ಭರ್ಜರಿ ಗುಡ್ ನ್ಯೂಸ್ 11E ಸ್ಕೆಚ್ ಅಂದ್ರೇನು ಕೃಷಿ ಜಮೀನಿಗೂ ಸರ್ಕಾರದ ಪ್ಲಾನ್ ರಿಜಿಸ್ಟ್ರೇಷನ್‌ಗೆ ಇದು ಯಾಕೆ ಕಡ್ಡಾಯ

ನಮ್ಮ ಹಳ್ಳಿ ಕಡೆ ಒಂದು ಮಾತಿದೆ, ಭೂಮಿ ಅನ್ನೋದು ಬರೀ ಮಣ್ಣಲ್ಲ, ಅದೊಂದು ಜೀವ ಅಂತ. ನಮ್ಮ ಪಾಲಿಗೆ ಜಮೀನು ಅಂದ್ರೆ ಅದು ಹೆತ್ತ ತಾಯಿ ಇದ್ದ ಹಾಗೆ.

ಯಾರೂ ಕೂಡ ಖುಷಿಯಿಂದ ಜಮೀನು ಮಾರಾಟ ಮಾಡಲ್ಲ. ಮಳೆಯಿಲ್ಲದೆ ಬೆಳೆ ಕೈಕೊಟ್ಟಾಗ, ಮಕ್ಕಳ ಮದುವೆಗೋ ಓದಿಗೋ ಇಲ್ಲವೇ ಯಾವುದೋ ಹಳೇ ಸಾಲ ತೀರಿಸೋಕೋ ಆ ತಾಯಿಯಂತಿರೋ ಜಮೀನಿನ ಒಂದು ಸಣ್ಣ ತುಂಡನ್ನು ಮಾರುವ ಅನಿವಾರ್ಯತೆ ನಮ್ಮ ರೈತರಿಗೆ ಬರುತ್ತದೆ.

ಹೀಗೆ ಕಷ್ಟ ಅಂತ ಜಮೀನು ಮಾರೋಣ ಅಂತ ತಾಲೂಕು ಆಫೀಸ್‌ಗೋ, ಸಬ್ ರಿಜಿಸ್ಟ್ರಾರ್ ಕಚೇರಿಗೋ ಹೋದಾಗ, ಅಲ್ಲಿನ ಅಧಿಕಾರಿಗಳು ಒಂದು ಮಾತು ಹೇಳ್ತಾರೆ. ಏನ್ರೀ 11ಇ ಸ್ಕೆಚ್ 11E Sketch ತಂದಿದ್ದೀರಾ ಅದಿಲ್ಲದೆ ರಿಜಿಸ್ಟ್ರೇಷನ್ ಮಾಡಲ್ಲ, ಮೊದಲು ಅದನ್ನ ತಗೊಂಡು ಬನ್ನಿ ಅಂತ ಕಡ್ಡಿ ತುಂಡು ಮಾಡಿದ ಹಾಗೆ ಹೇಳ್ತಾರೆ.

ಆಗ ನಮ್ಮ ಹಳ್ಳಿಯ ಮುಗ್ಧ ರೈತರಿಗೆ ದಿಕ್ಕೇ ತೋಚದಂತಾಗುತ್ತದೆ. ಯಪ್ಪಾ, ಏನಿದು ಹೊಸ ಗ್ರಹಚಾರ ಈ 11ಇ ಸ್ಕೆಚ್ ಅಂದ್ರೇನು ಇದನ್ನ ಎಲ್ಲಿಂದ ತರೋದು ಅಂತ ತಲೆ ಕೆಡಿಸಿಕೊಳ್ಳುವಂತಾಗುತ್ತದೆ.

ಕೃಷಿ ಜಮೀನು ಮಾರುವ ಹಾಗೂ ಕೊಳ್ಳುವ ಶೇಕಡಾ 90 ರಷ್ಟು ಜನರಿಗೆ ಈ ಪ್ರಶ್ನೆ ಖಂಡಿತಾ ಕಾಡುತ್ತೆ. ಮಧ್ಯವರ್ತಿಗಳು ಇದೇ ಅವಕಾಶ ಬಳಸಿಕೊಂಡು ರೈತರಿಂದ ಸಾವಿರಾರು ರೂಪಾಯಿ ಪೀಕುತ್ತಾರೆ.

ಆದರೆ ಸುಮ್ನೆ ದಲ್ಲಾಳಿಗಳಿಗೆ ದುಡ್ಡು ಕೊಟ್ಟು ಮೋಸ ಹೋಗುವ ಕೆಲಸ ಮಾಡಬೇಡಿ. ಬನ್ನಿ ಇವತ್ತಿನ ಈ ಲೇಖನದಲ್ಲಿ ನಿಮಗೆ ಅರ್ಥವಾಗುವ ಹಾಗೆ ಅತ್ಯಂತ ಸರಳವಾಗಿ ಈ 11ಇ ನಕ್ಷೆ ಅಂದ್ರೇನು ಅಂತ ವಿವರಿಸ್ತೀನಿ.

