕಾರ್‌ಬಂದ್, ಪೋಡಿ ನಕ್ಷೆ ಎಲ್ಲಾ ದಾಖಲೆಗಳನ್ನ ಮತ್ತೆ ಸರಿಯಾಗಿ ಕೂತು ಚೆಕ್ ಮಾಡ್ತಾರೆ. ಮೊದಲನೇ ಸರ್ವೆಯಲ್ಲಿ ಏನಾದ್ರೂ ಹೆಚ್ಚು ಕಮ್ಮಿ ಆಗಿದೆ ಅಂತ ಅವರಿಗೆ ಅನ್ನಿಸಿದ್ರೆ, ಮರು ಸರ್ವೆ’ಗೆ (Re-survey) ಆದೇಶ ಕೊಡ್ತಾರೆ. ಆಗ ಬೇರೆ ಸರ್ವೆಯರ್ ಬಂದು ಮತ್ತೊಮ್ಮೆ ನಿಖರವಾಗಿ ಅಳತೆ ಮಾಡ್ತಾರೆ.

• ನಿಮ್ಮ ಕೈ ಸೇರುತ್ತೆ ಬ್ರಹ್ಮಾಸ್ತ್ರ! (ಪ್ರಬಲ ಸಾಕ್ಷಿ): ಆ ಮೇಲಿನ ಆಫೀಸರ್‌ಗಳ ಮಟ್ಟದಲ್ಲೂ, ಮರು ಸರ್ವೆ ಮಾಡಿದಾಗ ಹೌದಪ್ಪಾ, ಪಕ್ಕದವರು ನಿಮ್ಮ ಜಾಗಾನ ಒತ್ತುವರಿ ಮಾಡಿದ್ದೇ ನಿಜ ಅಂತ ಖಚಿತವಾದರೆ ಸಾಕು. ಆ ಅಧಿಕೃತ ರಿಪೋರ್ಟ್ ನಿಮ್ಮ ಪಾಲಿನ ಬ್ರಹ್ಮಾಸ್ತ್ರ ಇದ್ದಂಗೆ!

ಮುಂದೆ ಪಕ್ಕದವ್ರು ಎಷ್ಟೇ ಹಾರಾಡಿದ್ರೂ, ನೀವು ಸಿವಿಲ್ ಕೋರ್ಟಿಗೆ ಹೋದಾಗ, ಈ ಕಂದಾಯ ಇಲಾಖೆಯ ಮೇಲಧಿಕಾರಿಗಳು ಕೊಟ್ಟಿರುವ ರಿಪೋರ್ಟ್ ನಿಮ್ಗೆ ಅತಿ ದೊಡ್ಡ ಸಾಕ್ಷಿ ಆಗುತ್ತೆ. ಆ ಸಾಕ್ಷಿಯನ್ನ ಮೀರಿ ಪಕ್ಕದವರು ಏನೂ ಮಾಡೋಕೆ ಆಗಲ್ಲ.

ಕೋರ್ಟ್ ಮೆಟ್ಟಿಲು ಹತ್ತೋದು ಯಾವಾಗ

ಕಂದಾಯ ಇಲಾಖೆ ಅಧಿಕಾರಿಗಳು ಬಂದು ಅಳೆದು, ಹೌದಪ್ಪ, ನಿಮ್ ಜಾಗ ಒತ್ತುವರಿ ಆಗಿರೋದು ನಿಜ ಅಂತ ಪಕ್ಕಾ ಸರ್ವೆ ರಿಪೋರ್ಟ್ ಕೊಟ್ರು ಅಂದ್ಕೊಳ್ಳಿ. ಆದ್ರೂ ಕೆಲವರು ಪಕ್ಕದ ಹೊಲದವರು ಅಷ್ಟು ಸುಲಭವಾಗಿ ಜಾಗ ಬಿಡಲ್ಲ.

ಊರಲ್ಲಿರೋ ರಾಜಕೀಯ ಬಲವೋ, ಆಸ್ತಿ-ದುಡ್ಡಿನ ಕೊಬ್ಬೋ… ಸುಮ್ಸುಮ್ನೆ ನಮಗೆ ಅಡ್ಡಿ ಮಾಡ್ತಾರೆ. ನಾನಂತೂ ಜಾಗ ಬಿಡಲ್ಲ, ಏನ್ ಮಾಡ್ಕೊಂತೀಯಾ ಮಾಡ್ಕೋ ಹೋಗು ಅಂತ ಊರ ಮಧ್ಯೆ ನಿಂತು ದರ್ಪ ತೋರಿಸ್ತಾರೆ.