ಸರ್ಕಾರ ಇದನ್ನು ಯಾಕೆ ಕಡ್ಡಾಯ ಮಾಡಿದೆ ಇದರ ಅಸಲಿ ಫೀಸ್ ಎಷ್ಟು ಅಂತ ಪ್ರತಿಯೊಂದು ವಿಚಾರವನ್ನು ಎಳೆಎಳೆಯಾಗಿ ಬಿಡಿಸಿ ಹೇಳ್ತೀನಿ. ಓದಿ ತಿಳಿದುಕೊಳ್ಳಿ.

ಇದನ್ನೂ ಓದಿ: ಬ್ಯಾಂಕಿಗೆ ದುಡ್ಡು ಕಟ್ಟೋ ಮುನ್ನ ಇರಲಿ ಎಚ್ಚರ ಹಳ್ಳಿ ಜನ ತಿಳಿಯಲೇಬೇಕಾದ 8 ಹೊಸ ಇನ್‌ಕಮ್ ಟ್ಯಾಕ್ಸ್ ರೂಲ್ಸ್

ಏನಿದು 11ಇ ಸ್ಕೆಚ್ (11E Sketch) ಅಂದ್ರೆ

ಇದನ್ನು ಕಂದಾಯ ಇಲಾಖೆಯವರ ಭಾಷೆಯಲ್ಲಿ ಪ್ರೀ-ಮ್ಯೂಟೇಷನ್ ಸ್ಕೆಚ್ (Pre-Mutation Sketch) ಅಥವಾ ಮ್ಯೂಟೇಶನ್ ಪೂರ್ವ ನಕ್ಷೆ ಅಂತ ಕರೀತಾರೆ. ಇದನ್ನ ಒಂದು ಸಣ್ಣ ಉದಾಹರಣೆ ಮೂಲಕ ನಮ್ಮ ಹಳ್ಳಿಯ ಭಾಷೆಯಲ್ಲೇ ಅರ್ಥ ಮಾಡಿಕೊಳ್ಳೋಣ ಬನ್ನಿ

ನಿಮ್ಮ ಹೆಸರಲ್ಲಿ ಸರ್ವೆ ನಂಬರ್ 45 ರಲ್ಲಿ ಒಟ್ಟು 4 ಎಕರೆ ಕೃಷಿ ಜಮೀನು ಇದೆ ಅಂತ ಇಟ್ಕೊಳ್ಳಿ.
ನೀವು ಆ ಇಡೀ 4 ಎಕರೆಯನ್ನು ಸಂಪೂರ್ಣವಾಗಿ ಬೇರೊಬ್ಬರಿಗೆ ಮಾರಾಟ ಮಾಡ್ತಿದ್ರೆ, ಆಗ ನಿಮಗೆ ಈ 11ಇ ಸ್ಕೆಚ್ ಬೇಕಾಗಲ್ಲ. ನೇರವಾಗಿ ರಿಜಿಸ್ಟ್ರೇಷನ್ ಮತ್ತು ಫೋಡಿ ಮಾಡಿಸಬಹುದು.
ಆದ್ರೆ, ಆ 4 ಎಕರೆಯಲ್ಲಿ ನೀವು ಕೇವಲ 1 ಎಕರೆಯನ್ನು ಮಾತ್ರ (Part Extent) ಯಾರಿಗಾದರೂ ಮಾರ್ತಾ ಇದ್ದೀರಾ ಅನ್ಕೊಳ್ಳಿ.
ಆಗ, ಆ 1 ಎಕರೆ ನಿಮ್ಮ 4 ಎಕರೆಯಲ್ಲಿ ಯಾವ ದಿಕ್ಕಿನಲ್ಲಿದೆ ಉತ್ತರಕ್ಕಿದೆಯಾ ದಕ್ಷಿಣಕ್ಕಿದೆಯಾ
ಅದರ ನಿಖರವಾದ ಗಡಿಗಳು ಯಾವುವು? ಅನ್ನೋದನ್ನ ಸರ್ಕಾರಿ ಅಥವಾ ಲೈಸೆನ್ಸ್ ಪಡೆದ ಸರ್ವೆಯರ್ ಬಂದು ಅಳತೆ ಮಾಡ್ತಾರೆ.

ಹೀಗೆ ಜಮೀನಿನ ಅಳತೆ ಮಾಡಿ ಒಂದು ಅಧಿಕೃತ ಮ್ಯಾಪ್ ಅಥವಾ ನಕ್ಷೆ ತಯಾರಿಸ್ತಾರೆ. ಇದನ್ನೇ ಕಂದಾಯ ಇಲಾಖೆಯಲ್ಲಿ 11ಇ ಸ್ಕೆಚ್ ಅಂತ ಕರೆಯೋದು. ಅಂದ್ರೆ ಒಂದು ಮೂಲ ಸರ್ವೆ ನಂಬರ್‌ನ ಕೇವಲ ಒಂದು ಭಾಗವನ್ನು ಮಾತ್ರ ಮಾರಾಟ, ದಾನ ಅಥವಾ ವಿಭಾಗ ಮಾಡುವಾಗ, ಆ ನಿರ್ದಿಷ್ಟ ಭಾಗವನ್ನು ಸ್ಪಷ್ಟವಾಗಿ ಗುರುತಿಸುವ ಅಧಿಕೃತ ನಕ್ಷೆಯೇ ಈ 11ಇ ಸ್ಕೆಚ್.

ನಿಮ್ಮ ಜಮೀನಿನ ಪಹಣಿಯನ್ನು ನೋಡಲು ಇಲ್ಲಿ ಕ್ಲಿಕ್ ಮಾಡಿ

ಇದ್ಯಾಕೆ ಅಷ್ಟೊಂದು ಕಡ್ಡಾಯ ಕೃಷಿ ಜಮೀನಿಗೂ ಸರ್ಕಾರದ ಪ್ಲಾನ್ ಏನು

ಸರ್ಕಾರ ಸುಮ್ನೆ ಯಾರಿಗೂ ತೊಂದರೆ ಕೊಡಬೇಕು, ರೈತರನ್ನ ಅಲೆಸಬೇಕು ಅಂತ ಈ ನಿಯಮ ತಂದಿಲ್ಲ. ಇದರ ಹಿಂದೆ ರೈತರಿಗೆ ಭವಿಷ್ಯದಲ್ಲಿ ಆಗುವ ಮೋಸ ತಪ್ಪಿಸುವ ದೊಡ್ಡ ಉದ್ದೇಶ ಇದೆ. ಈ ಕೆಳಗಿನ ಅಂಶಗಳನ್ನು ಗಮನಿಸಿದರೆ ಇದು ರೈತರಿಗೆ ಎಷ್ಟು ಮುಖ್ಯ ಅಂತ ನಿಮಗೇ ಅರ್ಥವಾಗುತ್ತದೆ:

ವಂಚನೆಗಳಿಗೆ ಕಂಪ್ಲೀಟ್ ಬ್ರೇಕ್: ಹಿಂದಿನ ಕಾಲದಲ್ಲಿ ಒಬ್ಬನ ಹತ್ರ ಇರೋದೇ 2 ಎಕರೆ ಜಮೀನು, ಆದ್ರೆ ಕಾಗದದ ಮೇಲೆ 3 ಎಕರೆ ಅಂತ ಬೇರೆಯವರಿಗೆ ಮಾರಿಬಿಡ್ತಿದ್ದ. ಇಲ್ಲಾಂದ್ರೆ ಒಂದೇ ಜಮೀನನ್ನು ಇಬ್ಬಿಬ್ಬರಿಗೆ ಮಾರಾಟ ಮಾಡೋ ವಂಚನೆಗಳು ನಡೀತಾ ಇತ್ತು. 11ಇ ಸ್ಕೆಚ್ ಪಕ್ಕಾ ಇದ್ರೆ ಈ ತರಹದ ಯಾವುದೇ ಮೋಸ ನಡೆಯಲ್ಲ.
ಗಡಿ ಗಲಾಟೆಗಳು ಇರಲ್ಲ: ಹಳ್ಳಿಗಳಲ್ಲಿ ಒಂದು ಗೇಣು ಜಾಗಕ್ಕೆ, ಒಂದು ಬದುವಿಗೆ, ಒಂದು ಮರಕ್ಕೆ ಅಣ್ಣ-ತಮ್ಮಂದಿರೇ ಕತ್ತಿ ಮಸೆಯೋದು ಉಂಟು. 11ಇ ಸ್ಕೆಚ್ ಇದ್ರೆ, ಜಮೀನು ಕೊಳ್ಳುವವನಿಗೆ ತಾನು ಖರೀದಿಸುತ್ತಿರುವ ಜಮೀನು ನಿಖರವಾಗಿ ಎಲ್ಲಿಂದ ಎಲ್ಲಿಗೆ ಇದೆ, ಅದರ ಬದು, ಗಡಿ ಯಾವುದು ಅನ್ನೋದು ಸ್ಪಷ್ಟವಾಗಿ ಗೊತ್ತಾಗುತ್ತೆ. ಇದರಿಂದ ಅಕ್ಕಪಕ್ಕದ ರೈತರೊಂದಿಗೆ ಮುಂದೆ ಬರುವ ಗಡಿ ಗಲಾಟೆಗಳು ಸಂಪೂರ್ಣವಾಗಿ ತಪ್ಪುತ್ತವೆ.
ಆಟೋಮ್ಯಾಟಿಕ್ ಮ್ಯೂಟೇಶನ್ (ಖಾತೆ ಬದಲಾವಣೆ): ಈಗ ಸಬ್ ರಿಜಿಸ್ಟ್ರಾರ್ ಕಚೇರಿಯ ಕಾವೇರಿ ತಂತ್ರಾಂಶ (Kaveri Portal) ಮತ್ತು ಕಂದಾಯ ಇಲಾಖೆಯ ಭೂಮಿ ತಂತ್ರಾಂಶ (Bhoomi Software) ಎರಡೂ ಲಿಂಕ್ ಆಗಿವೆ.
ಅಲೆದಾಟ ತಪ್ಪುತ್ತೆ: ನೀವು 11ಇ ಸ್ಕೆಚ್ ಕೊಟ್ಟು ರಿಜಿಸ್ಟ್ರೇಷನ್ ಮಾಡಿದ ತಕ್ಷಣ, ಆಟೋಮ್ಯಾಟಿಕ್ ಆಗಿ ನಿಮ್ಮ ಹೆಸರಿಗೆ ಪಹಣಿ (Mutation) ಬದಲಾಗಲು ಪ್ರಕ್ರಿಯೆ ಶುರುವಾಗುತ್ತದೆ. ಈ ಸ್ಕೆಚ್ ಇಲ್ಲದಿದ್ದರೆ ಮ್ಯೂಟೇಶನ್ ಪ್ರಕ್ರಿಯೆ ಸಾಧ್ಯವೇ ಇಲ್ಲ. ಹಿಂದಿನ ತರಹ ತಲಾಟಿ ನಾಡಕಚೇರಿ ಅಂತ ಅಲೆಯೋದು ತಪ್ಪುತ್ತೆ.