• ಗಲಾಟೆ, ಹೊಡೆದಾಟ ಬೇಡವೇ ಬೇಡ: ಇಂಥಾ ಟೈಮಲ್ಲಿ ನಮಗೂ ಸಹಜವಾಗಿ ರಕ್ತ ಕುದಿಯುತ್ತೆ. ಹಾಗಂತ ಕತ್ತಿ, ಮಚ್ಚು, ಕುಡುಗೋಲು ತಗೊಂಡು ಹೊಡೆದಾಟಕ್ಕೆ ಹೋಗ್ಬೇಕಾ ತಲೆ ಒಡ್ಕೊಂಡು ಪೋಲಿಸ್ ಸ್ಟೇಷನ್, ಜೈಲು ಅಂತ ಅಲೀಬೇಕಾ ಖಂಡಿತಾ ಬೇಡವೇ ಬೇಡ ಅಣ್ಣಾ. ಕ್ಷಣದ ಕೋಪಕ್ಕೆ ನಮ್ಮ ಜೀವನಾನೇ ಹಾಳು ಮಾಡ್ಕೋಬಾರದು.

• ನ್ಯಾಯಾಲಯವೇ ನಮಗಿರೋ ದೊಡ್ಡ ಆಸರೆ: ಜಗಳ ಆಡೋ ಬದಲು, ನಾವು ನೇರವಾಗಿ ನಮ್ಮ ತಾಲೂಕಿನ ಸಿವಿಲ್ ನ್ಯಾಯಾಲಯ ದ (Civil Court) ಮೊರೆ ಹೋಗ್ಬೇಕು. ಕಾಗದ ಪತ್ರಗಳು ನಮ್ಮ ಕಡೆ ಸರಿಯಾಗಿದ್ರೆ ಕೋರ್ಟ್ ನಮಗೆ ತಾಯಿಗಿಂತ ಹೆಚ್ಚಾಗಿ ನ್ಯಾಯ ಕೊಡುತ್ತೆ.

• ಒಳ್ಳೆ ಲಾಯರ್ ಹಿಡಿಯಿರಿ: ಸಿವಿಲ್ ಕೋರ್ಟ್‌ಗೆ ಹೋಗಿ, ಊರಲ್ಲಿ ಸ್ವಲ್ಪ ಹೆಸರು ಮಾಡಿರೋ, ಪ್ರಾಮಾಣಿಕರಾದ ಒಬ್ಬ ಒಳ್ಳೆ ಲಾಯರ್ (ವಕೀಲರು) ಹಿಡಿಯಬೇಕು.

ಅವರಿಗೆ ನಮ್ಮ ಹತ್ತಿರ ಇರೋ ಹದ್ದುಬಸ್ತು ರಿಪೋರ್ಟ್ ಕೊಟ್ಟು, ನೋಡಿ ಸಾರ್, ಈ ತರ ನಮಗೆ ಅನ್ಯಾಯ ಆಗ್ತಿದೆ ಅಂತ ಬಿಡಿಸಿ ಹೇಳಬೇಕು. ಆಗ ನಾವು ಕೋರ್ಟ್ ಮುಖಾಂತರ ಆ ಒತ್ತುವರಿ ಮಾಡಿರೋರ ವಿರುದ್ಧ ಮೂರು ತರಹದ ಪ್ರಬಲ ಪರಿಹಾರಗಳನ್ನ (ಕಾನೂನಿನ 3 ಅಸ್ತ್ರಗಳು) ನ್ಯಾಯಾಧೀಶರ ಮುಂದೆ ಕೇಳಬಹುದು.

ಇದನ್ನೂ ಓದಿ: ರೈತರಿಗೊಂದು ಬಂಪರ್ ಆಫರ್ ಬರೀ 20% ದುಡ್ಡು ಕೊಡಿ 80% ಸಬ್ಸಿಡೀಲಿ ಸೋಲಾರ್ ಪಂಪ್ ನಿಮ್ಮದಾಗಿಸಿಕೊಳ್ಳಿ.