5 ಗುಂಟೆಗಿಂತ ಕಡಿಮೆ ಜಮೀನಿಗೆ 11ಇ ಸ್ಕೆಚ್ ಮಾಡಿಸಬಹುದಾ

ನಮಸ್ಕಾರ ರೈತ ಬಾಂಧವರೇ. ಜಮೀನಿನ ವಿಚಾರ ಬಂದಾಗ ನಮ್ಮ ರೈತರಿಗೆ ಬಹಳಷ್ಟು ಅನುಮಾನಗಳು ಕಾಡುತ್ತವೆ. ಅದರಲ್ಲಿ ಒಂದು ಮುಖ್ಯವಾದ ಪ್ರಶ್ನೆ ಅಂದ್ರೆ, ನನ್ನ ಹತ್ರ ಇರೋದೇ 2-3 ಗುಂಟೆ ಜಮೀನು, ಇದಕ್ಕೆ 11ಇ ಸ್ಕೆಚ್ ಮಾಡಿಸಬಹುದಾ ಅನ್ನೋದು.

ಇದರ ಬಗ್ಗೆ ನಮ್ಮ ರೈತರು ಸ್ವಲ್ಪ ಗಮನವಿಟ್ಟು ಕೇಳಬೇಕು. ಯಾಕಂದ್ರೆ ಸರ್ಕಾರ ಇತ್ತೀಚೆಗೆ ಕೃಷಿ ಜಮೀನಿನ ಬಗ್ಗೆ ಒಂದು ಹೊಸ ರೂಲ್ಸ್ ತಂದಿದೆ. ಆ ನಿಯಮದ ಬಗ್ಗೆ ಪೂರ್ತಿ ವಿವರ ಇಲ್ಲಿದೆ.

ಕೃಷಿ ಜಮೀನು ತುಂಡು ಮಾಡುವಂತಿಲ್ಲ (ಫ್ರಾಗ್ಮೆಂಟೇಶನ್ ಬ್ಯಾನ್)

ಮೊದಲೆಲ್ಲಾ ಎಷ್ಟೇ ಸಣ್ಣ ಜಾಗ ಇದ್ದರೂ ಸುಲಭವಾಗಿ ಮಾರಾಟ ಮಾಡಬಹುದಿತ್ತು. ಆದ್ರೆ ಈಗ ಹಾಗಿಲ್ಲ.
ಕೃಷಿ ಜಮೀನನ್ನು 5 ಗುಂಟೆಗಿಂತ ಕಡಿಮೆ ಅಳತೆಯಲ್ಲಿ ತುಂಡು-ತುಂಡು ಮಾಡಿ (Fragmentation) ಬೇರೆಯವರಿಗೆ ಮಾರಾಟ ಮಾಡುವುದನ್ನು ಸರ್ಕಾರ ಕಟ್ಟುನಿಟ್ಟಾಗಿ ಬ್ಯಾನ್ ಮಾಡಿದೆ.
ಯಾಕಂದ್ರೆ, ಕೃಷಿ ಜಮೀನು ತೀರಾ ಚಿಕ್ಕದಾಗುತ್ತಾ ಹೋದರೆ ಅಲ್ಲಿ ಉಳುಮೆ ಮಾಡೋಕೆ ಟ್ರ್ಯಾಕ್ಟರ್ ಓಡಾಡೋಕೆ ಕಷ್ಟ ಆಗುತ್ತೆ. ಕೃಷಿ ಭೂಮಿ ಹಾಳಾಗಬಾರದು ಅನ್ನೋದು ಸರ್ಕಾರದ ಉದ್ದೇಶ.
ಹಾಗಾಗಿ, ನೀವು 5 ಗುಂಟೆಗಿಂತ ಕಡಿಮೆ ಜಮೀನನ್ನು ಬೇರೆ ಯಾರಿಗಾದರೂ (ಹೊರಗಿನವರಿಗೆ) ಮಾರಾಟ ಮಾಡ್ತೀನಿ ಅಂದ್ರೆ, ರಿಜಿಸ್ಟರ್ ಆಗಲ್ಲ.
ರಿಜಿಸ್ಟರ್ ಆಗಲ್ಲ ಅಂದ್ಮೇಲೆ, ಆ ಜಮೀನಿಗೆ ನೀವು ಸುಮ್ನೆ ಅರ್ಜಿ ಹಾಕಿದರೂ 11ಇ ಸ್ಕೆಚ್ ಮಾಡಿಸಲು ಅವಕಾಶ ಇರೋದಿಲ್ಲ. ಅಧಿಕಾರಿಗಳು ಅರ್ಜಿಯನ್ನು ರಿಜೆಕ್ಟ್ ಮಾಡ್ತಾರೆ.

ಇದನ್ನೂ ಓದಿ: ನಮ್ಮ ಹೊಲ ನಮ್ಮ ಹಕ್ಕು ಹದ್ದುಬಸ್ತು ಮಾಡ್ಸಿದಾಗ ಜಮೀನು ಒತ್ತುವರಿಯಾಗಿದ್ರೆ ವಾಪಸ್ ಪಡೆಯೋದು ಹೆಂಗೆ ಸಂಪೂರ್ಣ ಮಾಹಿತಿ

ಹಾಗಾದ್ರೆ ಸಣ್ಣ ಜಮೀನಿಗೆ ದಾರಿಯೇ ಇಲ್ವಾ? (ಸರ್ಕಾರ ಕೊಟ್ಟಿರೋ ವಿನಾಯಿತಿ ಏನು?)

ಇಲ್ಲೊಂದು ಖುಷಿ ವಿಚಾರ ಇದೆ. 5 ಗುಂಟೆಗಿಂತ ಕಡಿಮೆ ಜಮೀನಿಗೆ 11ಇ ಸ್ಕೆಚ್ ಮಾಡಿಸಲೇಬಾರದು ಅಂತೇನಿಲ್ಲ. ನಮ್ಮ ರೈತರಿಗೆ ತೊಂದರೆ ಆಗಬಾರದು ಅಂತ ಸರ್ಕಾರ ಒಂದು ದೊಡ್ಡ ವಿನಾಯಿತಿ ಕೊಟ್ಟಿದೆ.

ಕೌಟುಂಬಿಕ ವಿಭಾಗ (Family Partition): ನೀವು ನಿಮ್ಮ ಮನೆಯವರ ಜೊತೆಯಲ್ಲೇ ಅಂದರೆ ಅಣ್ಣ-ತಮ್ಮಂದಿರ ಮಧ್ಯೆ, ಅಪ್ಪ-ಮಕ್ಕಳ ಅಥವಾ ಅಕ್ಕ-ತಂಗಿಯರ ಮಧ್ಯೆ ಪಾಲು ಮಾಡಿಕೊಳ್ಳುತ್ತಿದ್ದರೆ ಇದಕ್ಕೆ ಯಾವುದೇ ನಿರ್ಬಂಧ ಇಲ್ಲ.
ಒಂದು ಉದಾಹರಣೆ ನೋಡಿ: ಅಪ್ಪನ ಹೆಸರಲ್ಲಿ 10 ಗುಂಟೆ ಜಮೀನಿದೆ, ಮೂರು ಜನ ಮಕ್ಕಳು ಇದ್ದಾರೆ ಅನ್ಕೊಳ್ಳಿ. ಆಗ ಒಬ್ಬೊಬ್ಬರಿಗೆ 3 ಗುಂಟೆ ಚಿಲ್ಲರೆ ಜಮೀನು ಪಾಲಿಗೆ ಬರುತ್ತೆ.
ಇಂತಹ ಕೌಟುಂಬಿಕ ವಿಭಾಗದ (ಪಾಲು ಪತ್ರ) ಸಂದರ್ಭದಲ್ಲಿ 5 ಗುಂಟೆಗಿಂತ ಕಡಿಮೆ ಜಾಗ ಇದ್ದರೂ ನೀವು 11ಇ ಸ್ಕೆಚ್ ಮಾಡಿಸಿಕೊಳ್ಳಬಹುದು. ಸರ್ಕಾರ ಇದಕ್ಕೆ ಅಸ್ತು ಅಂದಿದೆ.
ನಿಮ್ಮದೇ ರಕ್ತ ಸಂಬಂಧಿಗಳ ಮಧ್ಯೆ ಖಾತೆ ಬದಲಾವಣೆ ಮಾಡಿಕೊಳ್ಳುವಾಗ, ಪಾಲು ಮಾಡಿಕೊಳ್ಳುವಾಗ ಸರ್ಕಾರ ಯಾವುದೇ ತೊಂದರೆ ಕೊಡಲ್ಲ.