ಕೋರ್ಟಲ್ಲಿ ಮೂರು ಬ್ರಹ್ಮಾಸ್ತ್ರಗಳು

ನಮ್ಮ ಜಾಗ ವಾಪಸ್ ಪಡೆಯೋಕೆ ಕಾನೂನಿನಲ್ಲಿ ಈ ಮೂರು ದಾರಿಗಳಿವೆ:

• ಸ್ವಿಟ್ ಫಾರ್ ಪೊಸೆಶನ್ (Suit for Possession): ಸ್ವಾಮಿ ನ್ಯಾಯಾಧೀಶರೇ, ಇದು ನನ್ನ ಹಕ್ಕಿನ ಜಾಗ. ಅವರು ಒತ್ತುವರಿ ಮಾಡಿ ವಶಪಡಿಸಿಕೊಂಡಿದ್ದಾರೆ. ಅದನ್ನ ನನಗೆ ವಾಪಸ್ ಕೊಡಿಸಿ ಅಂತ ಕೋರ್ಟ್ಗೆ ನೇರವಾಗಿ ಕೇಳೋದು.

• ಮ್ಯಾಂಡೇಟರಿ ಇಂಜಂಕ್ಷನ್ (Mandatory Injunction): ಒಂದು ವೇಳೆ ಪಕ್ಕದವರು ದಬ್ಬಾಳಿಕೆ ಮಾಡಿ ನಿಮ್ಮ ಜಾಗದಲ್ಲಿ ಏನಾದ್ರು ಶೆಡ್ ಹಾಕಿದ್ರೆ, ಕೊಟ್ಟಿಗೆ ಕಟ್ಟಿದ್ರೆ ಅಥವಾ ಸಿಮೆಂಟ್ ಕಂಬದ ಬೇಲಿ ಹಾಕಿದ್ರೆ, ಅದನ್ನ ಕಿತ್ತುಹಾಕಲು ಕೋರ್ಟ್ ಮೂಲಕ ಆದೇಶ (Order) ತರೋದು.

• ಪರ್ಮನೆಂಟ್ ಇಂಜಂಕ್ಷನ್ (Permanent Injunction): ಮುಂದೆಂದೂ ಅವರು ನಮ್ಮ ಜಮೀನಿನ ಕಡೆ ತಲೆ ಹಾಕಬಾರದು, ನಮ್ಮ ಜಮೀನಿನೊಳಗೆ ಕಾಲಿಟ್ಟು ಉಸಾಬರಿ ಮಾಡಬಾರದು ಅಂತ ಶಾಶ್ವತವಾಗಿ ತಡೆಯಾಜ್ಞೆ (Stay) ತರೋದು.

ಕೋರ್ಟ್ ಕಮಿಷನರ್ ಅಂದ್ರೆ ಯಾರು? ಅವರ ಪಾತ್ರವೇನು

ನಾವು ಕಂದಾಯ ಇಲಾಖೆಯಿಂದ ಮಾಡ್ಸಿರೋ ಹದ್ದುಬಸ್ತು ವರದಿ ಇದೆಯಲ್ಲ, ಅದೇ ಕೋರ್ಟಿನಲ್ಲಿ ನಮಗೆ ಆನೆ ಬಲ ನ್ಯಾಯಾಧೀಶರ (ಜಡ್ಜ್) ಮುಂದೆ ಅದೇ ನಮಗಿರೋ ಅತಿ ದೊಡ್ಡ ಸಾಕ್ಷಿ.

ಆದರೂ ಪಕ್ಕದ ಹೊಲದವ್ರು ಸುಮ್ಮನಿರ್ತಾರಾ? ಇಲ್ಲಾ ಸ್ವಾಮಿ, ಆ ಸರ್ವೆಯರ್ ಲಂಚ ತಿಂದಿದ್ದಾನೆ, ಆ ರಿಪೋರ್ಟ್ ಪೂರ್ತಿ ಸುಳ್ಳು ಅಂತ ಜಡ್ಜ್ ಮುಂದೇನೇ ತಗಾದೆ ತೆಗೀತಾರೆ, ಏನೇನೋ ಸುಳ್ಳು ಕಥೆ ಕಟ್ತಾರೆ. ಆಗ ನಮ್ಮ ನ್ಯಾಯಾಲಯ ಒಂದು ಭರ್ಜರಿ ಕೆಲಸ ಮಾಡುತ್ತೆ:

• ನ್ಯಾಯಾಧೀಶರ ದಿಟ್ಟ ಹೆಜ್ಜೆ: ಪಕ್ಕದವ್ರು ಸುಳ್ಳು ಹೇಳ್ತಿದ್ದಾರೆ ಅಂತ ಗೊತ್ತಾದಾಗ, ಜಡ್ಜ್ ಸಾಹೇಬ್ರು ಸುಮ್ನೆ ಕೂರಲ್ಲ. ಹೌದಾ ಹಾಗಾದ್ರೆ ಕೋರ್ಟ್ ಕಡೆಯಿಂದಲೇ ಒಬ್ಬರನ್ನ ಕಳಿಸ್ತೀನಿ, ಅವರೇ ಖುದ್ದಾಗಿ ಹೋಗಿ ನೋಡ್ಕೊಂಡು ಬರ್ಲಿ ಅಂತಾರೆ. ಅವರನ್ನೇ ಕೋರ್ಟ್ ಕಮಿಷನರ್ (Court Commissioner) ಅಂತ ಕರೆಯೋದು.