ಒಂದೇ ಮಾತಲ್ಲಿ ಹೇಳ್ಬೇಕು ಅಂದ್ರೆ:

ಬೇರೆಯವರಿಗೆ (ಹೊರಗಿನವರಿಗೆ) ಮಾರಾಟ ಮಾಡಲು: 5 ಗುಂಟೆಗಿಂತ ಕಡಿಮೆ ಜಮೀನಿಗೆ 11ಇ ಸ್ಕೆಚ್ ಮಾಡಿಸುವಂತಿಲ್ಲ.
ಮನೆಯವರಲ್ಲೇ ಪಾಲು (Partition) ಮಾಡಿಕೊಳ್ಳಲು: 5 ಗುಂಟೆಗಿಂತ ಕಡಿಮೆ ಜಮೀನಿಗೂ 11ಇ ಸ್ಕೆಚ್ ಖಂಡಿತಾ ಮಾಡಿಸಬಹುದು.

ಇದನ್ನ ನಮ್ಮ ರೈತರು ಸರಿಯಾಗಿ ಅರ್ಥ ಮಾಡಿಕೊಳ್ಳಬೇಕು. ಯಾರದೋ ಮಾತು ಕೇಳಿ ಸುಮ್ನೆ ಮಧ್ಯವರ್ತಿಗಳಿಗೆ ದುಡ್ಡು ಕೊಟ್ಟು ಕಳೆದುಕೊಳ್ಳಬೇಡಿ.

ಸರ್ಕಾರ ನಿಗದಿ ಮಾಡಿರೋ ಅಧಿಕೃತ ಶುಲ್ಕ ಎಷ್ಟು

ಬಹಳಷ್ಟು ಜನ ರೈತರು ಸರ್ವೆಯರ್‌ಗಳು ಬರೋದಕ್ಕೆ ಸಾವಿರಾರು ರೂಪಾಯಿ ಕೇಳ್ತಾರೆ, ಅಷ್ಟೊಂದು ದುಡ್ಡು ಎಲ್ಲಿಂದ ತರೋದು ಅಂತ ಕಣ್ಣೀರು ಹಾಕ್ತಾರೆ. ಮಧ್ಯವರ್ತಿಗಳ ಮಾತು ಕೇಳಿ ಸುಮ್ನೆ ಮೋಸ ಹೋಗಬೇಡಿ. ಸರ್ಕಾರದ ಅಧಿಕೃತ ಶುಲ್ಕ ಎಷ್ಟು ಅಂತ ಗೊತ್ತಾದ್ರೆ ನೀವೇ ಆಶ್ಚರ್ಯ ಪಡ್ತೀರಾ

ಗ್ರಾಮೀಣ ಪ್ರದೇಶದಲ್ಲಿ (ಹಳ್ಳಿಗಳಲ್ಲಿ): 2 ಎಕರೆವರೆಗಿನ ಕೃಷಿ ಜಮೀನಿಗೆ ಅಂದಾಜು ಕೇವಲ 800 ರಿಂದ 1200 ರೂಪಾಯಿ ಮಾತ್ರ ಅಧಿಕೃತ ಶುಲ್ಕವಿರುತ್ತದೆ. ಅದಕ್ಕಿಂತ ಹೆಚ್ಚುವರಿ ಜಮೀನಿದ್ದರೆ ಪ್ರತಿ ಎಕರೆಗೆ ಕೇವಲ 100 ರೂಪಾಯಿ ಇರಬಹುದು.
ನಗರ ಪ್ರದೇಶದಲ್ಲಿ (ಟೌನ್/ಸಿಟಿ): 2 ಎಕರೆವರೆಗೆ ಅಂದಾಜು 2000 ರೂಪಾಯಿ ಅಧಿಕೃತ ಶುಲ್ಕವಿರುತ್ತದೆ. ಹೆಚ್ಚುವರಿ ಪ್ರತಿ ಎಕರೆಗೆ 200 ರೂಪಾಯಿ ಇರುತ್ತದೆ.

ನೀವು ಆನ್‌ಲೈನ್‌ನಲ್ಲಿ ಅಥವಾ ನಾಡಕಚೇರಿಯಲ್ಲಿ ಅರ್ಜಿ ಸಲ್ಲಿಸುವಾಗಲೇ ಈ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಮೋಜಿನಿ (Mojini) ಪೋರ್ಟಲ್‌ನಲ್ಲಿ ಈ ಶುಲ್ಕದ ಬಗ್ಗೆ ಸಂಪೂರ್ಣ ಪಾರದರ್ಶಕತೆ ಇರುತ್ತದೆ. ಯಾರಿಗೂ ಸುಮ್ನೆ ಕೈಬಿಸಿ ಮಾಡೋ ಅವಶ್ಯಕತೆ ಇಲ್ಲ

ಅರ್ಜಿ ಸಲ್ಲಿಸುವುದು ಹೇಗೆ

ಇದಕ್ಕೆ ಅರ್ಜಿ ಸಲ್ಲಿಸುವುದು ತುಂಬಾನೇ ಸುಲಭ. ಯಾರಿಗೋ ದುಡ್ಡು ಕೊಟ್ಟು ಅಲೆಯುವ ಬದಲು, ನೀವೇ ಈ ಕೆಳಗಿನ ಹಂತಗಳನ್ನು ಫಾಲೋ ಮಾಡಿ:

ಹಂತ 1 (ಅರ್ಜಿ ಸಲ್ಲಿಕೆ): ನಿಮ್ಮ ಹತ್ತಿರದ ನಾಡಕಚೇರಿ (Nada Kacheri) ಅಥವಾ ರೈತ ಸಂಪರ್ಕ ಕೇಂದ್ರಕ್ಕೆ ಹೋಗಿ ಅರ್ಜಿ ಸಲ್ಲಿಸಬಹುದು. ಇಲ್ಲವೇ, ನೀವೇ ಮೊಬೈಲ್ ಅಥವಾ ಕಂಪ್ಯೂಟರ್‌ನಲ್ಲಿ ಸರ್ಕಾರದ ಅಧಿಕೃತ ಮೋಜಿನಿ ವಿ3 (Mojini V3) ವೆಬ್‌ಸೈಟ್‌ಗೆ ಭೇಟಿ ನೀಡಿ ಆನ್‌ಲೈನ್ ಮುಖಾಂತರ ಅರ್ಜಿ ಹಾಕಬಹುದು.
ಹಂತ 2 (ಶುಲ್ಕ ಪಾವತಿ): ಅರ್ಜಿ ಸಲ್ಲಿಸುವಾಗಲೇ ಆನ್‌ಲೈನ್‌ನಲ್ಲೇ ಸರ್ಕಾರದ ನಿಗದಿತ ಶುಲ್ಕವನ್ನು ಪಾವತಿಸಿ, ಅದರ ರಶೀದಿ (Receipt) ಪಡೆದುಕೊಳ್ಳಿ.
ಹಂತ 3 (ಸರ್ವೆಯರ್ ನೇಮಕ): ನೀವು ಅರ್ಜಿ ಸಲ್ಲಿಸಿದ ನಂತರ, ಆ ಕೆಲಸವನ್ನು ಒಬ್ಬ ಲೈಸೆನ್ಸ್ ಪಡೆದ ಸರ್ವೆಯರ್ ಅಥವಾ ಸರ್ಕಾರಿ ಸರ್ವೆಯರ್‌ಗೆ ಕಂದಾಯ ಇಲಾಖೆಯಿಂದ ನೇಮಿಸಲಾಗುತ್ತದೆ.
ಹಂತ 4 (ಜಮೀನಿನ ಅಳತೆ): ಸರ್ವೆಯರ್ ನಿಮ್ಮ ಜಮೀನಿಗೆ ಖುದ್ದಾಗಿ ಬಂದು, ನಿಮ್ಮ ಮತ್ತು ಅಕ್ಕಪಕ್ಕದ ಜಮೀನಿನ ಮಾಲೀಕರ ಸಮ್ಮುಖದಲ್ಲಿ ಟೇಪು/ಚೈನು ಹಿಡಿದು ನಿಖರವಾಗಿ ಗಡಿಯನ್ನು ಅಳತೆ ಮಾಡುತ್ತಾರೆ.
ಹಂತ 5 (ಎಡಿಎಲ್ಆರ್ ಅನುಮೋದನೆ): ಅಳತೆ ಮುಗಿದ ಮೇಲೆ ಸರ್ವೆಯರ್ ನಕ್ಷೆಯನ್ನು ಸಿದ್ಧಪಡಿಸಿ ಕಂದಾಯ ಇಲಾಖೆಯ ಎಡಿಎಲ್ಆರ್ (Assistant Director of Land Records) ಅಧಿಕಾರಿಗೆ ಆನ್‌ಲೈನ್‌ನಲ್ಲೇ ಕಳುಹಿಸುತ್ತಾರೆ.
ಹಂತ 6 (ಸ್ಕೆಚ್ ಡೌನ್‌ಲೋಡ್): ಅಧಿಕಾರಿ ಆ ನಕ್ಷೆಯನ್ನು ಪರಿಶೀಲಿಸಿ ಅನುಮೋದನೆ (Approval) ನೀಡಿದ ನಂತರ, ಒಂದು ಬಾರ್‌ಕೋಡ್ ಇರುವ ಅಧಿಕೃತ 11ಇ ಸ್ಕೆಚ್ ಸಿದ್ಧವಾಗುತ್ತದೆ. ಇದನ್ನು ನೀವು ಮೋಜನಿ ವೆಬ್‌ಸೈಟ್‌ನಿಂದಲೇ ಕುಳಿತಲ್ಲಿಯೇ ಡೌನ್‌ಲೋಡ್ ಮಾಡಿಕೊಳ್ಳಬಹುದು.