• ಸ್ಥಳ ಪರಿಶೀಲನೆ: ಈ ಕೋರ್ಟ್ ಕಮಿಷನರ್ ಅಂದ್ರೆ ಕೋರ್ಟಿನ ಕಡೆಯಿಂದ ಬರೋ ಒಬ್ಬ ಅಧಿಕೃತ ವಕೀಲರು. ಅವರು ಸರ್ವೆಯರ್‌ನ ಕರಕೊಂಡು ನೇರವಾಗಿ ನಿಮ್ಮ ಹೊಲದ ಹತ್ರನೇ ಬರ್ತಾರೆ.

• ಮತ್ತೆ ಅಳತೆ: ಊರವರ, ಮತ್ತು ಆ ಪಕ್ಕದವನ ಮುಂದೆಯೇ ನಿಂತು, ಟೇಪು ಹಿಡಿಸಿ ಜಾಗವನ್ನ ಅಡಿಯಿಂದ ಮುಡಿವರೆಗೆ ಮತ್ತೊಮ್ಮೆ ಪಕ್ಕಾ ಆಗಿ ಅಳತೆ ಮಾಡಿಸ್ತಾರೆ.

ಸಾಕ್ಷಿ ಹೆಂಗೆ ರೆಡಿ ಆಗುತ್ತೆ ಗೊತ್ತಾ?

ಬರೀ ಅಳತೆ ಮಾಡೋದು ಅಷ್ಟೇ ಅಲ್ಲ, ಅಲ್ಲೇ ನಿಂತು ವಿಡಿಯೋ ಮಾಡ್ತಾರೆ. ಪಕ್ಕದವ್ರು ಎಷ್ಟು ಜಾಗ ನುಂಗಿದ್ದಾರೆ, ಅಲ್ಲಿ ಏನ್ ಬೆಳೆ ಹಾಕಿದ್ದಾರೆ, ಕೊಟ್ಟಿಗೆ ಕಟ್ಟಿದ್ದಾರಾ ಅಥವಾ ಬೇಲಿ ಹಾಕಿದ್ದಾರಾ ಅಂತ ಪ್ರತಿಯೊಂದನ್ನೂ ಫೋಟೋ-ವಿಡಿಯೋ ತೆಗೆದು ಸಾಕ್ಷಿ ರೆಡಿ ಮಾಡ್ತಾರೆ.

ಈ ಸತ್ಯಾಂಶನೆಲ್ಲಾ ಬರೆದು ಕೋರ್ಟ್ ಕಮಿಷನರ್ ಅವರು ನೇರವಾಗಿ ಜಡ್ಜ್‌ಗೆ ರಿಪೋರ್ಟ್ ಕೊಡ್ತಾರೆ.

ಒಮ್ಮೆ ಕೋರ್ಟ್ ಕಮಿಷನರ್ ರಿಪೋರ್ಟ್ ಜಡ್ಜ್ ಕೈ ಸೇರಿ, ಅದ್ರಲ್ಲಿ “ಒತ್ತುವರಿ ಆಗಿರೋದು ನಿಜ” ಅಂತ ಇದ್ರೆ ಮುಗೀತು ಕಥೆ! ಪಕ್ಕದವನ ಆಟ ಅಲ್ಲಿಗೆ ಕ್ಲೋಸ್. ನ್ಯಾಯ ದೇವತೆ ನಿಮ್ಮ ಪರವಾಗಿಯೇ ನಿಲ್ತಾಳೆ, ಖಂಡಿತಾ ತೀರ್ಪು ನಿಮ್ಮ ಪರವಾಗಿಯೇ ಬಂದು, ನಿಮ್ಮ ಜಾಗ ನಿಮಗೆ ವಾಪಸ್ ಸಿಗುತ್ತೆ!

ಪೋಲಿಸ್ ಠಾಣೆಗೆ ಹೋಗ್ಬೋದಾ

ತುಂಬಾ ಜನ ರೈತರು ಕೇಳೋದು ಒಂದೇ ಪ್ರಶ್ನೆ – ಸಾರ್, ನಮ್ ಜಾಗನ ಅವರು ಗುಳುಂ ಮಾಡಿದ್ದಾರೆ. ನಮ್ಗೆ ಅನ್ಯಾಯ ಆಗಿದೆ. ನಾವು ನೇರವಾಗಿ ಪೋಲಿಸ್ ಠಾಣೆಗೆ ಹೋಗಿ ಕಂಪ್ಲೇಂಟ್ ಕೊಡಬಹುದಾ? ಪೋಲಿಸರು ಬಂದು ಹೊಡ್ದು ಬಡ್ದು ಜಾಗ ಖಾಲಿ ಮಾಡಿಸ್ತಾರಾ?”

• ನೋಡಿ ಅಣ್ಣಾ, ಭೂಮಿ ವಿವಾದಗಳು ‘ಸಿವಿಲ್’ (Civil) ಸ್ವರೂಪದಲ್ಲಿ ಇರುತ್ತೆ.

• ಅಂದ್ರೆ ಪೋಲಿಸರು ಬಂದು ನೇರವಾಗಿ ಜಾಗ ಖಾಲಿ ಮಾಡಿಸೋಕೆ ಬರಲ್ಲ. ಜಾಗದ ಮಾಲೀಕತ್ವ ಯಾರು ಅಂತ ನಿರ್ಧಾರ ಮಾಡೋದು ಕಂದಾಯ ಇಲಾಖೆ ಅಥವಾ ಕೋರ್ಟ್ ಮಾತ್ರ.

• ಪೋಲಿಸರು ಬಂದ್ರೂ ಇದನ್ನ ನೀವು ಕೋರ್ಟಿನಲ್ಲೇ ಬಗೆಹರಿಸ್ಕೊಳ್ಳಿ ಅಂತ ಹೇಳ್ತಾರೆ.

ಪೋಲಿಸರು ಬರೋದು ಯಾವಾಗ

ಆದ್ರೆ, ಪಕ್ಕದ ಹೊಲದವರು ನಿಮ್ಮ ಮೈಮೇಲೆ ಬರ್ತಿದ್ರೆ, ಮಾರಣಾಂತಿಕ ಜೀವ ಬೆದರಿಕೆ ಹಾಕ್ತಿದ್ರೆ, ಆಯುಧ ಹಿಡ್ಕೊಂಡು ಬಂದ್ರೆ ಪೋಲಿಸರ ಸಹಾಯ ಪಡೀಬಹುದು.ಅಥವಾ ಹೊಡೆದಾಟಕ್ಕೆ ಬಂದು ರಂಪಾಟ ಮಾಡ್ತಿದ್ರೆ, ನಿಮ್ಮ ಬೆಳೆಗೆ ಬೆಂಕಿ ಹಚ್ಚಿದ್ರೆ, ಟ್ರ್ಯಾಕ್ಟರ್ ತಂದು ಬೆಳೆ ನಾಶ ಮಾಡಿದ್ರೆ ನೀವು ಸುಮ್ಮನಿರಬಾರದು.

ಆವಾಗ ನೀವು ಊರಿನ ಶಾಂತಿ ಕಾಪಾಡೋಕೆ, ನಿಮ್ಮ ಪ್ರಾಣ ರಕ್ಷಣೆಗೆ ಖಂಡಿತಾ ಪೋಲಿಸ್ ಕಂಪ್ಲೇಂಟ್ (FIR) ಕೊಡಬಹುದು. ಆಗ ಪೋಲಿಸರು ಆಕ್ಷನ್ ತಗೋತಾರೆ.

ಮುಂದಾಗೋ ಅನಾಹುತ ತಪ್ಪಿಸೋದು ಹೆಂಗೆ

ಮುಂದೆ ಇಂಥಾ ಕಿರಿಕ್ ಬರಬಾರದು, ನಮ್ಮ ಮಕ್ಕಳು-ಮೊಮ್ಮಕ್ಕಳು ನೆಮ್ಮದಿಯಾಗಿ ವ್ಯವಸಾಯ ಮಾಡ್ಕೊಂಡು ಹೋಗ್ಬೇಕು ಅಂದ್ರೆ ನಾವೆಲ್ಲಾ ಈ ಕೆಲವು ಮುಂಜಾಗ್ರತಾ ಕೆಲಸಗಳನ್ನ ಮಾಡ್ಲೇಬೇಕು:

• ದಾಖಲೆಗಳ ಪರಿಶೀಲನೆ: ಪ್ರತಿ ವರ್ಷ ನಿಮ್ಮ ಜಮೀನಿನ ಪಹಣಿ (RTC) ಮತ್ತು ಮ್ಯುಟೇಶನ್ ದಾಖಲೆಗಳನ್ನ ನಾಡಕಚೇರಿಯಲ್ಲಿ ಅಥವಾ ಮೊಬೈಲ್‌ನಲ್ಲೇ ಆನ್‌ಲೈನ್‌ನಲ್ಲಿ ತೆಗೆದು ನೋಡ್ತಾ ಇರಿ.