ಇದನ್ನೂ ಓದಿ: ಹಿರಿಯ ನಾಗರಿಕರ ಸೀನಿಯರ್ ಸಿಟಿಜನ್ ಕಾರ್ಡ್ ಇದ್ರೆ ಸಿಗುತ್ತೆ ವಿಐಪಿ ಮರ್ಯಾದೆ

ದಲ್ಲಾಳಿಗಳಿಗೆ ದುಡ್ಡು ಸುರಿಯೋದು ಬೇಡ

ಇಡೀ ಪ್ರಕ್ರಿಯೆ ಮುಗಿಯಲು ಸಾಮಾನ್ಯವಾಗಿ 15 ರಿಂದ 30 ದಿನಗಳ ಸಮಯ ಹಿಡಿಯಬಹುದು. ಸರ್ಕಾರಿ ಕೆಲಸ ಅಲ್ವಾ, ಸ್ವಲ್ಪ ತಾಳ್ಮೆ ಇರಲೇಬೇಕು. ಹಾಗಾಗಿ, ಜಮೀನು ರಿಜಿಸ್ಟ್ರೇಷನ್ ಮಾಡಿಸುವ ದಿನಾಂಕ ಫಿಕ್ಸ್ ಮಾಡುವ ಮುಂಚೆಯೇ, ಮೊದಲೇ ಈ 11ಇ ಸ್ಕೆಚ್ ಮಾಡಿಸಿಟ್ಟುಕೊಳ್ಳುವುದು ನಿಜವಾದ ಜಾಣತನ.

ಕೊನೇ ಘಳಿಗೆಯಲ್ಲಿ ಗಾಬರಿ ಮಾಡಿಕೊಂಡು, ಮಧ್ಯವರ್ತಿಗಳಿಗೆ ಸಾವಿರಾರು ರೂಪಾಯಿ ಸುರಿಯುವ ಬದಲು, ಈ ಕಾನೂನು ಪ್ರಕ್ರಿಯೆಯನ್ನು ಸರಿಯಾಗಿ ತಿಳಿದುಕೊಂಡು, ಸುಮ್ನೆ ದಲ್ಲಾಳಿಗಳ ಹಿಂದೆ ಹೋಗದೆ ನೀವೇ ನೇರವಾಗಿ ಅರ್ಜಿ ಹಾಕಿ.

ಈ ಉಪಯುಕ್ತ ಮಾಹಿತಿ ಪ್ರತಿಯೊಬ್ಬ ರೈತನಿಗೂ ತಲುಪಬೇಕು. ನಿಮ್ಮೂರಿನ ವಾಟ್ಸಾಪ್ ಗ್ರೂಪ್‌ಗಳಲ್ಲಿ, ಸ್ನೇಹಿತರು ಹಾಗೂ ಸಂಬಂಧಿಕರೊಂದಿಗೆ ಈ ಲೇಖನವನ್ನು ಖಂಡಿತ ಹಂಚಿಕೊಳ್ಳಿ. ಆದರೆ ಇದು ಸುಳ್ಳು ಮಾಹಿತಿ ಅಂತ ಯಾರಿಗೂ ದಾರಿತಪ್ಪಿಸುವ ಮಾತುಗಳನ್ನ ಹೇಳಬೇಡಿ

ನಿಮಗೆ 11ಇ ಸ್ಕೆಚ್ ಬಗ್ಗೆ ಇನ್ನು ಏನಾದರೂ ಅನುಮಾನಗಳಿದ್ದರೆ, ಕೆಳಗೆ ಕಾಮೆಂಟ್ ಮಾಡಿ. ನಮ್ಮ ಹಳ್ಳಿಯ ರೈತರಿಗಾಗಿ ಇಂಥಹದ್ದೇ ಇನ್ನಷ್ಟು ಉಪಯುಕ್ತ, ನೈಜ ಮಾಹಿತಿಯನ್ನು ಮುಂದೆಯೂ ತರುತ್ತಲೇ ಇರುತ್ತೇವೆ. ಭೂತಾಯಿಯ ಸೇವೆ ಮಾಡುವ ಎಲ್ಲರಿಗೂ ಒಳ್ಳೆಯದಾಗಲಿ. ನಮಸ್ಕಾರ