• ಹೆಸರು ಚೆಕ್ ಮಾಡಿ: ನಿಮ್ಮ ಹೆಸರಿನ ಜೊತೆ ಬೇರೆಯವರ ಹೆಸರು ಸೇರಿಕೊಂಡಿದ್ಯಾ? ವಿಸ್ತೀರ್ಣ ಕಡಿಮೆಯಾಗಿದ್ಯಾ ಅಂತ ಕಣ್ಣಿಟ್ಟಿರಿ.

• ಗಡಿ ಭದ್ರತೆ: ನಿಮ್ಮ ಜಮೀನಿನ ಹದ್ದುಬಸ್ತು ಆದ ತಕ್ಷಣ, ಸುತ್ತಲೂ ಸರ್ಕಾರಿ ಸರ್ವೆ ಕಲ್ಲುಗಳನ್ನ ನೆಡಿರಿ.

• ಬೇಲಿ ಹಾಕಿ: ಸಾಧ್ಯವಾದರೆ ಸಾಲ ಮಾಡಿಯಾದ್ರೂ ಭದ್ರವಾದ ತಂತಿ ಬೇಲಿ ಹಾಕ್ಸಿ. ಗಡಿ ಸ್ಪಷ್ಟವಾಗಿದ್ರೆ, ಬೇಲಿ ಗಟ್ಟಿಯಾಗಿದ್ರೆ ಯಾರೂ ಒಳಗೆ ಕಾಲಿಡಲ್ಲ.

ಕಾನೂನು ಕೈಗೆತ್ತಿಕೊಳ್ಳಬೇಡಿ

ಜಾಗದ ವಿಚಾರ ಅಂದಾಗ, ನಮ್ ಕಣ್ಣೆದುರೇ ನಮ್ ಹೊಲನ ಬೇರೆಯವ್ರು ಉಳುಮೆ ಮಾಡ್ತಿದ್ರೆ ಯಾರಿಗೆ ತಾನೇ ಸಿಟ್ಟು ಬರಲ್ಲ ಹೇಳಿ? ಮೈಯೆಲ್ಲಾ ಉರಿದು, ರಕ್ತ ಕುದಿಯೋದು ಸಹಜ. ಆದ್ರೆ ಅಣ್ಣಾ, ಎಷ್ಟೇ ಗಲಾಟೆ ಆದ್ರೂ, ಎಷ್ಟೇ ಪ್ರಚೋದನೆ ಮಾಡಿದ್ರೂ ದಯವಿಟ್ಟು ಕಾನೂನನ್ನ ಮಾತ್ರ ನಿಮ್ಮ ಕೈಗೆ ತಗೋಬೇಡಿ.

ಅದ್ಯಾಕೆ ಹಿಂಗೆ ಹೇಳ್ತಿದೀನಿ ಅಂದ್ರೆ:

• ಕ್ಷಣದ ಕೋಪ, ಜೀವನ ಪೂರ್ತಿ ಪಾಪ: ಕೋಪದ ಕೈಗೆ ಬುದ್ಧಿ ಕೊಟ್ಟು, ಕೈಗೆ ಸಿಕ್ಕಿದ್ದನ್ನ ಹಿಡ್ಕೊಂಡು ಹೊಡೆದಾಟಕ್ಕೆ ಇಳಿಯಬೇಡಿ. ಮಚ್ಚು, ಕುಡುಗೋಲು, ದೊಣ್ಣೆ ತಗೊಂಡು ಅವರ ಮೈಮೇಲೆ ಹೋಗೋದು, ಅಥವಾ ಅವರ ಹೊಲದ ಬೆಳೆ ನಾಶ ಮಾಡೋದು, ಬೇಲಿ ಕಿತ್ತು ಹಾಕೋದು ಮಾಡಲೇಬಾರದು.

• ಪೋಲಿಸ್ ಕೇಸ್ ಆದ್ರೆ ಮುಗೀತು ಕಥೆ: ಒಮ್ಮೆ ಕೈ-ಕೈ ಮಿಲಾಯಿಸಿ, ಗಲಾಟೆ ದೊಡ್ಡದಾಗಿ ನಿಮ್ಮ ಮೇಲೆ ಪೋಲಿಸ್ ಸ್ಟೇಷನ್‌ನಲ್ಲಿ ಕ್ರಿಮಿನಲ್ (FIR) ಕೇಸ್ ಬಿತ್ತು ಅಂದ್ರೆ, ಆಮೇಲೆ ನಿಮ್ಮ ನೆಮ್ಮದಿ ಹಾಳಾದಂತೆಯೇ ಲೆಕ್ಕ. ಪೋಲಿಸ್ ಸ್ಟೇಷನ್, ಜೈಲು ಅಂತ ಅಲೀಬೇಕಾಗುತ್ತೆ.

• ಇರೋ ಹೊಲನೂ ಮಾರಿಕೊಳ್ಳೋ ಪರಿಸ್ಥಿತಿ: ಆಮೇಲೆ ಆ ಕ್ರಿಮಿನಲ್ ಕೇಸ್ ಇಂದ ಆಚೆ ಬರೋಕೆ, ಲಾಯರ್ ಫೀಸ್ ಕಟ್ಟೋಕೆ, ಕೋರ್ಟಿಗೆ ಅಲೆದಾಡೋಕೆ, ಆಫೀಸರ್‌ಗಳಿಗೆ ಅಡ್ಡಾಡೋಕೆ ಅಂತ ಮಾಡಬಾರದ ಸಾಲ ಮಾಡಿ, ಕೊನೆಗೆ ‘ಇರೋ ಉಳಿದ ಜಮೀನನ್ನೂ’ ಮಾರಿಕೊಳ್ಳೋ ಪರಿಸ್ಥಿತಿ ಬರುತ್ತೆ. ನಮ್ ಸಂಸಾರ ಬೀದಿಗೆ ಬಂದುಬಿಡುತ್ತೆ.

ಅದಕ್ಕೆ ಹಿರಿಯರು ಹೇಳೋದು  ತಾಳಿದವನು ಬಾಳಿಯಾನು ಅಂತ. ಎಷ್ಟೇ ಅನ್ಯಾಯ ಆದ್ರೂ ಸರಿ, ನಿಮ್ಮ ಹತ್ತಿರ ಪಕ್ಕಾ ದಾಖಲೆ (ಹದ್ದುಬಸ್ತು ರಿಪೋರ್ಟ್) ಇದ್ಯಾ ಹಾಗಾದ್ರೆ ತಲೆ ಎತ್ತಿ ಲಾಯರ್ ಮುಖಾಂತರ ಕೋರ್ಟ್‌ನಲ್ಲೇ ನ್ಯಾಯಯುತವಾಗಿ, ತಾಳ್ಮೆಯಿಂದ ಹೋರಾಡಿ. ಕಾನೂನು ಯಾವತ್ತೂ ಸತ್ಯದ ಪರವಾಗೇ ಇರುತ್ತೆ.

ಇದನ್ನೂ ಓದಿ: ಬ್ಯಾಂಕ್ FD ಗಿಂತ ಜಾಸ್ತಿ ಲಾಭ ಒಂದು ರೂಪಾಯಿ ರಿಸ್ಕ್ ಇಲ್ಲದೆ ಹಣ ಬೆಳೆಸುವ 9 ಬೆಸ್ಟ್ ಸ್ಕೀಮ್‌ಗಳು

ಭೂಮಿತಾಯಿ ಯಾವತ್ತೂ ಕೈ ಬಿಡಲ್ಲ

ರೈತ ಬಾಂಧವರೇ, ಕೊನೆಯದಾಗಿ ಒಂದು ಮಾತು. ನಮಗೆಲ್ಲಾ ಗೊತ್ತಿರೋ ಹಾಗೆ, ಈ ಜಮೀನು ಅನ್ನೋದು ಬರೀ ಮಣ್ಣಲ್ಲ. ಅದು ನಮಗೆ ಅನ್ನ ಹಾಕೋ ಹೆತ್ತ ತಾಯಿ ಇದ್ದ ಹಾಗೆ. ತಾಯಿನ ನಾವು ಹೆಂಗೆ ಪ್ರೀತಿಯಿಂದ ಕಾಪಾಡ್ಕೊಳ್ತೀವೋ, ಅದೇ ರೀತಿ ನಮ್ಮ ಹೊಲದ ಗಡಿಯನ್ನೂ ನಾವು ಎಚ್ಚರಿಕೆಯಿಂದ ಕಾಪಾಡ್ಕೋಬೇಕು.

ನಿಮ್ಮ ಹತ್ತಿರ ಹಳೇ ಪಹಣಿ, ಆಕಾರ್‌ಬಂದ್ ತರಹದ ಪಕ್ಕಾ ದಾಖಲೆಗಳು ಇದ್ದು, ನೀವು ಪ್ರಾಮಾಣಿಕರಾಗಿದ್ರೆ ಸಾಕು. ಕಾನೂನು ಮತ್ತು ನ್ಯಾಯ ದೇವತೆ ಯಾವತ್ತೂ ನಿಮ್ಮ ಪರವಾಗೇ ಇರುತ್ತೆ.

• ಎದೆಗುಂದಬೇಡಿ: ಅಯ್ಯೋ ನಮ್ ಜಾಗ ಒತ್ತುವರಿಯಾಯ್ತಲ್ಲ, ಪಕ್ಕದವ್ರು ಊರಲ್ಲಿ ತುಂಬಾ ಪವರ್‌ಫುಲ್ ಆಗಿದ್ದಾರೆ, ದೊಡ್ಡ ಕುಳಗಳು ಅಂತ ದಯವಿಟ್ಟು ಧೃತಿಗೆಡಬೇಡಿ.

• ತಾಳ್ಮೆ ಇರಲಿ: ಸರಿಯಾದ ದಾರಿಯಲ್ಲಿ ಹೋಗಿ. ಸ್ವಲ್ಪ ತಾಳ್ಮೆ ಇಟ್ಕೊಂಡು, ಒಬ್ಬ ಒಳ್ಳೆ ಲಾಯರ್ ಮುಖಾಂತರ ಕೋರ್ಟ್‌ನಲ್ಲಿ ಹೋರಾಡಿ. ಖಂಡಿತವಾಗಿಯೂ ನಿಮ್ಮ ಭೂಮಿತಾಯಿ ನಿಮ್ಮ ಮಡಿಲಿಗೆ ವಾಪಸ್ ಬಂದೇ ಬರ್ತಾಳೆ.

ಮಾಹಿತಿ ಹಂಚಿ, ಜಾಗೃತಿ ಮೂಡಿಸಿ:

ಈಗ ನೀವು ಓದಿದ ಈ ಉಪಯುಕ್ತ ಕಾನೂನು ಮಾಹಿತಿ ಬರೀ ನಿಮ್ಮ ಹತ್ತಿರ ಮಾತ್ರ ಇದ್ರೆ ಸಾಲದು. ನಮ್ಮ ಹಳ್ಳಿಯ, ನಾಡಿನ ಪ್ರತಿಯೊಬ್ಬ ಮುಗ್ಧ ರೈತನಿಗೂ ಇದು ತಲುಪಬೇಕು.

• ದಯವಿಟ್ಟು ನಿಮ್ಮ ಅಕ್ಕಪಕ್ಕದ ರೈತ ಸ್ನೇಹಿತರಿಗೆ, ನಿಮ್ಮ ಊರಿನ ವಾಟ್ಸಾಪ್ (WhatsApp) ಮತ್ತು ಫೇಸ್‌ಬುಕ್ ಗ್ರೂಪ್‌ಗಳಿಗೆ ಈ ಲೇಖನವನ್ನ ತಪ್ಪದೇ ಶೇರ್ ಮಾಡಿ.

• ಯಾಕಂದ್ರೆ, ಗಲಾಟೆ ಮಾಡೋ ಕತ್ತಿ-ದೊಣ್ಣೆಗಳಿಗಿಂತ, ‘ಕಾನೂನಿನ ಅರಿವೇ’ ನಮ್ಮ ರೈತರ ಅಸಲಿ ಶಕ್ತಿ.

ನಿಮ್ಮ ಹೊಲದ ಗಡಿ ಬಗ್ಗೆ ಏನಾದ್ರೂ ಅನುಮಾನ ಇದ್ರೆ, ಇವತ್ತೇ ನಾಡಕಚೇರಿಗೆ ಹೋಗಿ ಅಥವಾ ಆನ್‌ಲೈನ್‌ನಲ್ಲಿ ನಿಮ್ಮ ಜಮೀನಿನ ಹಳೇ ದಾಖಲೆಗಳನ್ನ ಒಮ್ಮೆ ಸರಿಯಾಗಿ ಚೆಕ್ ಮಾಡ್ಕೊಳ್ಳಿ. ಮತ್ತೊಂದು ಉಪಯುಕ್ತ ಮಾಹಿತಿಯೊಂದಿಗೆ ಸಿಗೋಣ. ಎಲ್ಲರಿಗೂ ಒಳ್ಳೆಯದಾಗಲಿ, ನಮಸ್ಕಾರ